СИДІК TУCTA ТӰЗІМНІГ ОҢДАЙЗАР АЙЛАНЧАБЫС
12.10.2016
Хабарлар
Киҷее республика пазы Виктор Зимин Хакасия правительствозының чыылиин иртірген. Министрлер кабинедінің теестегі чыылиинда ӧӧн хайығ хысхызына тимненіске паза аал хонииндағы малға азых пилетир, ас чыыр тоғыстарға салылған.
Регион устағҷызы Виктор Зимин чыылығны алғыстастаң пастаан. Л.Р.Кызласовтың адынаң Хакас национальнай чир-суғ ӱгренҷең музейге пӱӱл 85 чыл толча. Хакасияның пазы, музей тоғынҷыларын пайрамнаң алғыстап, пӱӱл музейге чапсых сыйых иділгенін таныхтаан - наа музей туразы.
Ідӧк чыылығда республиканың Тиліс чӧбінеңер чоох парған. Хайди искірген Виктор Зимин, аның тоғызын узарадарға чарадығ алылтыр.
- Сидік тус пасталыбысса, піс хайди даа тӱзімніг тоғынчатхан оңдайзар айланчабыс, - таныхтаан Хакасияның пазы.
Тиліс чӧбінің кнес орынҷызына ХГУ-ның ректоры Татьяна Краснова турғызылған. Ол аның холында тӧреен, аннаңар аны пу должностьха турғысчабыс тіп чарытхан Виктор Зимин. Татьяна Красноваа ол тоғысха ынааны ӱчӱн алғызын читіріп, прай министрлерні ол тоғысха ӧткін хозыларға хығырған.
Паза регион устағҷызы пассажирлерні тартарын хорғыс чох идер сурыға хайығ салған. Ӱр ниместе Хакасияда маршруттығ автобустарнаң палғалыстығ нинҷе-де улуғ саай пол парған. Виктор Зимин Хакасияның минтрансына, Ӧӧркі Чӧпнең хада тоғынып, ол сферадағы сайбағҷыларны хатығлирын тыыдар тоғыс апарарға чахығ пирген.
Мының соонаң ӧӧн сурығларның пірсі ӱзӱрілген.
- Республика чылығ пирҷең тусха хайди кірчеткені. Алынҷа хайығ Тӧӧ пазына салылған, андағы коммунальщиктер чал ахчазын ал полбинчатханы хоостыра ӧзӧгіс пастирға кӱстенген полғаннар. Хайди чарытхан Хакасиянын, пӱдіріг паза ЖКХ министрі Сергей Можаров, пӱӱнгі кӱнде алымнар кӧместең чабылчалар. Че ӧӧн сидіксініс - Тӧӧ пазы чуртағҷыларының кӧбізі, ол санда бюджетниктер, коммунальнай полызығлар ӱчӱн тӧлебинчеткені. Пу сурығны амды чарғы приставтары пастыра пӧгерге кӱстенчелер осхас.
- Коммунальнай полызығлар ӱчӱн тӧлебинчеткені пістің удаадаң удаа учурапча, Тӧӧ пазы, Харатас.., - чоохтанған Виктор Зимин. - Піс бюджетниктерге чал ахчазынҷа тудығ чох ползын тіп прай кӱзібіс салчабыс. Ноға олар, чал ахчазын алчатханнар, тӧлебинчелер?
Хакасияның пазы Тӧӧ пазындағы чурт фондының ревизиязын иртірібізерге паза ноға кізілер чылларнаң коммунальнай полызығлар ӱчӱн тӧлебинчеткенін піліп аларға пӧгін турғысхан. Олох туста Тӧӧ пазынзар килчеткен прай спортсменнерні санға ал турарға чахаан. Ол оңдайнаң спортсменнерні чуртадып ахча тоғынчатханнарны ідӧк ЖКХ ӱчӱн алымнарын чабарға кӱстирге пӧгiнiлче.
Чылығ, тізең, прай муниципальнай пӱдістерде пиріл сыххан. Сидіксіністер Бородино паза Ағбан пилтірі ааллардағы нинҷе-де ле турада пар осхас.
Пазағы ӧӧн сурығ - аал хонии тоғыстары. Хакасияның аал хонии паза ас-тамах министрі Игорь Гердтің искіриинең, амғы тусха 149 муң тонна от пилетелген, сенаж - 79 муң тонна, силос - 38 муң тонна. Тоңастығлар, тізең, 74,5 гектар кизіл парған. Асты пӱӱл 150 муң тонна чыып аларға пӧгінчелер, ирткен чылда 126 муң тонна чыылтыр. Хакасияның пазы хар чаап парғанынаң палғалыстығ сидіксініске кір парған хоныхтарға полыс пирерге чахып салған. Андағ хоныхтар кӧп нимес, олар ӧӧнінде Боград аймаанда орныхчалар тіп искірген министр.
Чыылығны тоозып, Виктор Зимин республиканың туризмҷе хазна комитедін паза аның наа устағҷызы Дмитрий Белоноговты махтаан. Комитет пос кӧңнінең, кічіг ааллардағы палаларны Ағбанзар ағылып, чапсых экскурсиялар иртірчеткені ӱчӱн.
Ідӧк республика пазы прай министерстволарға Чон пірікчеткен кӱнні чахсы таныхтирына тимненерге пӧгін турғысхан.
- Ӱлӱкӱн пӧзік синде ирт парарға кирек. Піс прайзыбыс пасхалалчабыс, че пісті прайзын пір чир піріктірче, -таныхтаан Виктор Зимин.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде