КІЧІГ ЧАСТЫҒЛАР МАРЫҒЛАСТЫЛАР
12.10.2016
Хабарлар
Хубачар аал администрациязының сыйии ӱчӱн волейболҷа регионнар аразындағы марығ пӱӱл Х-ҷы хати ирткен. Анда 10-11, 12-13 частығ хызыҷахтар араласханнар.
Аның ӧӧн пӧгіні - кічіг частығ хызыҷағастарны марығларда аралазарға кӧніктірері. Пістің СФО-да волейбол ойнапчатхан 10 - 13 частығ олғаннар аразында мыннаң пасха паза марығ иртірілбинче, неке. Аннаңар хызыҷағастар хайди ойнапчатханнарын кӧріп аларға, аалдағылар ӱчӱн матап «ағырарға» орындағы «Колос» спорткомплекссер чон толдыра чыылыс турған.
Хубачардағы марығда 20 команда араласханы таныхталған. Олар Новосибирск, Кемеров, Иркутск областьтарынаң, Хызылчар крайынаң, Ағбаннаң, Саяногорсктаң полғаннар. Марығ ээлерінің командалары даа маңат тимненіс кӧзіткеннер, чиңіс тударға парчан кӱстерін салғаннар.
Марығны кибірли азарында араласхан, прайзын чахсы ойын кӧзідерге алғаан Хакасияның спорт министрi Валерий Денщиков. Валерий Васильевич позының чооғында орындағы муниципальнай пӱдістің пазы Иван Логиновты Хубачарда волейболны тилітчеткен ӱчӱн махтаан, ағаа сыйых читірген.
2003-2004 чылларда тӧреен хызыҷағастарның командалары аразында орыннар піди ӱлестірілгеннер:
1 -Хызылчар крайы;
2 - Хубачар;
3 -Иркутск облазы.
2005-2006 чылларда тӧреен хызыҷағастарның командалары аразында орыннар піди ӱлестірілгеннер:
1 -Новосибирск облазы;
2 - Хубачар;
3 - Хызылчар крайы.
Автор :
Тимнеен Анатолий СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде