АБАЗАНЫ ТАСТАБАСПЫС
13.09.2016
Хабарлар
Хакасияның пазы Виктор Зимин Абазадағы Ағбан руднигі киреене чарыдылған чыылығда республика правительствозының экономика блогы кізілерінің иділген тоғыстаңар сан пирізін истіп алған.
Регион устағҷызының пастағы орынҷызы Олег Нам паза республиканың экономика министрі Татьяна Пауль ӱр ниместе ле Москвадаң айланғаннар. Анда олар федеральнай структуралар саринаң рудникке хабазығ пирҷең оңдайлар хоостыра чӧптезіглер апарғаннар. Иң не пурун чӧптезіглер Россияның промышленность паза садығ министерствозынаң, ідӧк Промышленность тилізі фондынаң апарылған.
Салтарларның пірсі - предприятиее ахчалығ хабазығ пирерінде аралазары. Кӧзідімге, чоох сойын сығарарынҷа завод пӱдіреріне проект-сметалығ пічіктерні тимнирге ахча позыдардаңар парған. Ідӧк Абазадағы предприятиені Промышленность тилізі фондының лизинг проекттерінҷе программазынзар кирердеңер. Анзы Абазада руданы улам тиреңде анирға киректелчеткен техниканы тӧбін арах пааларнаң садызып аларға оңдай пирер.
Ағаа хоза «ЕВРАЗ» компаниялар ӧмезінең тоғыс апарылча, ол амғы туста чалғызан на хакас рудазын алча. Руда аныҷаң комплекске ээзі полчатхан праволар «Руда Хакасии» ООО-даң Хакас Республиканың Тиліс фондына пирілчеткен сылтаанда руданы садызарынҷа наа пічіктер иділген, ідӧк килер 2017 чылға хада тоғыс апарҷаң оңдайларҷа чӧптезіглер апарылча.
Виктор Зимин тоғысты узарадарға, ідӧк федеральнай синдегі нинҷе-де тоғазыға пічіктер пакедін тимнеп саларға чахып салған. Ол тоғазығларны регион устағҷызы позы сентябрь ортызынзар иртірерге пӧгінче.
Кирек юридическай процедуралар иртібіскен соонаң, республиканың руда аныҷаң комплексінең устир кізі Александр Жуков Абазадағы паза Тӧӧ пазындағы предприятиелернең танысханының пастағы салтарларынаңар искір пирген. Хайди ол таныхтаан, Абазадағы Ағбан руднигінде октябрь пасталарына рудалығ наа орыннарны анирына тимненісті узарадарға тимделер.
- Предприятиелерде позыңар удаа арах полыңар, кізілернең чоохтазыңар, - пӧгін турғысхан Виктор Зимин, Александр Жуковcap айланып. - Кізілерге иділчеткен тоғыстаңар искір турыңар. Піс Абазаны тастабаспыс, предприятие ӱр чыллар тоғынарына, руда анирына, кізілер чал ахчазын аларына піс прай ниме ит саларбыс.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде