ТУРЫСТЫҒ КӦРІНГЕННЕР, СЫЙЫХТЫҒ АЙЛАНҒАННАР
16.09.2016
Хабарлар
Тыва Республикада ирткен регионнар аразындағы «Сибирь чылтызы» олғаннар чайаачызынҷа фестивальда «Час ханат» олған эстрада студиязының ырҷылары араласханнар.
Пу фестиваль-марығ тува чоннын, республиказы тӧстелгеннең 95 чылына паза Туваның аалҷыларны удурлаҷаң чылына чарыдылған. Хакасиядаң парған делегацияның араласчылары прайзы ибзер сыйыхтығ айланған.
«Сибирь чылтызы» фестивальда 10 - 15 частығ олғаннар араласханнар. Оларға ікі эстрада сарынын толдыр пирерге кирек полған. Пір кӧг пос тілінең полза, ікінҷізі тилекейде саблығ кӧгні толдырары полған.
Пiстің республикадаң Елизавета Юркова, Регина Тоскоракова паза Ориса Боргоякова фестивальның сценазын чазааннар. Хызыҷахтарны Тувазар Хакасия искусствозының саблығ деятельі, «Час ханат» студияның устағҷызы Игорь Боргояков паза Хакасия культуразының саблығ тоғынҷызы, ансамбльның вокалҷа репетиторы Светлана Аткнина ал чӧргеннер. Фестивальға Хызылчар крайының Сус аалынаң, Тағлығ Шориядаң, Монголиядаң олғаннар чыылысханнар. Тувадағылар, тізең, марыға часхыдаң сығара матап тимнентірлер.
- Піске фестивальдаңар азынада искірбееннер, - чоохтаан Светлана Михайловна Аткнина. - Нинҷе-де ле кӱн халғанда, хығырыбысханнар. Че пістің олғаннар мындағ мероприятиелерге, чорыхха сығарға хаҷан даа тимделер. Полған на араласчы ікі сарын толдыр пирерге кирек полған. Пiс ікінҷі сарын тилекей эстрадазынаң поларға кирек тіп пілбин халғабыс. Че пос таа сарыннарыбыснаң сыхханыбыс чахсы.
«Сибирь чылтызы» фестиваль пӧзік синде ирткен тіп таныхтапчалар устағҷылар. Амғы ахчанаң сидік туста фестивальны иртірчеткеннер аалҷыларның чолға хорадығларын, гостиница, азыранар ӱчӱн тӧлееннер, тикке экскурсиялар иртіргеннер. Мындағ хайығ полбаан полза, чолға сығарға сидік поларҷых.
Фестиваль пастағызын иртірілді, анда 18 олған араласхан. Оларның чарымы Тува делегациязынаң полған. Жюри араласчылары олғаннарның кӧглепчеткеніне хайығ салғаннар. Че ікінҷі кӧг улуғлар толдырчатхан тилекей кӧглерінең алылтыр. Олғаннарға кічіглернің сарыннарын толдырарға кирек нооза. Оӧн хайығ кӧглепчеткен устарына салылған. Кем-де джаз толдырған полза, пір тува оолағас Витас ырҷы чіли сыыхтап сарнапчатханын морсымнығ толдыр пиртір.
Хакасиядаң парған хызыҷахтар, кӧглерін теелбектернең, видео-клипнең чазап, чахсы кӧрінгеннер. Оларның сіліг кип-азахтарына морсынғаннар.
Фестиваль араласчыларын чахсы удурлааннар, пос туста экскурсияларға ал чӧргеннер. Кызылдағы республиканың чир-суғ ӱгренҷең музейінде, Ким суғ хазындағы «Азия кіні» хумартхы тас турчатхан ачыхта полғаннар. Анда чалаң атығҷы чааҷы хыстар скульптуразы хайхатхан. Тувалар, пос чонының кибірліг культуразына хайығ салып, городтың кӧрімін национальнай оңдайнаң чазапчаттырлар. Анзы харахха тасталча тіп таныхтааннар.
«Сибирьнің чылтызы» фестивальный Гран-при сыйиин Тува Республиканың 13 частығ чуртағҷызы Кыргыс Ай-кыс алған. Ағаа 21 муң салковайға ахчалығ сертификат пирілген. Хакасия делегациязының хызыҷахтары сыйыхтығ орыннар алғаннар. Ориса Боргоякова ікінҷі орыннығ дипломант полыбысхан, 5 муң салковайға ахчалығ сертификат алған. Регина Тоскоракова паза Елизавета Юркова хызыҷахтар «Сценада хубулары» номинацияның чиңісчілері полыбысханнар. Оларға 2 муңа сертификаттар пирілген. Устағҷыларына Алғыстас пічіктері читірілген. Паза пасха сыйыхтар, чазағлығ журналлар Тува чирінең ағылтырлар.
Жюри араласчылары Хакасияның олғаннары кӧглерні профессионал синінде толдырчалар тіп таныхтааннар. Анзы махтағлығ кӧзідім. «Час ханат» студиязар чӧрчеткен олғаннар таланттығлар паза кӱлӱктер, Хакасияны аймах чон аразында турыстығ кӧзітчелер. Хызыҷахтарның узы мыннаң мындар ӧзіп ле одырзын.
Автор :
Елена ЧЕЗЫБАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде