ПІРДЕЕЗІ ХАЙЫҒ ЧОХ ХАЛБАС
21.09.2016
Хабарлар
Табығ салтарларын идіп, 19 сентябрьда Россияның Хазна Думазы депутады Надежда Максимова паза "Единая Россия" партияның региондағы пӧлиинің хачызы Сергей Комаров пресс-конференцияа хабарҷыларны чығаннар. Олар иң пастағызын чуртағҷыларны ӱлгӱ партиязына паза Надежда Максимоваа пирген ӱннері ӱчӱн, киртіністері ӱчӱн алғыстааннар.
Сергей Комаров Хазна Думазынзар табығларның тиксі салтарларында тохтаан. Россияның закон сығарҷаң ӧӧн ӱлгӱ органында 450 депутат орны кӧріл парған, ол санда 225 депутат пip мандаттығ округтарынҷа табылча, халған орыннарзар депутаттар партия пічіктерінҷе табылчалар. Табығ салтарларынҷа, пір мандаттығ табығ округтарынҷа "Единая Россия" партиядаң сығарылған 200 азыра депутат чиңіс тутхан, ол санда пістің 35 № пір мандаттығ Хакас табығ округынҷа табылған Надежда Максимова. Тиксі депутат орыннарын алза, 450 орынның 300 азыра орынға "Единая Россия" партия кізілері табылғаннар.
Хакасияда "Единая Россия" партияның кізілері ідӧк республика парламентінзер ікі табығ округынҷа табылғаннар: Ағбан городта 6 № табығ округынҷа - Сергей Толстихин, Саяногорск городта 11 № табығ округынҷа - Александр Векшин. Ідӧк ӱлгӱ партиязының кізілері, орындағы табығларда аралазып, иң кӧп ӱн чыып алғаннар, ол санда Ағбан пилтірі аймаа пазына табылған Елена Егорова, Асхыс станция пазына - Сергей Энграф.
- Мин табығ участоктарынзар ӱнін пирерге килген чуртағҷыларны алғыстапчам, улам на "Единая Россияа" паза минің кандидатурам ӱчӱн ӱнін пиргеннерні, - чооғын пастаан Надежда Максимова. - Піс сын харбазығны апарғабыс, хай пірее кандидаттар чіли "кірліг" оңдайларнаң тузаланмаабыс. Табығлар алнында кӧп тоғазығлар иртірерге киліскен, хайзында чуртағҷылар аймах сурығларнаң айланғаннар. Прай айланыстарнаң паза сурыныстарнаң депутатха пирген чахығларнаң чіли тоғынарбын. Пір саңай прайзын пӧгібізерге молҷабинчам, че пірдеезі хайығ чох халбас, республиканың паза орындағы ӱлгӱлернең хада оларны пӧгербіс. Киртініс ӱчӱн - алғыс.
Сергей Комаров, пресс-конференцияны тоозып, таныхтаан:
- Піс тиктең нимес табығларға "Единая Россия" - президент партия-зы" сӧстернең сыххабыс, ол сынында андағ, аннаңар кем пістің партия ӱчӱн ӱнін пирген - ол президентке ха-басхан.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде