ХООС ЛИТЕРАТУРА ЧИИТ УЛУСТЫ ПІРІКТІРЧЕ
13.09.2016
Хабарлар
Ирткен чылда С.П.Кадышевтің адынаң культура кінінің пос тусты иртірҷең пӧлік тоғынҷылары Литература чылына чарыдылған «Литература лабиринттері» марығ иртіргеннер. Пӱӱл, тізең, 9 сентябрьда пу марығны хати иртірділер.
Мероприятие литератураа чарыдылча. Анда 15-25 частығ чииттер араласчалар. Полған на командаа 7- 10 кізі кірче. Пӱӱлгі марығда пис команда араласхан. Анда Ағбандағы 26 № школаның ӱгренҷілері паза университет-колледжтернің студенттері полғаннар.
Культура кіні алнында чыылысхан чииттерге аймах ӧңніг галстуктар пиргеннер. Полған на команданың пір ӧңніг галстук полған. Анаң марығның оңдайларынаңар чарыда чоохтап пиргеннер. Марығ оңдайлары хоостыра пис командаа пис маршрут пирілген, Оларға пис орынзар чӱгӱр пар килерге кирек полған. Ағаа хоза, анда оларны агент сағаан. Че пастағызын агент кізіні таап аларға кирек, хайзы позын сизіндірбин тудынған. Анаң агент оларға таптырғас сурығларын пирче. Орта нандырып, команда араласчылары аннаң андар чӱгӱргеннер. 25 орында 25 агент турған. Олар Олимп резерві училищезінің, Коммунальнай хозяйство паза сервис техникумының студенттері полғаннар.
Хоос литература хоостыра чахығларны толдырып, олғаннар Ағбан кініндегі танығлығ орыннарҷа чӱгӱр чӧртірлер. Марығ республика синінде иртірілчеттір. Городтағылар Ағбанны чахсы пілчетселер, аалдағыларға сидік арах полар, неке. Че пӱӱл ирткен марығда Орджоникидзе аймаанаң команда араласхан. Олар Копьевта аймах синінде марығ иртіртірлер. Чиңісчі команданы Ағбанзар ыстырлар.
26 № школаның марығда араласчатхан ӱгренҷілерін уроктардаң позыдыбыстырлар. «Піс, уроктарға парбааныбыс ӱчӱн, ӧрінчебіс!» - чоохтаан Миша оолағас. Сынында оларға марығда аралазарға хынығ полған, харахтары ла пызыңнасчатханнар. Книгалар матап хығырчабыс тіп ізендіргеннер. Чайғы тынағ соонаң литератураны сағысха кирерге сидік нимес тееннер. Нинҷе-де ле кӱн аразына, книгаларны холға алып, Интернет пастыра тимнентірлер. Чиңісті холға кирерлерінеңер 8 «Б» класстың ӱгренҷілері ікінҷілебинчеткеннер.
Литература уроктарының ӱгретчізі Ольга Анатольевна Русецкая олғаннарынаң хада килтір. Ол школада 17 чыл тоғын парир.
- Мындағ марығ иртірілчеткені уғаа чахсы, - чоохтаан Ольга Анатольевна. - Ирткен чылда марығдаңар испин халғабыс. Пӱӱл, тізең, 8 «Б» класстаң ікі команда араласча. Олғаннар хыйғаҷахтар, книга хығырарға, кӧп ниме пілерге хынчалар. Марығда литератураның аймах темалары хоостыра сурығлар пирілче.
Ӱгренҷілері пастағы орынны холға кирерлер тіп ухаанҷылап пиргем. Че ӱгретчі араласчатханыбыс таа чахсы теен. 14 частығ ӱгренҷілерге, частары чидіспинчеткен ӱчӱн, марығда аралазарға пастағызын чаратпиндырлар. Че оларға ікі дее ӧменең аралазарға киліс парған.
- Олғаннар хакас писательлері паза литературазы хоостыра сурығларға орта нандырарға сидіксінгеннер, - чоохтаан культура кінінің пос тусты иртірҷең пӧлік устағч,ызы Ольга Колова. - Агенттерні таап полбин, тус чідіргеннер. Командадаң тоғыр одырчыхтағы агент, позын сизіндіріп, сығырчатхан, чаҷыннаң пулахтатчатхан, че аны кӧр таппиндырлар.
Пис орында полып, агенттернің сурығларына орта нандырған, иң пурун айланған команда марығның чиңісчізі полча. I орынны 26 № школаның «Хыйғаҷахтар» командазы холға кирген. II орын студенттернің «Батыр» командазы, III орын «Максимум» ӧме алғаннар. «Хыйғаҷахтар» пирілген чахығларны 45 минута 49 секундаа толдырыбысханнар. «Батыр» команда пip секундаа пурун айлан килген дее полза, олар пір сурыға нандыр полбиндырлар. Аның ӱчӱн баллары тӧбін пол парған.
Олғаннар мындағ марығларда аралазарға хынчалар. Компьютер ле кистінде одырбин, посха ойында араласханы хай-хай хынығ нооза. Марығ араласчыларынаң мероприятиелер иртірчеткеннерзер марығдаңар азынада искір турарға сурыныс полған. Кӧбізі, пілбин, испин халча осхас.
Автор :
Елена САГАТАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде