РЕСПУБЛИКАНЫҢ ИМНЕГ ТУРАЛАРЫНА - НАА МАШИНАЛАР
16.09.2016
Хабарлар
ПУ НЕДЕЛЯДА АҒБАНДА ПАСТАҒЫ МАЙ ПЛОЩАДЬТА ХАКАСИЯНЫҢ ИМНЕГ ТУРАЛАРЫНА ФЕДЕРАЛЬНАЙ ПРОГРАММАҶА ТАБЫРАХ ИМНЕГ ПОЛЫЗИИН ПИРҶЕҢ 7 МАШИНА ПАЙРАМНИ ЧИТІРІЛГЕН. НАА МАШИНАЛАР Г.Я.РЕМИШЕВСКАЯНЫҢ АДЫНАҢ РЕСПУБЛИКАНЫҢ ИМНЕГ ТУРАЗЫНА, СОРЫҒ, ХАРАТАС, АҒБАН, САЯНОГОРСК ГОРОДТАРНЫҢ ТАБЫРАХ ИМНЕГ ПОЛЫЗИИ СТАНЦИЯЛАРЫНА, ШИРА ПАЗА ТАШТЫП АЙМАХТАРЫНЫҢ ӦӦН ИМНЕГ ТУРАЛАРЫНА ПИРІЛГЕННЕР. ТАШТЫПТАҒЫ ӦӦН ИМНЕГ ТУРАЗЫНЫҢ ӦӦН ИМҶІЗІНІҢ ТОҒЫЗЫН ТОЛДЫРЧАТХАН АЛЕКСАНДР ФРИДМАН МЫНДАҒ СЫЙЫХТЫ ӰР САХТААБЫС ТЕЕН. ІДӦК ОЛ ТАБЫРАХ ИМНЕГ ПОЛЫЗИИН ПИРҶЕҢ НАА МАШИНА АЙМАХ ЧУРТАҒҶЫЛАРЫНЫҢ ХАЗИИН ПАЗА ЧУРТАЗЫН ХАЙРАЛЛИРЫНА УЛУҒ ТУЗА ПОЛА ТІП ТАНЫХТААН.
Наа машиналар клӱстерін имнег тоғынҷыларына Хазна Думазының депутады Надежда Максимова читірген. Ідӧк оларны мындағ ӧріністіг кӱннең республиканың Ӧӧркі Чӧбінің кнезі Владимир Штыгашев паза Хакасияның хазых хайраллаҷаң министрі Наталья Коган алғыстааннар.
Владимир Штыгашев пістің регионда кічіг олғаннарның паза чӱрек ағырығларынаң ағырчатхан кізілернің ӱрепчеткені хызырылып одырча тіп чоохтаан. Аны хызырарына республикабыстың устағ-пастаа кӧп кӱс салча, теен ол. Ідӧк Владимир Николаевич имнег киреенің тоғынҷыларын, матлама тоғыстары ӱчӱн, алғыстаан.
Наа табырах имнег полызии машиналары пӱӱнгі кӱннің кирексіністеріне килістіре сығарылчалар. Прайзы олар пістің хазнабыста иділгеннер. Таныхтирға кирек, Г.Я.Ремишевскаяның адынаң республиканың имнег туразына «С» класстығ «Ford» реанимобиль пирілген. Ол санитарнай авиацияа кӧріл парған. Мында прай кирек оборудование пар: дефибриллятор, электрокардиограф, ИВЛ (ӧкпелерге искусственнай вентиляция итчең) аппарады, наркоз пирҷең аппаратура паза даа пасхазы. Тӧрт табырах имнег полызии машиназы - «В» класстығ «Газель» автомобильлер. Олар республикабыстың городтарына пирілгеннер. Аймахтарзар, тізең, «В» класстығ «УАЗ» автомобильлер ызылған. Оларда, «Газельнең» тиңнестірзе, орын асхынах арах, че хомай чолларҷа олар табырах, сидіксініс чох ирт парыбысчалар. Аннаңар олар ааллардағы имнег тураларына килістіре поларлар.
Таныхтирға кирек, Хакасияның имнег тураларының автопаркы нааҷылалып ла одырча. 1ди ирткен чыл ӧрттер ӱрег ағылған аймахтарға полызығ пирҷең фондтарның хабазиинаң алты табырах имнег полызии машиназы пирілген. Ам пирілген автомобильлер пістің республикабыссар Россия правительствозының чарадии хоостыра ызылғаннар. Пӱӱл Хакасия ам даа хоза 5 машина алар тіп кӧрілче.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде