ӰГРЕНҶӀЛЕР УЛУҒ СЫЙЫХ АЛДЫЛАР
20.09.2016
Хабарлар
Ағбан пилтірі аймаандағы Райковтар аалның Н.И.Носовтың адынаң ортымах школа. Ӱгренҷілер пайрамнығ линейкаа турыбыстылар. Ирткен неделяда пу школада танығлығ кирек полған - школаа наа автобус сыйлалған. Танығлығ мероприятиеде Хакасияның пазы Виктор Зимин, аның орынҷызы Ирина Смолина, республиканың ӱгредіг паза наука министрі Галина Салата паза Ағбан пилтірі аймааның устағ-пастаа араласханнар.
Райковтардағы школада 300-ке чағын олған ӱгренче, оларның 69-зын хонҷых ааллардаң ағылчалар. Олар - Оросительнай поселоктың, Баиннер, Сӱӱрестер аалларының, Хоных паза Тигей станцияларның олғаннары. Ӱгренҷілер пастағы урокка орайлатпас ӱчӱн, школа автобузының водительі Сергей Геннадьевич Савельевке автобусты 6.00 частох гаражтаң сығарарға килісче.
- Чорыхха сығар алнында, автобусты чахсы сыныхтабысчам паза чылыдыбысчам. Иргі школа автобузында 22 ле орын полҷаң, аннаңар кӧп рейс идерге килісчең. Наа автобус 34 орыннығ. Ол сіліг паза истіг. Че иң ӧӧні - автобус чылығ полчатханы! Анзы ӱгренҷілернің хазиина иң кирек ниме! Оросительнай поселоктаң на піс 32 километр килчебіс. Хысхызын олғаннар матап соохха тоңҷаңнар! Амды пістің чорығыбыс ниик паза истіг полар! - ӧрінче Сергей Геннадьевич.
Школада водитель полып 10 чыл істен салып, Сергей Савельев олғаннарны школаа тузында, 8.30 часха, ағыл салча, 10 минута пазынаң, тізең, ӱгренҷілернің пастағы уроктары пасталча.
Райковтардағы школазар кӱннің сай автобуснаң ӱгренерге чӧрче 2-ҷі класстың ӱгренҷізі Артур Шуплецов. Ол - Оросительнай поселоктаң.
- Иртен автобусха маңнанар ӱчӱн, іҷем мині алты часта усхурча. 50 минута пазынаң автобус килче. Пастағы класстаң ала,
школаа автобуснаң чӧріп, ирте турарға кӧнік тее парғам. Иргі автобуста одырчыхтар талалых полған паза хысхызын прайзыбыс, соохха тооп, сірлесчеңміс. Амды пістің наа автобус, ол уғаа сіліг паза чылығ! - ӧрінче Артур Шуплецов.
Хайди чоохтапча Райковтардағы школаның директоры Оксана Александровна Токмова, ирткен чылдаң пасти Райковтардағы школада хонҷых ааллардаң олғаннар хозыл сыхханнар, прайзы школа автобузына сыңмаҷаң. Аннаңар хай пірее іҷе-пабаларға палаларын школазар постарына ағыларға килісчең.
- Килчеткен чылда Баиннер аалдаң палалар хозылары кӧрілче, аннаңар наа автобус піске тузында пирілген. Ідӧк иргі автобустың тоғынҷаң тузы тӱрчедең ирт парар. Закон хоостыра андағ автобустарнаң ӱгренҷілерні тарт чӧрерге чарабас, - чооғында таныхтаан Оксана Александровна.
Райковтардағы школа автобузының тоғынҷаң тузы ирт париғанда паза рейстерні хызырардаңар, пу школаа наа автобус пирерге чарадығ алылған. «Аврора» наа автобуста 34 орын кӧріл парған. Анда ГЛОНАСС навигация системазы, тахограф паза полған на орында арачылағ хуры пар. Ідӧк, олғаннарға чорых ниик полар ӱчӱн, автобуста портфельлер салҷаң ӧнетін орыннар кӧріл парған.
- Кӧп орыннығ наа автобус алылғанда, рейстернің санын хызырар оңдай пар. Че иң ӧӧні - ол чорых хорғыс чох полғаны. Ол андағ полар ӱчӱн, автобуста прай ниме иділген. Амды іҷе-пабалар палаларының ӱчӱн сағыссырабастар. Автобус 60 километрдең артых ойлатпас. Сірернің чорыхтарың хорғыс чох паза истіг ползын! - чооғында таныхтаан Виктор Михайлович Зимин.
Таныхтирға кирек, Хакасияда 78 маршрутча 100 аал-посёлоктың олғаннарын кӱннің сай школаа тарт чӧрчелер. Анда 2000 артиинаң олған чӧрче. Тӱрчедең мындағох наа автобусты Шира аймаандағы Тоғыр чулдағы школа алар. Олар Хакасияа Россия правительствозының хабазиинаң пирілче.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде