ОЛҒАННАР ХАКАС ТІЛІН ӰГРЕНЕРГЕ КӰСТЕНЧЕЛЕР
05.10.2016
Хабарлар
Пӱӱн Россияда ӱгретчілер постарының профессиональней ӱлӱкӱнін таныхтапчапар. Пу кӱнні 40 чыл изере пайрамнап, ӱлӱкӱннең алғыстастар алча Валентина Степановна Казыгашева. Ол Ағбан пилтірі аймааның Райковтар аалындағы школада пасталығ класстар ӱгретчізі полча. Ідӧк улуғ опыттығ ӱгретчі 2-ҷі паза 3-ҷі класстарда олғаннарға хакас тіпі факультативін апарча. Олпу школада чалғыс ӱгретчі, хайзы хакас тілін хайраллир тоғысты апарча. Аннаңар анда хакас тілі тилізі ӱчӱн Валентина Степановна нандырығлығ полча тиирге чарир.
Валентина Степановна Райковтардағы школада 1985 чылдаң істен парир. Алында школада хакас тілі тӧреміл апарылҷаң, че соонаң иртірілбин сыххан.
- Мының алнында хакас тілін неделяда ікілер час апарҷаңмын, анаң тіл урогы чох иділген. Амды хакас тілін хайраллирына паза тилідеріне улуғ хайығ сал сыхтылар. Факультатив школада ікінҷі чылы апарылча. Пір классха отыс минута пирілче, - чоохтапча Валентина Степановна.
Райковтар аалынзар Валентина Степановна Асхыс аймаандағы Кызлас аалдаң кӧскен. Кызлас аның тӧреен паза ӧскен чирі полча. Райковтар аалындағы ӱгредіг организациязында Валентина Степановна 30-ча чыл, тиксі ӱгредіг киреенде 40-ча чыл істен салған. Ағбан пилтірі аймаанзар тоғынарға килер алнында, чиит ӱгретчі Асхыс аймаандағы Шора станцияның 8 класстығ школазында, ідӧк тӧреен аалындағы школада істенген.
Хайди чоохтапча ӱгретчі, мының алнында Райковтар аалында хакас сӧбірелер кӧп полған, амды, тізең, асхынах.
- Райковтар, Бажендаевтер, Сагалаковтар сӧбірелері халғаннар. Аалда кресен-фермер хоныхтары кӧп, садығ тураларын тутчатхан паза пасха даа пос киреенең айғасчатхан сӧбірелер пар, - тіпче ӱгретчі.
Райковтар - кӧп нациялығ аал. Анда, орыстардаң паза хакастардаң пасха, ідӧк немец, мордва, чуваш, азербайджан, хырғыс сӧбірелер чуртапчалар. Ӱгретчінің чооғынаң, пасталығ класстар ӱгренҷілері хакас тілі факультативіне чӧрчелер.
- Мының алнында пос тіліне хакас ла олғаннарны ӱгретчеңмін, амды, тізең, тілні прай олған ӱгренерге кӱстенчеткенде, класстардағы прай паланы хакас тіліне ӱгретчем, - ӧрінче Валентина Степановна.
Факультативте ӱгренҷілернің хайиин тартып алар ӱчӱн, улуғ опыттығ ӱгретчі аймах оңдайлар таапча. Амғы туста ӱгредігде наа технологияларнаң ӧткін тузаланчалар, аннаңар школада тирең пілістіг ӱгретчінің тоғызы улам ниик паза хынығ парча.
- Мультимедиа пастыра аң-хустардаңар, аймах ӧзімнердеңер видеофильм кӧзітчем алай ба тимде схемаларнаң тузаланчам. Аны азынада тимнирге кирек чоғыл. Олғаннарға даа андағ уроктар хынығ пілдірче, пілістері алғыпча. Амғы ӱгренҷілер - хыйғаҷахтар, чапчаңнар, - чооғында таныхтаан ӱгретчі Валентина Казыгашева.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде