САҒЫСХА ТӰЗІРЧЕТКЕН «ДЯДЯ ВАНЯ»
11.10.2016
Хабарлар
Пy неделяда Хакасиядағы театрға хынчатхан улустың сағынған сағызы толған: республикада Евгений Вахтанговтың адынаң саблығ хазна театрының гастрольлары пастағызын на ирткеннер.
САБЛЫҒ СПЕКТАКЛЬ
Таныхтирға кирек, театр республиказар «Улуғ гастрольлар-2016» федеральнай программа хоостыра килген. Программаның ӧӧн пӧгіні Россияның чуртағҷыларын иң артых спектакльларнаң таныстырары полча. «Улуғ гастрольлар» Хакасияда республика правительствозының паза культура министерствозының кӱстенізінең ікінҷі хати иртірілчелер. 2014 чылда постарының чайаачыларынаң Владимир Маяковскийнің адынаң театрның артисттері ӧріндіргеннер. Олар пістің чуртағҷыларға «Кант», «Август. Графство Осейдж», «Женитьба» саблығ ойыннарны кӧзіткеннер.
Евгений Вахтанговтың адынаң театрның ӧмезі Ағбанзар ідӧк иң артых ойыннарын ағылған: «Дядя Ваня» паза «Посвящение Еве». Гастрольларны артисттер «Дядя Ваня» спектакльнаң асханнар. Писатель Антон Чеховтың пьесазы хоостыра ойынны театрның хоос устағҷызы, режиссер Римас Туминас читі чыл мының алнында турғысхан. Спектакль Россияның театрларына пирілчеткен ӧӧн сыйыхтарынаң таныхталған: «Алтын маска», «Хрустальный Турандот» паза «Гвоздь сезона». Анзы тиктен, нимес, «Дядя Ваняда» прай даа рольларны саблығ артисттер толдырчалар. Сергей Маковецкийні, Людмила Максакованы, Владимир Симоновты, Владимир Вдовиченковты, Анна Дубровскаяны кӧрігҷілер чахсы таныпчалар. Олар аймах фильмнерде паза сериалларда удаа ойнапчалар.
«Дядя Ваня» пьесаны прайзы даа хығырған, ойынны, тізең, піреезі сценада даа кӧрген полар, Антон Чеховтың чайаачы тоғызын режиссёрлар турғызарға хынадырлар. Че Римас Туминастын, спектакльы пасхалалча. Саблығ писательнің пьесаларында матырлар чей ісчелер паза гитаранаң ойнапчалар. Мында андағ ниме чоғыл. Ойын кӧріп алған соонда, ӧӧн матырларны даа пасха оңдайнаң паалапчазың. Кӱстенҷік, туған-чағыннарынаңар сағыссырапчатхан Иван Петрович Войницкий, алай дядя Ваня, сынында оң матыр полбиндыр. Сынап ол іҷезінің, Соня чеенінің соонҷа кӧрче, Войницкийнің чистезі профессор Серебряков аның кӱстенізінең пір дее хызылбин чуртапча. Сергей Маковецкий ойнапчатхан матырға пастап айапчазың, че олох туста пілдістіг - Иван Петрович мындағ чуртасты позы таллап алған. Позының чайаачы узын тилідер орнына, ол хыйға нимес профессорға 25 чыл чоо тоғынған. Ноға? Піди ол кӧрігҷіні сағысха тӱзірче.
Алай алып аларбыс профессорның чиит ипчізі Елена Андреевнаны. Ол Петербургта тӧреен, консерватория тоосхан, ағаа 27 ле час, че чиит ипчінің чуртазы тузазы чох иртче. Елена Андреевна позын таап аларға кӱстенминче, улуғ частығ профессорнаң хада хыныс чох чуртапча. Пу рольны Анна Дубровская чалтырама толдырча. Чайаачы ус сценазар сыххандох, пілдістіг полған, прайзы чархандыр парирлар пу абахай ипчіні. Ағаа ээрістіг, ол чуртазында пір дее ниме сахтабинча. Сынап таа нинҷе-де чыл пазынаң Елена Андреевна инейге айлан парар, анаң, Иван Петрович Войницкий чіли, чиит тузым нимее хорат салғам тіп хомзын чӧрер.
Ідӧк часка чох имҷі Михаил Львович Астров чуртапча. Ол кӱннің сай тоғынча, кізілерні чахсы имнепче, чир-чайааннаңар сағыссырапча. Че уездтегі чуртаста Астров, саста чіли, пат парған, іскее кір парғанын даа сизінминче. Имҷі Михаил Львович Астровтың омазын Владимир Вдовиченков чайаан. Ол кӧбізіне «Бригада» сериал паза «Бумер» фильм пастыра чахсы таныс. Ідӧк кӧрігҷілернің сағызында «Левиафан» фильм халған полар. Владимир Владимировичке аймах бандиттерні, офицерлерні удаа ойнирға килісче, мындағ омаларны толдырчатханына кізілер кӧнік тее парғаннар, аннаңар Чеховтың матырында кӧрігҷілер аны таныбиндырлар.
Алынҷа артист Владимир Симоновты таныхтирға кирек. Владимир Александрович профессор Серебряковтың рольын чалтырама толдырыбысхан. Аның матыры, пір саринаң, хыйға нимес кізі, че, іди дее полза, абахай Елена Андреевна ағаа ирге парыбысхан, хазинезі Мария Васильевна Серебряковтың полған на сӧзіне киртінче, Войницкий чистезіне мыннаң мындар ахча ызарға тимде. Піди чуртирға профессор Серебряковтың сағызы читче.
«Дядя Ваня» пьесаны Антон Павлович Чехов 1896 чылда чайап салған. 120 чыл мының алнында пазылған тоғысты амғы кӧрігҷілерге читір пирерге андағ ла оой нимес. Че Римас Владимирович Туминас турғысхан ойын кізілернің кӧңнілеріне чағын. Ол кӧрігҷілерні сағысха тӱзірче. «Дядя Ваняны» кӧріп алған соонда, син позыңның чуртазыңны пасха иде паалапчазың. Тус табырах иртче, аннаңар кізі, ирткен чылларға хомзынмин, таңдағы кӱнзер ізеніснең кӧрерге кирек.
Кӧрігҷілердеңер чоохтаза, Хакасияда театрға хынчатхан улус чуртапчаттыр. Саблығ спектакльны паза хынчатхан артисттернi кӧріп аларға кізілер Ағбаннаң на нимес, пасха город-аймахтардаң килгеннер, аннаңар театрда пос орын чох полған. Кӧрігҷілер чайаачы устарны чылығ удурлааннар, оларға матап айа сапханнар.
ПРЕСС-КОНФЕРЕНЦИЯ
Евгений Вахтанговтың адынаң хазна театрының гастрольлары Хакасияда 3 октябрьда пасталғаннар, ікінҷі кӱнінде «Дядя Ваня» спектакльда ойнаан артисттер хабарҷыларнаң тоғасханнар. Пресс-конференцияда ідӧк Хакасияның культура министрi Светлана Окольникова, Россияның гастрольлар тоғызына хабасчатхан федеральнай кіннің ӧӧн директорының орынҷызы Владимир Черкасов паза пу кіннің кураторы Наталья Афанасьева араласханнар.
Пастап сӧс Светлана Окольникова алған. Ол Хакасияның пазы Виктор Зиминнің адынаң гастрольлар тимнепчеткен федеральнай кінге паза Россияның культура министерствозына улуғ алғызын читірген. Светлана Анатольевна таныхтаан: «Евгений Вахтанговтын, адынан, хазна театры піссер гастрольларнаң килерін хаҷанох сахтаабыс, амды пістің сағынған сағыстарыбыс толды». Анаң сӧс куратор Наталья Афанасьеваа пирілген. Ол «Улуғ гастрольлар-2016» федеральнай программадаңар хысхаҷахти чоохтап пирген. Евгений Вахтанговтын адынаң хазна театры пу проектте ӧткін араласчаттыр. Артисттер гастрольларнаң хайдағ ла городтарда полбинчалар.
Чайаачы устарның чооғынаң, олар Хакасияда пастағызын на полғаннар. Артисттер республиканың музей-культура кінін, Хакасияның чазыларын кӧріп аларға маңнанғаннар. Республиканың музей-культура кінінде орныхчатхан обаалар аарлығ аалҷыларны аптааннар.
Евгений Вахтанговтың адынаң хазна театрының гастрольлары Хакасияда пӧзік синде ирткеннер, ізенчебіс, саблығ артисттер республиканың чуртағҷыларын хаҷан полза пазох чайаачыларынаң ӧріндірерлер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде