КОП МИЛЛИАРДХА ТУРЧАТХАН ОБЪЕКТТЕР - СЫЙЫХ НИМЕС, ОЛ УЛУҒ ТОҒЫСТЫ ПААЛААНЫ
09.09.2016
Хабарлар
Хакасияның пазы Виктор Зимин Россияның Хазна Думазының депутады Надежда Максимованаң тоғыс хоостыра тоғасхан. Регион устағҷызы Надежда Сергеевнаа, тӱзімніг пірге тоғыс ӱчӱн паза Хакасия правительствозына федеральнай кіннең тоғынарында хабасчатханы ӱчӱн, алғызын читірген.
Кӧзідімге, алынҷа хайығ республиканың улуғ социальнай кирексіністіг объекттерін - музей-культура кінін, республиканың имнег туразының наа корпузын, перинатальнай кінні - пӱдірерінҷе проекттер чуртасха кирілгеніне салылған.
- Прайзы ла пілбинче хайдағ сидік чол иртерге килісчеткенін, мындағ проекттерні арачылапчатса. Надежда Сергеевна, сірернің хабазииңар ӱчӱн, ол пастағларны федеральнай синде кӱстеніп тибіреткеніңер ӱчӱн, алғызым читірчем. Аны республиканың улуғ чидии чіли паалапчам. Улам піске ол обьекттерні экономикадағы сидіксіністер тузында арачылап аларға паза пӱдіріп пастирға киліскенін санға алза. Пілчем, хайди сидік полған ол кирекке федеральнай ахча таап аларға. Нинҷе хати прай пічіктерні министерстволарда паза Россия правительствозында арачылирға паза оларҷа nip чӧпке килерге киліскен. Че піс аны идіп алғабыс, паза кӧбізін, Надежда Сергеевна, сірернің кӱстенізіңер сылтаанда. Прай Хакасияның, прай чуртағҷыларының адынаң алғыс оой нимес тоғызыңар ӱчӱн, - депутатха алғызын читірген Виктор Зимин.
Пазағы пӧгін, хайзын пӧгерінҷе амды республика правительствозы паза Россияның Хазна Думазындағы Хакасиядаң сығара депутады хада тоғынчалар - наа имнег объекттеріне амғы тусха килістіре имнег оборудованиелерін алары. Пу сурығларның чардығы пӧгіл парған, че ол тоғысты читіре толдыр саларға кирек тіп таныхтааннар тоғазығның араласчылары.
- Виктор Михайлович, сірер орта таныхтапчазар, пастағнаң сығарынаң чуртасха киреpi не читіре чол ӱр паза сидік, республиказар федеральнай ахча кирер пӧгін піске стратегическай полған. Сидік тее полған полза, піс аны лӧгіп алғабыс. Мындағ пӧзік паалағ ӱчӱн алғыс. Позымның саринаң таныхтирға сағынчам, ол сурығларны пӧгерінде мағаа кӧзідім полғаннар сірернің кӱстенізіңер паза патриотизміңер, хайзынаң сірер хаҷан даа республиканың кирексіністерін арачылапчазар. Анзынаң хада республика халғанҷы чылларға чуртас-экономика тилізінде чахсы чидіглерге читкені полысхан.
Ол кӧп миллиардха турчатхан объекттер - Хакасияа сыйых нимес, ол республикада иділген улуғ тоғысты паалааны. Пістің пар полған нименең парарға паза ниме кӧзідерге, Хакасияны танып сыхханнар. Республика чуртасха, тоғысха, бизнесті тилідеріне иң чахсы паза тӧреміл тиліпчеткен регионнар саны на кірче. Таныхтирбын, ол минің кӧрізім нимес, ол федеральнай министерстволарның паалаа. Ол Хазна Думазындағы коллегаларымның кӧрізі, анзы мағаа аарлығ, - таныхтаан Надежда Максимова.
Хакасияның пазы паза Хазна Думазының депутады ідӧк ӱгредіг сферазында инфраструктураны тилідерінең палғалыстығ сурығларны ӱзӱрібіскеннер. Кӧзідімге, республиканы школалар пӱдіриинҷе федеральнай программада араластырардаңар чоох парған, андар кирер сурыныснаң республика федеральнай кінзер айланған полған. Иділген тоғыс регионға проектке ӧткін хозыларға оңдай пирген. Амды федеральнай бюджеттең паза республика бюджедінең позыдылған ахчаа Ис пилтірінде паза Катановта наа школаларның пӱдірии тоозыл парир. Пазағы чылда Уӱс аалдағы школаның пӱдіриин тоос саларға кирек. Олох туста алынҷа хайығ республиканың ӧӧн городында школалар пӱдіреріне салылған. Ол санда 1000 орыннығ амғы тусха килістіре оңдайлығ наа школаа, аны Ағбанның иң не ӧткін пӱдірілчеткен микрорайоннарының пірсінде пӱдірерге пӧгін пар.
Ол проектке федеральнай синде хабазығ алып алары уғаа кирек, аннаңар правительство депутат Надежда Максимованаң хада ол тоғыснаң амох айғасчалар.
Чоохтирға кирек, ирткен чыллар аразына, ол санда олған садтарынҷа федеральнай программаны чуртасха кирері хоостыра, республикада 10 наа олған сады пӱдірілген, 20 олған сады школа алнындағы ӱгредіг системазынзар нандыра айландырылған. Салтарында олған садтарында 10,5 муң хоза орын тӧстелген паза 3-7 частығ палаларның олған садтарынзар теес чох иділген.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде