ТУВА ЧОННЫҢ «АЛТЫН СОҒАННАРЫ»
23.09.2016
Хабарлар
Ағбанда пу неделяда хайхастығ концерт ирткен. Аны Туваның «Саяны» сарыннар паза теелбектер ансамбльы кӧзіткен. Саблығ ӧменің чайаачызына Хакасияның чуртағҷылары хынадырлар, аннаңар филармонияның улуғ залында пос орын чох полған.
Хакасиязар ансамбльның артисттері постарының иң артых концерт программазынаң килгеннер. «Сағыстарның алтын соғаннары» адалчатхан программа Тува Россиянаң палғалыс тудып пастаанынаң 100 чылына чарыдылған, аны хонҷых чон 2014 чылда таныхтаан. Артисттер теелбектер паза сарыннар пастыра тува чонның пай тархынынаң таныстырарға пӧгінгеннер.
Пастап кӧрігҷілернің алнында скиф, пурунғы тӱрктернің, Чингисханның тустары ирткеннер. Концерттің ікінҷі чардығында артисттер тува чонның 18 вектегі, амғы тустағы тархынына чарыдылған чайаачы тоғыстарын кӧзіткеннер.
Чонның тархынын теелбек тілінең чоохтап пирерге сидік полған, неке. Че полған на тустаңар хореографтар килістіре омалар паза теелбектер чайааннар. Пос кӧңніліг скифтерні теелбек пастыра пір оңдайнаң кӧзіткеннер. Пурунғы тӱрктернің омаларына, тізең, пӱӱр теерлерін чабынып хубулғаннар. Чингисханны тувалар улуғлапчаттырлар, аның омазын балеттің солизі Омак Сат чайаан. Нанҷылары аны пӧзік кӧдірібіскенде, кӧрігҷілер постарының алнында саблығ ханны танып салғаннар.
«Саяны» ансамбльның чайаачылары номерлерні тува чонның кибірлеріне тӧстеніп турғысчалар, аннаңар теелбектерде акробатика элементтері кӧп полбаан. Че артисттер оларны пӧзік синде толдырчалар. Тиктең нимес полған на номер соонда кӧрігҷілер, «Браво» хысхырып, матап айа сапханнар.
Таныхтирға кирек, полған на номерде «Саяны» ансамбльның оол-хыстары наа кип-азахтарнаң чазанғаннар. Андағ оңдайнаң артисттер постарының чайаачы устарын на нимес, олар ідӧк тува дизайнерлерінің тӱзімніг тоғыстарын кӧзіткеннер.
Концерт программазының пастағы чардығы ӧӧнінде теелбектердең пӱткен полза, ікінҷі пӧлікте постарының чайаачыларынаң ырҷылар ӧріндіргеннер. Кӧрігҷілер тува чонның сарыннарын, саблығ хайларын хынып истіп алғаннар. Прай кӧглерні «Саяны» ансамбльдағы тува чонның кӧг тиріглерінің оркестрі толдырған.
«Саяны» ансамбльның артисттері Ағбанның кӧрігҷілерін аптааннар. Концерт тоозылғанда, кізілер, турып алып, айа сапханнар, саблығ ӧмее чахайахтар читіргеннер.
Ағбанда концерт кӧзіткен соонда, артисттер Иркутсксар чол тутханнар, анаң олар «Сағыстарның алтын соғаннары» программаны Пӱрӱт чирінің чуртағҷыларына кӧзідерлер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде