САЙБАПЧАЗЫҢ - НАНДЫРАРЗЫҢ
13.09.2016
Хабарлар
Тиксі Россияның чон фронтының Хакасиядағы пӧлии 8 сентябрьда «Сайбапчам ПДД - сығдырат ГИБДД!» акция иртірген. Акция Россия президенті Владимир Путиннің чахиинаң 2018 чылға чолдағы саайлар саны хызырылар ӱчӱн иртірілче. Таныхтирға кирек, пӱӱл мындағ акция пастағызын полды.
Акция араласчылары Россияның чон фронтының региондағы пӧлиинің кізілері, ГИБДД инспекторы, Хакасияның транспорт министерствозының тоғынҷылары полғаннар. Олар Ағбандағы автовокзалның автобустар паркында «Сайбапчам ПДД - сығдырат ГИБДД!» хыйғылығ наклейкаларны автобустарның соондағы кӧзенектерінзер істінең паза тастынаң чапсырғаннар.
- Нимее паза хайдағ пӧгіннең пу чӧрім иртірілчеткеннеңер Региондағы чон фронтының штаб кізізі, «Качество жизни» группаның устағҷызы Александр Минин чоохтап пирген:
- Пу акция пассажирлерні тартарынҷа чон сыныхтаан тилідеріне кӧстегліг. Наа ӱгредіг чылы пасталыбысханда паза чайғы тынағ соонаң, чон ибінзер аймах чирлердең айланчатса, чол чӧрізін хорғыс чох идерге киректелче. Таксисттернің, автобус водительлерінің чолда тудынчатханына хайығ саларға. Анзына, тізең, чол чӧрчеткен чон хайығ саларға кирек.
Россияның кӧп городтарында маршрут таксилері чол чӧрізін матап сайбапчатханы іле кӧрінче. Чол чӧрізінің правилоларын сайбап, кинетін чолның пасха полосазынҷа ойлат сыхчалар, тохтағларда тохтабин, пасхазына харығ полып, саайлар итчелер. Маршрут транспортынаң, тізең, кӧп чон тузаланча. Оларның санында пенсионерлер паза олғаннар. Чол чӧрізін сайбапчатхан водитель чонның чуртазына хорғыс ағылча нооза.
Пӱӱнгі кӱнде чолдағы сайбағны кӧрчеткен кізі аннаңар хайдағ телефонҷа сығдырадарын пілбиндеече. Акция хоостыра чапсырылчатхан наклейкаларда 23-82-83 ГИБДД-ның дежурнай пӧлиинің телефоны пазыл парған. Пассажирлер дее, чол чӧрізінің араласчылары даа сайбағ иділчеткеннеңер пу номерҷе сығдыратсалар, ГИБДД инспекторлары сайбағҷы водительні хатығ холға кирерлер.
Тиксі Россиядағы чон фронтының пасха регионнардағы пӧліктерін, пу акцияа хозылып, маршрут автобус-таксилерінің кӧзенектерінзер ГИБДД-ның телефоны, электроннай почта адрезі, такси ээзінің телефоны кӧзіділген наклейкалар чапсырарға хығырча.
Наклейканы чапсырар алнында, полиция капитаны, Хакас Республикаҷа МВД УГИБД-зының улуғ инспекторы Александр Шомполов водительнең ипти чоохтазып ал турған. Мин андар, мындағ акцияның тузазы пар полар ба тіп, сурығнаң айланғам.
- Пу акция чонға посты чолда орта тудынарға паза чол чӧрізінің правилоларын сайбабасха кӧніктірер ӱчӱн иртірілче, - чоохтаан Александр Вадимович. - Чон сайбағҷыларға хатығ хайарға кирек. Аннаңар пассажирлерні тарт чӧрчеткен маршрут автобустарына хайығ салчабыс. Сайбағны кӧр салған кізі наклейкада кӧзіділген телефон номерінҷе піске сығдыратсын. Хазна автоинспекция зының тоғынҷылары сах андох ӱндезерлер.
Хазна автоинспекциязының Хакасиядағы пӧлиинің киртініс телефонына чон 23-82-83 номерҷе сығдыратчаң. Амды ол дежурнай пӧліктің телефоны полча. Кізілер, ӧӧнін-де изірік водительні сизін салзалар, сығдыратчалар.
Минің кӧрізімнең, мындағ акцияның тузазы пар полар. Киртініс телефон номеpi автобустың істі-тастында наклейкада пазыл парған. Кирек полза, хайдағ даа туста сығдырадыбыс турарға чарир. Піс, тізең, сайбағҷыны нандырыға тартар быс паза хатығлирбыс.
Тиксі Россиядағы чон фронты ГИБДД тоғынҷыларынаң, Хакасияның транспорт министерствозынаң, республика чуртағҷыларынзар мындағ хыйғынаң айланып, хада-пірге тоғыс апарып, чол чӧрізі саайлар чох поларына кӱстерін салчалар.
Автор :
Елена САГАТАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде