ЧУРТАҒҶЫЛАР ЧААҶЬІ ГОРОДОГЫНАҢ ТАНЫСТЫЛАР
14.09.2016
Хабарлар
РОССИЯНЫҢ АРАЧЫЛАНЫС МИНИСТРІ СЕРГЕЙ ШОЙГУ 2013 ЧЫЛДА 5-ҷі АЛЫНҶА ТИМІР ЧОЛ БРИГАДАЗЫНЫҢ ТИЛІЗІН ПИКТИРДЕҢЕР ЧАРАДЫҒ АЛҒАН. ПӰӰНГІ КӰНГЕ ЧААҶЫ ГОРОДОГЫНДА КӦП НИМЕ ИДІЛ ПАРҒАН. ИЛЕЕДЕ НАА ПӰДІРІГЛЕР ТИМГЕ СЫХ ПАРҒАН, ЧЕ ХАКАСИЯ ЧУРТАҒҶЫЛАРЫНЫҢ КӦБІЗІ ЧААҶЫ ГОРОДОГЫНДАҒЫ ӦӦН ПӰДІРІГЛЕРНІ ЫРАХТЫН ДАА КӦРБЕЕН. ПУ ПОНЕДЕЛЬНИКТЕ, ТІЗЕҢ, ХАЛЫХ ТОҒЫЗЫНДАҒЫЛАРҒА, МУНИЦИПАЛИТЕТТЕРДЕГІ ПАСТЫХТАРҒА, ӦТКІН СТУДЕНТТЕРГЕ ПАЗА ХАБАРҶЫЛАРҒА ЧААҶЫ ГОРОДОГЫ ІЗИИН AC ПИРГЕН. ХАЙДАҒДЫР ОЛ, АМҒЫ ТУСХА КИЛІСТІРЕ ПӰДІРІЛЧЕТКЕН ЧААҶЫ ГОРОДОГЫ? ЭКСКУРСИЯ АРАЛАСЧЫЛАРЫНА ПУ СУРЫҒА НАНДЫРЫҒНЫ ТАБАРҒА ПОЛЫСХАННАР 5-ҷі АЛЫНҶА ТИМІР ЧОЛ БРИГАДАЗЫНЫҢ КОМАНДИРІ, ПОЛКОВНИК СЕРГЕЙ БУЛАНОВ ПАЗА ПАСХА ЧААҶЫЛАР.
КӦРІГҶӀЛЕРГЕ - ИҢ УЛУҒ ЗАЛ
Сергей Буланов аалҷыларны, экскурсия араласчыларын, удурлаан соонаң наа пӱдіріглерзер иртерге хығырған. Иң пастағызын піске культура паза тынағ кінін кӧзіткеннер. Чоохтирға кирек, аның улии 7000 квадрат метр, кӧрігҷілер залында 914 орын кӧріл парған. Мындағ улуғ залда чааҷыларға паза оларның сӧбірелеріне тынағ кӱннерінде кино паза мультфильмнер, ол санда 3 D технологиялар пастыра, кӧзітчелер. Ідӧк кінде олғаннарға чайаачы кружоктар тоғынчалар, оларға ӧнетін пӧліктер кӧріл парған, ол санда паркет поллығ теелбектер залы пар.
Аннаң пасха культура паза тынағ кінінде музей тоғынча. Анда аалҷыларға тимір чол бригадаларының тархынын чоохтаан Андрей Минин. Позының чооғында тынағдағы чааҷы тимір чол бригадазының Илбек Ада чаада араласханына, аның танығлығ хозымына улуғ хайығ айландырған. Кінде бильярд паза шахмат пӧліктері пар. Пӧліктерні кӧрчеткен аразында, экскурсия араласчылары чуртағҷыларға ізіктер хаҷан азыларын сурчатханнар. Командир чыл тоозылғанҷа азарға пӧгін тутчатханнарынаңар искірген.
ПОЛҒАН НА ЧААҶЫ САНДА
Культура паза тынағ кінінең столовайзар парғабыс. Мында пір саңай 800 кізее азыранҷаң орын кӧріл парған. Улуғ столовай ідӧк пӱӱнгі кӱнге килістіре пӱдірілген. Наа технологиялар мында даа тузаланылча. Оларның пірсі азыранарға килген полған на чааҷыны санда тутча. Чааҷы самнах паза вилка алған соонаң, чіҷең ниме аларға парча. Че оларны таллир алнында салаазын ӧнетін приборзар тутча. Салаа істерінҷе система аны таап алча. Ады-солазын, хайдағ званиеліг полчатханын паза хайдағ менюнаң азыранчатханын кӧзітче. Столовай тоғынҷызы ол искіріг хоостыра чааҷыны азырапча, Сергей Владимирович, тізең, позы ол системада парох, че ағаа меню кӧрілбеен. Аалҷыларның піреезі салааларын приборзар тутханох, оларны система кӧр таппаан. Мындағ оңдайнаң хазна ахчазы ӱзӱрлелче. Чааҷының азыранҷаң кӧңні чох полза, ол ағырсынчатса, пис час азынада позын системадаң суурча.
ИҢ НИИК ПААЛАР
Хаҷан піс «Военторг» садығ туразынзар килгебіс, ол культура паза тынағ кінінде орныхча, кізілер ниме-ноолар ал сыхханнар. Мында Россия Армиязының таңмаларынаң чазалған ниме-ноолар пулии пар. Олғаннарға Россия президентінің сомынаң чазалған футболкаларны алып аларға чарир. Че бригаданың командирі, полковник Сергей Буланов садығ туразындағы пааларға поғдархапча. Аның чооғынаң, оларның городта иң ниик паалар. Студенттер дее анзына хайығ салғаннар. Чоохтирға кирек, садығ туразында ас-тамах, сӱт, чарбалар, суғлар, ідӧк бытовой химия садылча. Чуртағҷыларға садығ туразы 23 сентябрь соонаң азылар. Мындох кафе паза парикмахерскай тоғынар.
ЧААҶЫЛАР ЧАЙҒЫЗЫН ХОККЕЙ ОЙНАПЧАЛАР
Я, 5-ҷі алынҷа тимір чол бригадазында служба иртчеткен оолларның чайғызын даа хоккей ойнаҷаң оңдай пар. Мына чааҷылар командазы тимнегліг ойынға пазох пуссар сыхтылар.
Улуғ сержант Александр Власовтың чооғынаң, чабылған пус катогы паза бассейн пары чааҷыларға чаа тимненізі соонаң тынанарға чахсы полысча. Ағаа хоза, хоккей ойнапчатханнарның марығларда аралазар оңдайы пар. Пӱӱн олар олаңай ла пуссар сыхпааннар, олар марығларға тимненчелер. Пастап республика синіндегі шайбалығ хоккейҷе марығларда аралазарлар, анаң чаа чардыхтарының командалары аразында.
Бассейн, тізең, ЦСКА-ның спорт школазының холына пирілер. Андада анда олғаннар даа соом поларлар.
ИСТІГ ОНДАЙЛАРДАҒЫ СЛУЖБА
Служба иртчеткеннерге наа общежитие пӱдірілген. Мында чааҷылар казармадағы чіли чуртабинчалар. Пӧліктер квартираларға тӧӧй. Пір чардыхта ікі узуҷаң пӧлік, полғаны ла тӧрт кізее кӧрілген, душха кірҷең, тасхын чӧрҷең пӧліктер пар. Полған на хадылда кип-азах чуғҷаң паза хурутчаң пӧлік кӧріл парған. Армия службазын иртчеткеннерге хандыра: машина-автомат, пылесос - прай пар.
ОФИЦЕРЛЕРГЕ - ЧУРТ
Пӱӱнгі кӱнде чааҷы городогында пӱдіріг тоғыстары узарадылча. Пу чағында чааҷы городогында тимге сығар: ӱс общежитие, имнег пункты, ӱгредіг корпузы паза стадион. Ідӧк чааҷы городогы хыринда офицерлерге тоғыс хадыллығ кӧп квартиралығ туралар пӱдірілче. Тиксі 360 азыра квартира кӧріл парған.
- Улуғ алғызыбыс читірчебіс Россияның арачыланыс министрі Сергей Шойгуға, хайзы чааҷы городогын нааҷылирдаңар чарадығ алған. Амды пістің хандыра чааҷы городогы пар, аннаң тиңнесчең чардых тиксі хазнада чоғыл, - таныхтаан 5-ҷі алынҷа тимір чол бригадазының командирі Сергей Буланов.
Таныхтирға кирек, чааҷы городогындағы килкім пӱдіріг, хайзы ам даа парча, ідӧк Хакасияның экономиказына паза социальнай чуртазына чахсы хозым полча. Пӱдіріглерде ӧӧнінде пістің республикада сығарылған материаллар тузаланылча. Олох туста ол улуғ нандырығлығ пӱдіріг, хайзын сыныхтағда тутча хазнабыстың арачыланыс министрі Сергей Шойгу паза республика пазы Виктор Зимин.
Чааҷы городогының аалҷылары, тізең, чаа техниказы турчатхан орыннарны кӧрген соонаң, аннаң анымҷохтасханнар. Пу чорых полғанының на чир-сууна поғдархазын, хынызын тыытхан полар сағынчам.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы