ТАБЫҒЛАР ИПТІГ ИРТСІННЕР
09.09.2016
Хабарлар
Пу наада Хакасияның правительство туразында республиканың сағыбаан саайларҷа комиссиязының (КЧС) теести чыылии ирткен. Аның тоғызын Хакасия пазының орынҷызы, комиссияның кнезі Владимир Александрович Крафт апарған.
Видеоконференцзалда Хакасияның министерство-ведомстволарының устағҷылары полғаннар, муниципальнай пӱдістер комиссияның тоғызында ідӧк араласханнар, оларнаң палғалыс видео пастыра тудылған.
Пастап Владимир Александрович чыылған чонға 8 айның салтарларын искірген. Республикада ӧрттер саны хызырыл парған, 2014 чылнаң тиңнестірзе, пӱӱл 6 ӧртке асхынах полған. Анда 8 ай аразына 24 кізі ӱреен, 2015 чылда -52, 2014 чылда - 35. Чазыдағы хуруғ от 26 хати ӧртке хабылған, халғанҷызын чазыда ӧрт 17 июньда полтыр.
Амды суға сомар тус тоозылған. Пӱӱл чайғызын Хакасияның кӧллерінде паза суғларында 12 кізі саайланған. Че Владимир Александровичтің чооғынаң, пу саннарны хатап сыныхтирға кирек. Пірееде эксперттер ибде ваннайда ӱреен кізіні кӧлде пат парған тіп таныхтап салчалар.
Анаң комиссияның чыылиинда кӱскӱ-хысхыда сых парчатхан ӧрттернің санын хайдағ оңдайнаң хызырарын ӱзӱргеннер. Хакасияның чуртағҷыларына СМИ-лар пастыра песнең орта тузаланарға кирек тіп сыбыра искірерге киректелче. Ідӧк муниципальнай пӱдістерге ааллар ибіре чирлерні чолахти хатап тарт саларға, суғ алҷаң орыннарны сыныхтабызарға кирек.
Комиссияның кнезі В.А.Крафт муниципалитеттерге мындағ сурьма хайығ айландырарға кирек теен. Республикада чиит специалисттерге паза кӧп палалығ сӧбірелерге тикке чир пирілче. Че кізілернің тураны сах андох пӱдірібізерге оңдай чоғыл. Піреезі пирілген чирлерін ӧс парған оттаң тузында арығлабинча, аннаңар анда ӧрт сығыс парарға айабас. Полған на муниципалитете туралар пӱтчеткен чирлерні сыныхтабызарға кирек, ээлерін, тізең, чир участоктарын сӧп-саптаң арығлазыннар тіп сизіндірерге.
18 сентябрьда тиксі Россияда табығлар иртерлер. Хакасияда 393 табығ участогы тоғынар. Амғы тусха оларны сыныхтабысханнар, 38-нде улуғ нимес читпестер табылған. В.А.Крафттың таниинаң, амды табығ участоктарында ӧрттең арачыланар тоғыс прай иділ парған, аннаңар табығлар Хакасияда иптіг иртерлер тіп ізеніс пар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде