ВЕСЕННИЙДЕ - НАА ФАП
16.09.2016
Хабарлар
Ағбан пилтірі аймаандағы Весенний аалның ортызында пӱдіріл парғаннаа ФАП иң пурун харахха тасталча. Имнег учреждениезі пӱӱл часхызын пайрамни азылған. Ирткен неделяда анда Хакасия пазы Виктор Михайлович Зимин пол килген.
Иргі имнег туразы совет тузындох пӱдірілген полған. Ол наа ФАП-таң улуғ полған полза даа, че анда соох полған паза тоғынар оңдайлар чахсы полбаан. Ирткен чылда, Хакасияда улуғ ӧрттер полған соонаң, аалда наа ФАП пӱдір саларға чарадығ алылған. Орындағы фельдшер Любовь Крицкая имнег киреенде 26 чыл істен парир. Ол наа имнег туразында тоғынарға уғаа ниик тіпче.
- ФАП-та терапевт, акушер имҷілернің кабинеттері, процедуралар иртірҷең паза прививкалар турғысчаң алынҷа кабинеттер пар. Полған на специалисттің позының тоғынҷаң орны. Iдӧк полған на кабинетте ізіг паза соох суғ пар. Анзы тоғыста уғаа кирек ниме. Коллективте алты кізі істенчебіс, - ӧрінче Любовь Ивановна.
ФАП-cap Весенний аалдағы ла нимес, ідӧк Хапчал, Хамыстығ паза Хомыҷах аалларның чуртағҷылары имненерге килчелер. Тиксі 700 азыра кізее имнег полызии пирілче.
- Пір кӱнде піссер 22-ҷе кізі айланча. Пеер наа оборудованиелер алылғанда, тоғызыбыс табырах парча, имнер тӧреміл ағылчалар, чуртағҷыларға даа наа учреждениеде имненерге истіг, - чооғын узаратча имҷі.
Наа оборудование алылғанына Любовь Ивановна тың ӧрінче. Кӧзідімге, чылығ тутчатхан одеяло - уғаа тузалығ. Ағырчатхан кізіні машиналығ пасха чирзер апарчатса, одеяло кізінің ит ізиине сығарға пирбинче. Ідӧк учреждениеде тонометрлер, электроннай весы паза даа пасха нимелер парлар. Наа ФАП ибіре аймах чахайахтар ӧңненчелер. Оларны имҷілер паза медсестралар постары одыртханнар, чайғы тооза суғлап ӧскіргеннер. Амды, тізең, чахайахтар харах ӧріндірчелер!
Хайди чоохтапча Хакасияның хазых хайраллаҷаң министрі Наталья Коган, наа ФАП спонсорлар ахчазына пӱдірілген, андар имнег оборудованиелерін аларына, тізең, ахча республика бюджедінең позыдылған.
Тоғазығда ФАП-тың тоғынҷылары Хакасия пазы Виктор Зиминге, имнег учреждениезін кӧзідіп, алғыстарын читіргеннер. Ідӧк олар Виктор Михайловичтең имнег учреждениезіне табырах полызығ пирҷең машина ал пирерге сурынғаннар. Имҷілерзер, полызығ сурап, тӧрт аал чуртағҷылары айланчалар, аннаңар машина хайди даа кирек. Хакасия пазы Виктор Зимин республиканың хазых хайраллаҷаң министерствозынаң хада пу сурығны хайди даа пӧгібізерге молҷаан.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде