СОЦИАЛЬНАЙ ХАБАЗЫҒ СИНІ ХОЗЫЛАР
09.09.2016
Хабарлар
Хакасия парламентінің устағҷызы Владимир Штыгашев 7 сентябрьда Ӧӧркі Чӧп президиумының теестегі чыылиин иртірген. Чыылығда кӧрілген сурығларның пірсі ӧкіс палаларны ӧскірчеткен сӧбірелерге теелген. Чоох опекун пособиелерінің синін кӧдірердеңер парған.
«Ӧкіс палаларға, іҷе-пабазының хайии чох халған палаларға социальнай хабазығ пирердеңер» республика законынзар алызығлар кирчеткен закон проектінең Хакасияның ӱгредіг паза наука министрінің орынҷызы Анатолий Бутенко таныстырған.
Хайди ол чарытхан, республикада пӱӱлгі чылға чарадыға алылған опекун пособиезінің сині мындағ: 6 часха теере палалығларға - 5843 салковай, 6 частаң улуғ палалығларға - 7194 салковай. Ирткен чылның хыринда ол ӧс парған, че анда индексация кӧрілбеен. Республика прокурорының тоғырланызы хоостыра опекун пособиелеріне 2016 чылның 1 июньынаң индексация итчең алызығлар кирілче тіп чоохтаан министр орынҷызы. Индексация иділзе, опекун пособиезінің сині мындағ пол парар: 6 часха теере палалығларға - 6240 салковай, 6 частаң улуғ палалығларға - 7683 салковай. Ӧӧркі Чӧп президиумы пу сурығны чағынғы сессияда кӧрібізерге чарат салған.
Ідӧк чыылығда Хакас Республиканың Сыныхтағ-сананыс палатазына 2016 чылда хайдағ сыныхтағ мероприятиелерін иртірерге киректелчеткенінҷе Хакасияның Оӧркі Чӧбінің чӧптерінзер хоза пункттар кирері ӱзӱрілген. Андар ӱс пункт кирері кӧрілче: онкология ағырығларынаң ағырчатханнарға имнег полызии хайди пирілчеткенін, ол санда профилактика мероприятиелері хайди иртірілчеткенін сыныхтиры; онкология ағырығларын имнеҷең аарлығ оборудование, имнег полызығларын пирерінде (ахчаа паза тикке) хайди тӱзімніг тузаланылчатханын сыныхтиры; онкологияны имнирінде кадрлар сурии хайди пӧгілчеткенін кӧрері.
- Онкология ағырығларының профилактиказын иртірҷең мероприятиелерні чуртағҷылар аразында ӧткін апарарға кирек. Ідӧк аарлыға турчатхан оборудование онкологиянаң ағырчатханнарны имнирінде тӱзімніг алай чох па тузаланылчатханын кӧрерге кирек, - таныхтаан Ӧӧркі Чӧп кнезінің орынҷызы Сергей Комаров, сурығны чарыдып.
Пу сурығны ӧӧркі чӧптегілер ідӧк чағынғы сессияның ӱзӱриине сығарарға чаратханнар. Сессия 28 сентябрьда иртер.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде