ХАКАС ЧИРІНІҢ ТАЛАНТТАРЫ
19.10.2016
Хабарлар
ПІСТІҢ КІЧІГ ЧИР-СУУБЫСТА, СІЛІГ ХАКАСИЯБЫСТА, АЙМАХ НАЦИЯЛЫҒ КӦП ЧОН ЧУРТАПЧА. ЧЕ ӦӦНІ - ПРАЙЗЫ УДУР-ТӦДІР ЫНАҒЛАСЧА, ИПТІГ ТУДЫНЧА. ПІСТІҢ РЕГИОННЫҢ МИНИСТЕРСТВОЛАРЫ АЙМАХ ТІЛЛІГ ЧОННАРНЫҢ ПАЛҒАЛЫЗЫ, ХАЙЫЗЫҒЛАРЫ УЛАМ ПИК ПОЛАР КӦСТЕГНЕҢ АЙМАХ МЕРОПРИЯТИЕЛЕР ИРТІРЧЕЛЕР.
ПУ ПОЗЫРАХТА ХАКАСИЯНЫҢ КУЛЬТУРА МИНИСТЕРСТВОЗЫ ПОЛЫЗИИНАҢ С.П.КАДЫШЕВТІҢ АДЫНАҢ КУЛЬТУРА КІНІНІҢ ТОҒЫНҶЫЛАРЫ АЙМАХ НАЦИЯЛЫҒ ОЛҒАННАРНЫҢ АРАЗЫНДА (7 -11 ЧАСТЫҒЛАР) «ХАКАС ЧИРІНІҢ ТАЛАНТТАРЫ» ЧАЙААЧЫ МАРЫҒ ИРТІРГЕННЕР. АНДА ХАКАС, ОРЫС, ШОР, ПОЛЯК ХЫЗЫҶАХТАР АРАЛАСХАННАР.
ПРАЙ 7 АРАЛАСЧЫ. ОЛАР, КӦРІГҶІЛЕРНІҢ ПАЗА ЖЮРИДЕГІЛЕРНІҢ ЧӰРЕКТЕРІН АПТАП АЛАР ӰЧӰН, МАРЫҒА МАТАП ТИМНЕНГЕННЕР, ПІР АЙҶА КУЛЬТУРА КІНІНДЕ «ЧУРТААННАР», ЧЕ ЧАЙААЧЫ НОМЕРЛЕРІН ЧАХСЫ ТИМНЕП АЛҒАННАР.
Марығның ӧӧн пӧгіні - марығҷыларны чуртаста посты ӧткін тудынарға ӱгредері, пос чонының тілін паза культуразын улуғлиры, посты сценада орта тудынып пілерге, иптіг чоохтанарға кӧніктірері. Араласчыларны
жюридегілер паалааннар. Жюри кнезі Россияның саблығ артизі, Хакасияның чон артизі Светлана Чаптыкова полған.
Пастағы номинацияда марығҷылар, сценазар национальнай кип-азахтығ сығып, постарынаңар чоохтааннар. Минің кӧңніме тың кірген Ағбанның 24 № школазының 4 класстың ӱгренҷізі Алина Томочакова. Тілбірӧс хызыҷах позын хыйғаҷах паза абахайах тіп махтабысхан. Ол чиркеенненерге, хоостирға паза іҷезіне иб аразында полызарға хынчаттыр. Ағбанҷа пас чӧрчетсе, пістің городыбыстың фонтаннарына, хумартхы тастарына паза чахайахтарына ӧкерсінчеттір. Алинаҷах, хыс туңмаҷаана кӧзідім полар ӱчӱн, хачіан даа пастағы орында поларға кӱстенче.
Поляк хыс Анастасия Симонова позы ниме идерге хынчатханнаңар кибеліс хығырған, анаң пос тілінең сарын толдырған.
Арина Шельтрекова иң кічіг марығҷы полған. Ол шорлар ӱчӱн турысхан. Аның ууҷазы Тағлығ Шориядаң, че іҷе-пабазы Ағбанда чуртапча. Хызыҷах Ағбанның 9 № школазында 1 класста ӱгренче. Марығда позының кӧңнінең араласча. Хызыҷах Ағбандағы Тимірчолҷыларның культура туразынзар теелбек кружогына чӧрҷең, ам «Ынархас» теелбек студиязынзар чӧрерге сағынча.
Паза nip марығҷы Анастасия Майнагашева сарнирға паза плесет саларға, тігерге паза чібекнең хоостирға хынчатханынаңар чоохтаан. 10 частығ хызыҷах Диснейлендте пол килерге паза чуртазында модель поларға сағынча. Ол Ағбанның 24 № школазында ӱгренче.
Настя Рогова паза Даша Мишустина акробатиканаң айғазарға хынчаттырлар паза англия тілін ӱгренчеттірлер.
«Хакас чирінің таланттары» марыға тимненчеткенде, хызыҷахтар пір ынағ ӧме пол парғаннар, тимненіс тузында олар удур-тӧдір полысханнар.
Ікінҷі номинацияда марығҷылар обручтығ «Цветик-семицветик» теелбек салғаннар.
«Шоу талантов» номинацияа тимненчеткенде, хызыҷахтарның чазыт таланттарын кӧріп алғаннар: хайзы-да чахсы теелбек салчаттыр, кем-де ӧтіг ӱнніг полтыр, хайзы-да кізі чӱреен тибіреде кибеліс хығыр полчаттыр. Пу номинацияда Алина Томочакова «Сіліг минің кӧгенеем» хакас сарынны толдырған. Ол кӱн аның тӧреен кӱні полған. Залдағы кӧрігҷілер прайзы ағаа пір ӱннең «Алғыстапчабыс!» тіп хысхырғаннар паза ізіг айа сабызын сыйлааннар.
Арина Шельтрекова ачыныстығ ӱніҷеенең шор сарынын ырлап пирген. Полина Чебодаева «Айдым» хакас чонның тахпаан толдырған. Анастасия Майнагашева «Ханаттарында часхыны ағыл килген» хакас теелбегін салған. Анастасия Симонова поляк тілі паза культуразы школазына, «Славяночка» вокал группазына паза «Сибирский краковяк» хореография ансамбльына чӧрче. «Шоу талантов» номинацияда ол поляк теелбегін сал пирген. Акробат хыстар Дарья Мишустинанан, Анастасия Рогова теелбек пастыра аймах трюктар кӧзіткеннер.
Халғанҷы номинация «Иирлерге кис чӧрҷең кӧгенектернің кӧзідии» полған. Хызыҷахтар, сіліг кӧгенектер кизіп алып, сценаа толдыра пас чӧргеннер.
Че хайдағ даа ӱлӱкӱннің, иирнің, марығның тоозылҷаа пар. Кем ни, «Хакас чирінің абахайы» атха турызып, коронаны кизер? Аны жюри пӧгерге парыбысхан. Ол арада кӧрігҷілер улуғ нимес концерт кӧріп алғаннар.
Сценазар жюри кнезі Светлана Чаптыкова сыхча. Ол марығҷылар хайдағ дипломнар утып алғаннарын искірче: «Кічіг Фея» номинацияҷа Арина Шельтрековаа диплом читірілче. Полина Чебодаева «Мисс Национальнай колорит» атха турысча. Дарья Мишустина «Мисс Талант» полыбысхан, Алина Томочакова - «Мисс Обаяние», Анастасия Рогова - «II Вице-Мисс», Анастасия Майнагашева - «I Вице-Мисс».
Ӧӧн номинацияның - «Хакас чирінің Абахайы» - чиңісчізі Анастасия Симонова полыбысхан, сіліг коронаны кизерге ағаа ӱлӱс тӱскен!
- Мин пу марығда ікінҷі хати араласчам. Пастағызын мин «Мисс Оригинальность» атха турысхам. Амғы марыға тикке килбиндірбін, чиңісчі полыбыстым. Пу марығдаңар мағаа поляк тілі паза культуразы школазында чоохтап пиргеннер. Мин сала маңзыри аралазарға сағыныбысхам.
Тимненіс тузында іҷемнең паза хыс туңмамнаң хада Культура кінінде сала пip айҷа «чуртабаабыс». Марығ кӧңніме кірген, чӱреемде хайдағ-да чочыныс полғанох. Поляк национальнай кип-азахты іҷем Виктория Николаевна тіккен. Ол Ағбанның 2 № школазында изобразительнай искусство урогын апарча. Мин олох школада 5 класста ӱгренчем, - ӧрінізінең ӱлесче чиңісчі хызыҷах.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде