УЛУҒ СӦБІРЕЕ - УЛУҒ ХАБАЗЫҒ
12.10.2016
Хабарлар
КИҶЕЕ ХАКАСИЯНЫҢ ПАЗЫ ВИКТОР ЗИМИН РЕСПУБЛИКАНЫҢ КӦП ПАЛАЛЫҒ СӦБІРЕЛЕРІНЕ «ГАЗЕЛЬ БИЗНЕС» МИКРОАВТОБУС КЛӰСТЕРІН ЧИТІРДІ. ААРЛЫҒ СЫЙЫХТАРНЫ АЛАРҒА ТЕЕС ЧИТКЕН ЧИТІ СӦБІРЕЕ, ОЛ САНДА АСХЫС АЙМААНДАҒЫ ООТ ПИЛТІРІ ААЛНЫҢ СУДОЧАКОВТАР СӦБІРЕЗІНЕ. ВИКТОР ГЕРМАНОВИЧНЕҢ ЛУИЗА АНАТОЛЬЕВНА ПӰӰНГІ КӰНДЕ ЧАЗЫ ЧИТКЕЛЕК СИГІС ПАЛА ӦСКІРЧЕЛЕР, ОЛ САНДА ӦСКІРЕРГЕ АЛҒАН ПІР ПАЛА.
МИКРОАВТОБУСТЫ АЛАРҒА СУДОЧАКОВТАР ИРЕПЧІ ӰС ПАЛАЗЫН АҒЫЛҒАННАР: СЛАВАНЫ, САШАНЫ ПАЗА ТОЛЯНЫ. ООЛАХТАР ДАА, ІҶЕ-ПАБА ДАА МИКРОАВТОБУС АЛҒАННАРЫНА ТЫҢ ӦРІНГЕННЕР. ЧАСКАЛЫҒ СУДОЧАКОВТАР СӦБІРЕЗІ ХАКАСИЯНЫҢ ӰЛГӰЛЕРІ КӦП ПАЛАЛЫҒ СӦБІРЕЛЕРГЕ МИКРОАВТОБУС ЧИТІРЧЕТКЕННЕРІ ПАЗА ПАСХА ХАБАЗЫҒ ПИРЧЕТКЕННЕРІ ӰЧӰН АЛЫНҶА АЛҒЫС СӦСТЕРІН ЧИТІРЧЕ.
Хакасияның кӧп палалығ сӧбірелеріне паза ікі аймахтың чонға социальнай хабазығ пирҷең устаныстарына микроавтобустарны читірерінҷе пайрамнығ мероприятие Ағбанда Пастағы май ачығында ирткен. Изере турчатхан наа микроавтобустардаң тоғыра пастыхтар паза аалҷылар турғаннар. Оларның аразында палаҷахтар полғаннар. Прайзы пайрамнығ чардыхты, клӱстер читірілерін, чидікпин сағаан.
Пастап аалҷыларны удурлаан Хакасияның істеніс паза социальнай тиліс министрі Наталья Николаевна Карамашева. Аның чооғынаң, «Хакасияның кӧп палалығ сӧбірелеріне социальнай хабазығның хоза кӧрімнерінеңер» республика законы хоостыра читі паза аннаң даа кӧп пала ӧскірчеткен сӧбірелерге микро-автобустар чыл сай читірілче. Пу хабазығ кӧрімі Хакасия пазы Виктор Михайлович Зиминнің кӱстенізінең чуртасха кирілген, 2011 чылда пастағы микроавтобустар кӧп палалығ сӧбірелерге пирілгеннер. Ол тустаң сығара 30 сӧбіре пос микроавтобузына чидінген.
Пӱӱл теес хоостыра ікі сӧбіре микроавтобус аларға маңнанғанох. Оларға транспортты РУСАЛ компания алғаннаңар чоохтаан министр. Амды, тізең, хоза читі сӧбірее микроавтобус читірілче. Микроавтобустар аларына республика бюджедінең алты миллионға чағын салковай позыдылған.
- Аарлығ арғыстар, алғыстапчам сірерні микроавтобус алчатханнарыңнаң! - айланған сыйых алчатхан сӧбірелерзер Хакасияның пазы Виктор Михайлович Зимин. - Кӧп орыннығ микроавтобус сірернің улуғ паза ынағ сӧбірелеріңе чахсы, ізестіг полысчы полар сағынчам. Кӧп палалығ сӧбірелерге микроавтобустар читірері кибірге кір парғанына паза аны узаратчатханыбысха ӧрінчем. Улуғ сӧбірені кӧдірерге ниик ле нимес, аннаңар пу аарлығ
сыйых сірернің чуртазыңарны сала даа нииктедеріне ізенчем. Сірернің тоғыстарыңа, ӧсчеткен тӧл ӱчӱн нандырығлығ хайииңарға поғдархапчам. Полған на сӧбірее часка, талаан, чахсы чуртас алғапчам, хаҷан даa пip, улуғ, ынағ сӧбіре полыңар.
Мына Наталья Николаевна микроавтобус клӱзін алҷаң сӧбірелерні адапча. Иң пурун Виктор Михайловичтің холынаң клӱстерні Тустығ кӧлдең Ольга Андреевна Солдатова, он паланың іҷезі, алған, анаң Хара кӧлдең Ирина Владимировна паза Василий Борисович Тайтыновтар, читі паланың іҷе-пабазы.
Ӱзінҷізін адааннар Трошкиннерні. Олар ідӧк Шира аймаанаңнар, Чоохчыл аалдаң. Ирина Михайловнанаң Фёдор Павлович 11 паланың іҷе-пабазы полчалар, оларның ӱзі - постарыни. Пӱӱнгі кӱнде ибде алты пала чуртапча, улуғ хыстары алынҷа сығыбысхан, сӧбіреліг, пасхазы - студенттер. Ирина Михайловна пала ӧскірерге алған сӧбіреде воспитательге саналча, Фёдор Павлович фермер полча.
Тӧртінҷі микроавтобустың клӱзі Ағбан пилтірінең Ольга Ивановна паза Николай Васильевич Фисенколарға пирілген. Сӧбіре позының 10 палазын ӧскірче, ағаа хоза ікі паланы ӧскірерге алып алған. Очыр аалдаң Галина Васильевна Бирюкова тоғыс пала ӧскірчеттір, оларның читізінің чазы читкелек. Чоохтирға кирек, матыр іҷе олғаннарынаң хада аарлығ сыйыхты аларға килген. Сафрон аалдаң Юрий Степановичнең Надежда Васильевна Чебодаевтер сӧбірезі 11 пала ӧскірче. Ирепчі микроавтобус соонҷа ікӧлең килген. Палалар іҷе-пабазын аарлығ сыйыхтығ ибде сағыпчалар.
Халғанҷы клӱсті Судочаковтар алғаннар. Сӧбіре пазы клӱс алған соонаң, пасха пабаларға хозылып, алғыс сӧстерін читірген. Улуғ сӧбірее хайди даа улуғ машина кирек. Амды Луиза Анатольевна палаларны имнег туразынзар теести ал чӧрбес, аның ӱчӱн хати-хати аймах кінінзер чӧрбес. Сӧбіренең ааллап чӧрерге такси чаллирға киректелбес. Сӧбіренің чорыхтарға чӧрҷең позының микроавтобузы пар.
- Микроавтобус алып алғанда, пістің прай палаларнаң хада ааллап чӧрҷең, тынанарға пар килҷең оңдай пар, - тіпче іҷе кізі. - Ағаа хоза, кӧп палалығ сӧбіре полып, піс ідӧк пасха хабазығ кӧрімнерінең тузаланчабыс: 3 часха теере очы палаа пособие алчабыс, одың ахчазын, чарытхы ӱчӱн тӧлегнің чардығын айландырчалар паза даа пасхазы. Тикке чир аларына тееске тур салғабыс. Кӧп пала ӧскірчеткенібіс пip дее aap пілдірбинче. Улуғлары, ӧзіп, иб аразында хайынарға, туңмаларын кӧрерге полысчалар.
Судочаковтар кӧп пала ӧскірерлерінеңер хаҷан даа сағынмааннар, Худай анҷа пала пиргенде, оларны ӧскірчелер. Тиктең нимес, хакас чонның сӧспегінде чоохталча: «Полған на паланың ӱлӱзі пар».
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде