АЙЛЕН ПРИТЧИН ПАЗА СИМФОНИЧЕСКАЙ ОРКЕСТР
18.10.2016
Хабарлар
Ирткен субботада В.Г. Чаптыковтың адынаң Хакас хазна филармониязында чапсых ойын парған. Чиит паза таланттығ скрипач Айлен Притчиннең тоғазығ полған. Пу музыкант Россияның «XXI чӱс чылның чылтыстары» проект араласчызы полча. Чиит пианисттер, скрипачтар паза виолончельнең ойнапчатханнар Россияның культура министерствозы полызиинаң хазнаҷа ойыннарнаң чӧрчелер.
Классика паза симфоническай кӧглерге хынчатханнар филармониязар килгеннер. «Кӧрігҷі саны асхынах таа ползын, че мындағ кӧглерні истерге хынчатханнар классика кӧглерін аарлап пілчелер... - иирні азып, чоох тутхан Хакасия искусствозының саблығ деятельі, искусствовед Татьяна Чаптыкова. - Пӱӱн піс немец композитор Людвиг Бетховеннің симфонияларын истербіс, «Лунная соната», «Аппассионата», «Третья героическая» кӧглерні сірер искезер, пілчезер. Кем Бетховеннің соонаң пазылған сонаталарын искен? Читінҷі симфониязын ол тустағылар даа сизінмин халғаннар. Хай пірее кӧглері чарыхха даа сыхпааннар».
Пу иирде Бетховеннің тӧртінҷі симфониязын толдырғаннар. Тӧртінҷі симфонияны кӧп кізі испеен, пілбинче. Людвиг Бетховен позының произведениелері пастыра «эллиннер тузындағы сылағай хысты» кӧзітче тиирге чарир тіп таныхтаан Татьяна Владимировна.
Композитор Людвиг Бетховеннеңер чапсых чоохтар истерге киліскен. Чиит туста ол кӧрімніг, сіліг оол полған, аристократтарнаң олаңай ла чоохтасчаң.
1806 чылда Бетховен «Тӧртінҷі симфониядаң» пасха скрипкаа чарыдылған концерт ойынын чайап салған. Сіліг хыстарға ӧкерсініп, аймах кӧглер чайаан ол. Пу концерттің ікінҷі чардығы чайалбин парған, чон аны Бетховен пасханын пілбеен. Композитор ачырғанғанына пу концертті фортепианоға килістіре тимнебіскен.
19 чӱс чылның ікінҷі чардығында скрипканаң ойнир кӧглер чоғылы пілдістіг полыбысхан. Скрипкаа чарыдылған пу концертті хати ойнап сыхханнар. Пӱӱнгі музыканттар аны толдырчалар. Ойыннаң ааллап килген чиит скрипач Айлен Притчин аны толдырған. Композиторның паза кӧгні толдырчатхан музыканттың кӧге кӧрістері тӧӧй поларға кирек.
Айлен Притчин Россия скрипачтарының чарых «чылтыстарының» пірсі, саблығ скрипач Эдуард Грачтың ӱгренҷізі полча. Санкт-Петербургта тӧреен, андағы консерваторияның ортымах музыка школазын тоосхан. Анаң Москвадағы консерваторияда ӱгренген.
- Музыкант полбаан ползам, нименең мин айғазарҷыхпын? Пілбес, - чоохтапча Айлен. - Минің чуртазым скрипканаң пик палғалыс парған....
Чиит оол кӧп пӧзік сыйыхтарға турысхан, ол санда Россияның паза чоннар аразындағы марығларның сыйыхтарына. Айлен аймах хазналарның сценаларында, П.И.Чайковскийнің адынаң концерт залында, Москвадағы консерваторияның улуғ залында ойнапча. Iдӧк ол, аймах симфоническай оркестрлернің солизі полып, чон алнынзар сығадыр.
Хакасия искусстволарының саблығ деятельi Вячеслав Инкижеков устапчатхан симфоническай оркестрнең Айлен Притчин филармонияның сценазында ойнаан. Бетховеннің скрипкаа чарыдылған концертін nip часха чағын толдырған. Симфонияны кӧрігҷі хынып искен. Сценадаң пірде кӧгліг, табырах ойын истілген, алай ба кӧӧлҷе, хомзыныстығ кӧглер пар турғаннар. Кӧрігҷі артисттерге ізіг айа сабызын читірген.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы