ӦБЕКЕЛЕРІБІСТҢ ХУМАРТХЫЛАРЫ НАНДЫРА АЙЛАНДЫЛАР
23.09.2016
Хабарлар
АҒБАНДА Л.Р.КЫЗЛАСОВТЫҢ АДЫНАҢ ХАКАС НАЦИОНАЛЫНАЙ ЧИР-СУҒ ӰГРЕНҶЕҢ МУЗЕЙДЕ 21 СЕНТЯБРЬДА МАРК ЛАЗАРЕВИЧ ПОДОЛЬСКИЙНІҢ ПАЗА ЕВГЕНИЙ ДМИТРИЕВИЧ ПАУЛЬСТЫҢ АРХЕОЛОГИЯ КОЛЛЕКЦИЯЛАРЫН ХАКАСИЯЗАР АЙЛАНДЫРАРЫНА ЧАРЫДЫЛҒАН ПРЕСС-КОНФЕРЕНЦИЯ ИРТКЕН.
АРХЕОЛОГИЯ КОЛЛЕКЦИЯЗЫНЫҢ УЛУҒ НИМЕС ЧАРДЫҒЫ ПРЕСС-КОНФЕРЕНЦИЯДА «АЙЛАНДЫРЫЛҒАН КОЛЛЕКЦИЯЛАР» КӦЗІДІГЕ СЫҒАРЫЛҒАН.
ПРЕСС-КОНФЕРЕНЦИЯДА Л.Р.КЫЗЛАСОВТЫҢ АДЫНАҢ МУЗЕЙНІҢ ДИРЕКТОРЫ АНДРЕЙ ИОСИФОВИЧ ГОТЛИБ, НАУКА ТОҒЫНҶЫЗЫ ЭДУАРД НИКОЛАЕВИЧ КИРГИНЕКОВ ПАЗА РОССИЯНЫҢ НАУКАЛАР АКАДЕМИЯЗЫНЫҢ УЛУҒ НАУКА ТОҒЫНҶЫЗЫ, ТАРХЫН НАУКАПАРЫНЫҢ КАНДИДАДЫ ИГОРЬ ПАВЛОВИЧ ЛАЗАРЕТОВ АРАЛАСХАННАР.
Пресс-конференцияны асхан Андрей Иосифович Готлиб. Ол музейнің археология фондын чыырында хайдағ кізілер улуғ тоғыс ит салғаннарынаңар, хайди фонд тӧстелгеннеңер чоохтаан.
- Мин ідӧк таныхтирҷыхпын, пӱӱл Хакас национальнай музейнің танығлығ чыл. Ағаа 85 чыл толча. Пiстiң музейнің тархыны археология коллекциялары тӧстелгенінең палғaлыстығ. Пістің чирібісте кӧп чыллар Ленинградтағы археологтар тоғынғаннар. Табылған ниме-ноолар музейзер пирілерінде олар кӧп тоғыс ит салғаннар. Алында танығлығ коллекциялар пiстiң музейзер пирілбеҷеңнер. Че амды коллекция хайдағ орында табылған, андарох айланарға киректеңер закон тоғынча. Андағ ниме-нооларны хайраллапчатхан орын музей полча, - теен Андрей Иосифович.
Ол ідӧк саблығ археологтар Е.Д.Паульстаңар паза М.Л.Подольскийдеңер чоохтаан. Саблығ археологтар 30 чылҷа Хакасиядағы кӱргеннерні хасханнар. Евгений Дмитриевич Паульс - Хакасиядаң сыххан кізі. Ол мында тӧреен, ӱгренген. Анаң, Ленинградсар чуртирға парыбысханда, пістің республиканаң сыбыра палғалыс тутхан. Евгений Дмитриевич Подольский 1965 чылдаң сығара Хызылчардағы экспедициянаң хада істезіглер иртірген. Хакас национальнай чир-суғ ӱгренҷең музейзер пирілген материаллар - пу ікі саблығ археологтың 30 чылның тоғызы.
Музейнің наука тоғынҷызы Эдуард Николаевич Киргинеков коллекция Хакасиязар хайди айландырылғанынаңар чоохтаан. Археология ниме-нооларын Санкт-Петербургтаң Ағбанзар ағыларында паза ағыларға тимнирінде Пётр Великийнің адынаң антропология музейінің наука тоғынҷызы Игорь Александрович Грачёв кӧп тоғыс ит салған. Ниме-нооларның саны нинҷе-де муңа читче паза 800 азыра килограмм пасча. Археология ниме-ноолары тагар паза окунев тустағы. Э.Н.Киргинековтың чооғынаң, прай археология ниме-ноолары таңмалалғаннар, тойдаң иділген нимелер нааҷылалғаннар.
Хакасияда саблан парған археолог Игорь Павлович Лазаретов Орыс география пірігізінең хада пӱӱл Шира аймаанда кӱргеннер хасхан. Ит кӧл-ІІ кӱргенні хасханда, окунев тузындағы 10 тас-хайа табылған. Ол тастарны Игорь Павлович Хакас национальнай музейзер пирібіскен. Тас-хайаларның чазы пістің эра алнындағы 4,5 муң чылға читче тіп таныхтаан И.П.Лазаретов. Кӧзідіге сығарылған таста пурунғы чоныбыстың ай календарьы хоосталых тіп сағынчалар археологтар. Анда пуға хоостал парғаны чахсы кӧрінче.
- Тас-хайадағы хоостар хайхастығлар. Піс пу тастарны Хакас национальнай музейге пирчебіс, хайда олар постарына турыстығ орын табарлар. Пу тоғысты піс тохтатпинчабыс. Килер чыл да узарадарбыс. Санкт-Петербургта Хакасиядаңар кӧп материал пар. Ол санда Уйбат суғда табылған археология коллекциязы - хола тустағы уғаа хынығ хумартхылар. Амды піс ол ниме-нооларны Хакас национальнай музейге пирерінҷе тоғыс апарчабыс, -теен Игорь Павлович.
Амғы туста Л.Р.Кызласовтың адынаң Хакас национальнай чир-суғ ӱгренҷең музейде окунев тузындағы иң улуғ археология коллекциязы хайраллалча. Фондтың экспонаттарының кӧбізі - ол чазы экспедицияларының салтары.
Пӱӱнгі кӱнде, музей паза культура кіні пӱдіріл парғанда, Хакасиязар археология коллекциязын айландырар оңдай пол килген. Республиканың ис-пайы наа кӧзідіг залларында турыстығ орын табар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде