КРЫМЗАР ХАҶАН ПОЛЗА АЙЛАНАРБЫС
18.10.2016
Хабарлар
Хакасияның олғаннары "Минің Россиям" туризмҷе национапьнай программазы хоостыра Крымзар чӧр килгеннер. Улуғ чорыхтаң айланып, Абаза паза Харатас городтарның ӱгренҷілері кӧңнілерінең ӱлесчелер.
Абазадағы 50 № школаның 9-ҷы класстың ӱгренҷізі Владислава Медведева чорыхтаңар улуғ нимес чоох пас салған:
«Піс, Хакасияның ӱгренҷілері, Крым Республиказар аның культуразынаң танызарға парғабыс. Анда піске нинҷе-де кӱн аразына республиканың хумартхы орыннарынаң танызып аларға чахсы оңдай полған. Чалахай чир-чайаан, чалбах талай, арығ кии паза хайлахтар пісті чылығ удурлааннар.
Крымнаң танызары Севастополь городтаң пасталған. Анда Хрустальнай мыста піс "Матрос паза чааҷы" хумартхы таста пол килгебіс. Андох піс адмирал Нахимовха, генерал Тотлебенге, императрица Екатерина Великаяға чарыдылған хумартхы тастарда, Ушаковтың площадьында полғабыс. Экскурсовод Борис Александрович Удод піске 1941 - 1942 чылларда Крым чирінде ирткен чаалазығлардаңар, пістің чааҷыларыбыс махачы тудынғанынаңар чарыда чоохтап пирген. Минің паза пасха ӱгренҷілернің хайиин тартхан "Оборона Севастополя 1854-1855 ч.ч." музей-панорама. Крымдағы чаа хоостарда чахсы хоостал партыр. Анда Крымның ооллары хатығ чаалазығда махачы тудынчатханнарын іле кӧріп аларға чарир.
Пазағы кӱнінде чорығыбыс талай хазынҷа Алушта-Ялта тағлығ чолҷа узараан. Іди піс саблығ "Артек" олған кінінзер читкебіс. Ол Аба тағ тӧзінде орныхча. Автобустығ парчатханыбыста, экскурсовод піске чоохтаан, хайди пу чирзер килген поэт Александр Пушкин паза Николай Раевскийнің сӧбірезі. Ливадийский ӧргезер читкенде, піс піліп алғабыс, хайди мында чуртаан Романовтар сӧбірезі. Ідӧк піс полғабыс "Ласточкино гнездо" хумартхы орында, писатель А.П.Чеховтың "Белая дача" музейінде паза даа пасха орыннарда.
Пазағы кӱн Симферополь городха чарыдылған. Пісті А.В.Суворовтың, Айвазовский харындастарның хумартхы тастарынаң таныстырғаннар.
Таныхтирға сағынчам, Крымда нинҷе-де ле кӱн полып, піс кӧп наа ниме піліп алғабыс. Пу чирнің чир-чайааны пістің сағызыбыста хаҷанға даа халар. Аның сілиинеңер кӧп пазарға чарир. Мин ікінҷілебинчем, Крымзар піс хаҷан полза хатап айланарбыс».
Автор :
Хакасияның культура министерствозы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы