КНИГА ХЫҒЫРЗАҢ - ХЫЙҒА ПОЛАРЗЫҢ
20.09.2016
Хабарлар
Узах чорых пастағы кічіг хаалағдаң пасталча. Ідӧк кізі полары кічігде олғаннаң кӧрінче. Олғанны хайди ӱгрет салзаң, улуғ ӧс парза, андағох хылыхтығ полар. Кӧзідімге апза, кічіг паланы книгаа хынарға, хығырарға ӱгрет салзаң, ол соонаң чуртас тооза книганаң чарылыспас.
Ана андағ улуғ кирек ит парча Ағбандағы Хакас Республиканың олған библиотеказы. Пу кӱннерде олған библиотеказына 80 чыл тол парған. Библиотека тоғынҷыларын алғыстирға Хакасияның прай даа библиотекаларының паза культура учреждениелерінің кізілері кил парғаннар. Улуғ нимес, че истіг залыҷахта кізі толдыра полған. Ибіре чахайахтар паза аймах ӧңніг шарлар харах ӧріндіргеннер.
Пастап библиотека тоғынҷылары постарының тоғызынаңар хысхаҷах ойын кӧзіткеннер. Анаң чыылған чонның алнынзар алғыстас сӧзінең сыххан Хакасияның культура министрi Светлана Анатольевна Окольникова. Ол Хакас Республиканың правительство кнезі Виктор Михайлович Зиминнің паза Россиянин, Хазна Думазының депутады Надежда Сергеевна Максимованың адынаң алғыстас пічіктерін хығыр пирген. Анаң библиотекаа ӧңніг принтер сыйлаан. Олған библиотеказы позының «Страна Читалия» газетазын сығарча, аннаңар принтер уғаа кирек полған. Анаң Светлана Анатольевна библиотекада ӱр паза тӱзімніг істенчеткен тоғынҷыларны Аарластығ пічіктернең таныхтаан.
Министрнің соонда пасхалары, сығып, чылығ сӧстернең алғыстааннар паза сыйыхтар пиргеннер. Ідӧк библиотеканың тархынынаңар чоохтааннар.
Хакас Республиканың олған библиотеказы 1936 чылда тӧстелген, аның чыындызында 500 ле книга полған. Ол республиканың сағамғы Культура туразында пір ле комнатада орныххан. Анда пір ле библиотекарь тоғынған. Илбек Ада чаа тузында ол тоғызын тохтатпаан. Чаа соонда библиотека аар-пеер кӧс чӧріп, 1965 чылдаң Ағбандағы ӱгретчілер тимнеҷең училищенің общежитиезінің пастағы хадылында орных сыххан.
1992 чылда ағаа «Хакас Республиканың олған хазна библиотеказы» ат пирчелер. 2003 чылда библиотекада чир-суғ ӱгренҷең паза национальнай литература пӧлии азылған. Библиотеканаң аймах-пасха тустарда устааннар Алексей Маркович Козлов, Нина Матвеевна Галузо, Ольга Болеславовна Гальченко паза даа пасхазы. Ӱр чыллар (1972 - 2007 чылларда) библиотеканаң устаан Россия Федерациязы культуразының саблығ тоғынҷызы Светлана Петровна Надыкто, аның соонаң библиотека директоры Альбина Андреевна Чистанова полған. Амды библиотеканаң Анна Ивановна Журба тӱзімніг устап парча.
Библиотека, олғаннарға чарыдып, аймах мероприятиелер иртірче. Постарының «Страна Читалия» газетазы пар. Газета 2010 чылдаң сығара орыс паза хакас тіллерінең сыхча. Андар олғаннар постарының хабарларын пирчелер.
Библиотека, аймах марығларда аралазып, чиңістер тутча. Библиотеказар чиит хыстар тоғынарға киліп, наа сағыстарын чуртасха кирчелер. Аннаңар библиотеказар олғаннар хынып чӧрчелер, удаа киліп, ізік соотпинчалар.
Автор :
Илья ТОПОЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде