ЧОРЫХ САЛТАРЛАРЫ ПАЗА ХЫСХЫЗЫНА ТИМНЕНІС
28.09.2016
Хабарлар
Киҷее Хакасияның пазы Виктор Зимин правительство чыылиин иртірген. Чыылығ Москвазар тоғыс чорығының салтарларына, хысхы тусха тимненіске паза аал хонииның кӱскӱ тоғыстарына чарыдыпған.
Чыылығ тоғызын пастир алнында регион устағҷызы ирткен табығларның салтарларына теелген. Виктор Зимин Хакасияның табығҷыларына пазох алғызын читірген.
- Хакасияның чуртағҷылары Хазна Думазының депутадына Надежда Сергеевна Максимованы таап алғаннар паза «Единая Россия» партияа хабазығ пиргеннер. Ол оңдайнаң Хакасия Россия президентінің политикадағы сағыс-кӧрізінең чарасчатханын кӧзіткен, - таныхтаан Хакасияның пазы.
Республикада табығлар иптіг паза сын оңдайнаң ирткен ӱчӱн, федеральнай кін алғыс сӧстерін читірген тіп искірген Виктор Михайлович, Олох туста регион устағҷызы табығлар тузында ілезіне сығысхан сидік сурығларны хайығ чох артызарға чарабас тіп таныхтаан. Ол сидіксіністерні пӧкчең оңдайларны тілирге пӧгін турғысхан. Чыылығны Хакасияның пазы Москвазар чорыхтың салтарларынаң пастаан.
- Піске 5 миллиард салковайға облигация займын пирҷең сурығҷа чӧптезіг иділген, - искірген Виктор Зимин.
Амды Хакасияның финанстар министерствозына, Ӧӧркі Чӧпнең пу сурығҷа пірге тоғынып, аны читіре пӧгібізерге кирек. Республика устағҷызы чооғынаң, облигация займы хысхаҷах тусха алылған паза аарлыға турчатхан кредиттерні ӱр тусха кӧрілген, ниик арах турчатхан кредиттерге алыстырыбызарға оңдай пирер. Іди республиканың хазна алымын тӧлирінде ӱзӱрлеп аларбыс тіп таныхтаан регион устағҷызы. Ағаа хоза, Москвада апарылған чӧптезіглернің салтарларынҷа Хакасияа ахчалығ полызығ пирілер. Хайдағ полар аның сині федеральнай комиссия октябрьдағы чыылиинда кӧрер осхас.
- Ідӧк піс минфинде Россия правительствозының чахығларын чуртасха кирер оңдайларны ӱзӱргебіс. Аны хоостыра федеральнай кӧстегліг программаларға республика амды 5 %-ке теере ле ахча позыт турар. Амғы тустағы 30 % чіли нимес, - таныхтаан Хакасияның пазы.
Аннаңар прай министерстволарға постың программаларын хати кӧрібізерге чахығ пирілген. Пу оңдайнаң регион 1 миллиардча салковай ӱзӱрлеп алар тіп кӧрілче.
Пу чыылығда ідӧк Тӧӧ пазына хайығ салылған. Виктор Зимин тӱрчедең андар прай Россиядаң саналығ чылҷаң спортсменнер килерін таныхтаан. Хакасияны турыстығ кӧзідер ӱчӱн, Хакасияның пазы Тӧӧ пазында хайди даа аал хонии рыногын пӱдірерге пӧгін турғысхан.
- Культура кӧрімніг ползын, чол хыриндағы садығ чіли полбазын, - таныхтаан ол. Хысхызына тимненіс хайди парчатханынаңар Хакасияның пӱдіріг паза ЖКХ министрі Сергей Можаров искірген. Аның чооғынаң, прай тыхтағ тоғыстары тоозыл таа парир, хайзы аал-городтарда чылығ пиріл сыхтыр. Кӧзідімге, Орджоникидзе аймаанда чылығ пирері 6 - 20 сентябрьда пасталтыр. Хысхы тусха тимненіс алынҷа хайығда тудылча тіп таныхтаан.
Хакасия пазының орынҷызы Иван Вагнер аал хонии тоғыстарынаңар искірген. Пӱӱнгі кӱнге ас кизер паза малға азых пилетир тоғыстар тоозыл таа парир. От пилетир тоғыс тӱзімніг парчаттыр. Пӱӱл от, 2014 чылнаң тиңнестірзе, 17 муң тоннаа кӧп пилетелтір, 2015 чылнаң тиңнестірзе - 40 муң тоннаа кӧп. Олох туста Иван Вагнер тоңастығларның сығызы ирткен чылдағы синдӧк халғанын таныхтаан. Хакасияның пазы аны часхарған:
- Пістің ӧӧн пӧгін - ит. Піс ас ӧскірчеткен регион нимеспіс. Мал азии ла читкіҷе ползын. Мыннаң правительство чыылии тоозылған.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде