ХЫНЫҒ, ЧЕ МАҢ ЧОХ ТУС ПОЛҒАН
05.10.2016
Хабарлар
Ӱгретчілер кӱні. Пу тоғыста тоғынған кізее ол уғаа аарлығ ӱлӱкӱн. Сағысха кірче ирткен тус, ол хайдар сидік, че хынығ полған. 1950-1980 чылларда ӱгретчілер уғаа маң чохтанып тоғынҷаңнар, тынанарға даа тус чох полған. Уроктар соонда хомай ӱгренчеткен палаларнаң хоза тоғынҷаңмыс.
Понедельник сай иирде политзанятие, профсоюз, партийнай чыылығлар полҷаң, иирде ойыннарға тимненҷеңміс. Олох туста пілістерібісті кӧдірҷеңміс. Хынығ, уғаа маң чох тус полған. Иирде, ибзер айланза, уроктарға тимненерге кирек, тетрадьтар сыныхтирға. Че ноға-да пір дее нимее хомзынмаҷаңмыс, ачых-чарых кӧңніліг чӧрҷеңміс. Анаң радиоҷа лекциялар хығырҷаңмыс. Олох туста Асхыстағы ортымах школада удаа семинарлар иртчең. Пеер аймахтың школаларынаң ӱгретчілер удаа килҷеңнер, оларға азых уроктар иртірҷеңміс. Ам сағынза, хайди прай ниме идерге маңнанҷаңмыс. Ибде палаларыбысты ӧскіргебіс, ідӧк маллар тутчаңмыс.
Мин прай даа чуртазымны Асхыстағы школада істен салғам. Уғаа ынағ ӧме полған ол туста, хаҷан даа хырыста-быс чох полҷаң. Ӱлӱкӱннерні хадох иртірҷеңміс. Улуғ ӱлӱкӱннерде Культура туразында ойын кӧзітчеңміс. Ол туста, хайди-да киліс парған, кӧбізі чииттер тоғынҷаңмыс. Хай піреезін адағлап пирим. Ольга Григорьевна Киргинекова уғаа хормачы кізі полған. Фадей Семёнович Калинин - школа директоры, уғаа маңат кізі. Нина Николаевна Калинина - уғаа пілістіг ӱгретчі. Вера Максимовна Ромашова хатығ хылыхтығ, че кізее уғаа паарсах ӱгретчі полған, химия уроктарын апарҷаң. Мария Ивановна Орешкова палаларны математикаа ӱгретчең. Мария Михайловна Угужакова история уроктарын апарҷаң, аның ирі Василий Архипович Угужаков ол туста Асхыста КПСС райкомының пастағы хачызы полған. Чииттердең Галина Михайловна Чебодаева, Нина Михайловна Тормозакова, Клавдия Фёдоровна Анжиганова, Галина Яковлевна Доброва істеніс чолын пастааннар. Прайзы хайда-хайдар кӱстеніп тоғынҷаң.
Асхыстағы школада ам даа ынағ ӧме тоғынча. 40 чыл азыра анда істен парир Эльвира Карловна Соломатина, ол илееде чыл завуч полча. Ам анда чиит директор Евгений Николаевич Арыштаев тоғынча.
Ідӧк кӱстенҷік, тоғынҷыларға маңат хайча. Кӧп чыллар химия уроктарын апарча Оксана Терентьевна Барашкова. Пістің хыйға, кӱстенҷік тӧл тоғынча.
Прайзын Ӱгретчілер кӱнінең алғыстапчам. Хазых, часкалығ полыңар! Хыйға, кӱстенҷік ӱгренҷілер тоғассыннар сірернің тоғыс чолыңарда!
Автор :
Зоя КОНГАРОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде