МУКЛАЙНЫҢ ІЗЕСТІГ ЧИҢІЗІ
28.09.2016
Хабарлар
ПУ НААДА ХАКАСИЯНЫҢ КУЛЬТУРА МИНИСТЕРСТВОЗЫНДА ПРЕСС-КОНФЕРЕНЦИЯ ИРТКЕН. ОЛ «ЧИТІГЕН» ДРАМА ТЕАТРЫНЫҢ ЧИҢІЗІНЕ ЧАРЫДЫЛҒАН. БУРЯТИЯДА ИРТКЕН «АЛТАН СЭРГЭ» ЧОННАР АРАЗЫНДАҒЫ ФЕСТИВАЛЬДА ХАКАС ЧАЙААЧЫЛАРЫ «РЕЖИССЕРНЫҢ ИҢ АРТЫХ ТОҒЫЗЫ» ПАЗА «ИҢ АРТЫХ ИР КІЗІНІҢ РОЛЬЫ» НОМИНАЦИЯЛАРДА УТЫП АЛҒАННАР.
ХАБАРҶЫЛАРНАҢ ХАДА «ЧИТІГЕН» ТЕАТРНЫҢ ДИРЕКТОРЫ ВИТАЛИЙ КАНЗЫЧАКОВ ПАЗА АРТИСТ АЛЕКСЕЙ САГАТАЕВ ТОҒАСХАННАР. ІДӦК ПРЕСС-КОНФЕРЕНЦИЯНЫҢ ТОҒЫЗЫНДА КУЛЬТУРА МИНИСТРІ СВЕТЛАНА ОКОЛЬНИКОВА ПАЗА КУЛЬТУРА МИНИСТЕРСТВОЗЫНЫҢ АМҒЫ ИСКУССТВО ПӦЛИИНІҢ УСТАҒҶЫЗЫ ВАЛЕНТИНА ЛЕБЕДЕВА АРАЛАСХАННАР.
ВИТАЛИЙ КАНЗЫЧАКОВТЫҢ ТАНИИНАҢ, «АЛТАН СЭРГЭ» - ОЛ НАЦИОНАЛЬНАЙ ТЕАТРЛАРНЫҢ ФЕСТИВАЛЬЫ. ПӰӰЛ ОЛ ӰЗІНҶІ ХАТИ ИРТКЕН. АНЫҢ ТОҒЫЗЫНДА 6 НАЦИОНАЛЬНАЙ ТЕАТР АРАЛАСХАН, ОЛАРНЫҢ САНЫНДА «ЧИТІГЕН» ПАЗА А.М.ТОПАНОВТЫҢ АДЫНАҢ ХАКАС ДРАМА ТЕАТРЛАРЫ. ПОСТАРЫНЫҢ КӰСТЕРІНЕҢІДӦК БУРЯТИЯНЫҢ, БАШКИРИЯНЫҢ, ЭСТОНИЯНЫҢ, МОНГОЛИЯНЫҢ, ХЫДАТТЫҢ ТЕАТРЛАРЫ СЫНАСХАННАР.
Фестивальға читігендегілер «Алҷаах парған Муклай» ойынны апарғаннар. Театрның директоры Виталий Николаевич чоохтаан: «Спектакль улуғ темаа - гражданскай чааға - чарыдылған. Аны якут режиссеры Сергей Потапов саблығ писатель Платон Ойунскийнің чооғы пастыра турғысхан. Сценарийні Сергей Потапов позы пасхан, хакас тіліне аны Чайаачылар туразының устағҷызы Александр Котожеков тілбестеен. Прай матырларға піс хакас аттарын пиргебіс. Ойынның премьеразы 2015 чылда 5 февральда ирткен».
Пастап Муклайның рольын артист Сергей Чепсараков ойнаптыр, че ирткен чылда чиит кізі Санкт-Петербургсар Россияның сцена искусствозының хазна институдынзар ӱгренерге парыбысхан. Аның орнына ӧӧн рольны толдырарға Алексей Сагатаев турғызылған. Алексей таныхтаан: «Сергей Чепсараков - таланттығ артист, алҷаах парған кізіні ол уғаа киртіністіг ойнаҷаң. Аннаңар пастағы туста мин ӧӧн матырның рольын ол чіли толдырарға кӱстенҷеңмін. Че ағырин-кӧӧлҷе Муклайны пос оңдайынҷа ойнап сыххам. Кирек чӧптернең ідӧк режиссер Сергей Потапов полыс пирген. Ол пӱӱл хысхызын Хакас драма театрында «Инишмаан олтырыхтың кинегі» ойын турғысханда, мин аннаң тоғазарға ӧнетін чӧргем. Сергей Станиславович минің ойнапчатханымны кӧріп алған, Муклайның рольын толдыр поларзың теен».
«Алҷаах парған Муклай» ойын фестивальның жюри кізілерін аптаан. Жюринің кнезі саблығ критик Татьяна Тихоновец, ӱзӱріг парчатханда, таныхтаан: «Читіген» театрны паза режиссер Сергей Потаповты критиктер чахсы таныпчалар. Хада-пірге тоғынып, олар хынығ ойын турғыс салғаннар.
Спектакльда реквизиттер саны асхынах: хайдағ-да сӱбӱректер, харчағастар, кӧріндес. Че андағ олаңай ниме-ноолар ойынның ӧӧн сағызын чарыт пирерге полысча. Алынҷа Алексей Сагатаевтің тоғызын таныхтирға кирек. Алҷаах парған кізіні ойнирға сидік, полған на артист пу рольны толдыр полбас. Алексей Сагатаев, тізең, Муклайны чалтырама ойнабысхан. Ағаа пастағы минутадаң сығара киртінчезің».
Моол чирінең килген Батсайхан Дашдондогой «Читіген» театрның ойынын пастағызын на кӧртір. Критик хакас чайаачыларының тоғызын пӧзік паалаан. Аның кӧңніне ідӧк спектакльның афишазы кіртір. Афишаны театрның видеооператоры паза сомҷызы Антон Литвиненко тимнептір.
Хакасияның культура министрі Светлана Окольникова таныхтаан: «Хакас театрның ойыннарын пӧзік паалапчатханы ӧріністіг. Артисттер постарының чайаачыларын на кӧзітпинчелер, олар пістің республиканы ырах сабландырчалар. Ізенчебіс, «Читіген» театр ӧмезі мыннаң мындар тӱзімніг тоғынар, чир-суғҷыларын наа ойыннарнаң ӧріндірер».
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде