ЧОН-ЧАХСЫ ЧЫЫЛЫСХАН, ЫР-САРЫН ЧАЙЫЛҒАН
01.11.2016
Хабарлар
Ирткен неделяда С.П.Кадышевтің адынаң культура кінінде сіліг чахайахтар тудын салған чалахай кӧңніліг кізілерні кӧрерге чарир полған. Олар прайзы республиканың олған искусство школазының 30 чылына чарыдылған концертті кӧріп аларға килгеннер.
Республиканың олған искусство школазы 1986 чылда тӧстелген. Пастап палаларны музыкаа ла ӱгреткен ползалар, ӱс чыл пазынаң мында хоос пӧлиин асханнар. Амды школада фольклор, хоос, музыка, театр паза теелбек пӧліктері маңнаныстығ тоғынчалар.
Ӱгредіг заведениезінде ынағ паза пик ӧме істенче, аның ӧзені А.А. Шаренко, И.А.Тугужекова, М.А.Бодункова, Ж.В.Житник, Ш.Г.Костякова, Л.В.Розова, А.В. Старухин, С.П.Чепашева, Л.М.Шалгинова, А.Н.Султрекова полчалар. Ідӧк олғаннарға тирең пілістер пирчелер Россияның паза Хакасияның саблығ артизі Е.А.Улугбашев, Хакасияның саблығ артизі М.В.Янгулова, Хакасия культуразының саблығ тоғынҷызы М.С.Сартыкова. Театр студиязының тоғызын Хакас драма театрының режиссеры С.С.Ултургашева апарча.
Пайрамнығ иир кічіг хоосчылар тимнеен кӧзідігнең пасталған. Таланттығ ӱгренҷілернің чайаачы тоғыстарынаң фойеде танызып аларға чарир полған. Сизінгенде, ӱгренҷілернің хоостары кӧрігҷілернің кӧңніне кіргеннер.
Концертке искусство школазының араласчылары иң артых номерлерін таллап алғаннар. Иң пурун сценазар Дельфийскай ойыннарның чиңісчізі Юрий Шалгынов сыххан. Ол хомыснаң Евгений Улугбашевтің «Алнындағы чол» кӧӧн толдыр пирген. Аның соонаң чайаачызынаң Александр Трояков ӧріндірген. Таланттығ оол, чатхан саап, кӧрігҷілерні аптаан. Пӱӱл Саша Россия синінде иртчеткен А.А.Кенельнің адынаң марығда I орынны холға кирген. Андрей Сагалаков театр студиязынзар чӧрче. Ол Ольга Киевскаяның «Іҷедеңер баллада» кибелісті чалтырама хығыр пирген. Февраль айда хакас оолағас «Сибирь чылтыстарны чарытча» чоннар аразындағы фестивальда «Хоос сӧс» номинацияда I степеньніг лауреат атха турысхан.
Прайзын кічіг музыкант Алёша Бояков чапсытхан. Часха кічіг дее полза, ол ӱгретчізі Аржан Туденевнең хада саблығ композитор Эннио Морриконе пасхан «Чалғыс мал хадағӌызы» композицияны хобырахнаң пӧзік синде толдырыбысхан. Улуғ ӧс парза, Алёша саблығ музыкант полар, неке. Ідӧк кӧрігӌілерні постарының чайаачыларынаң «Айдас», «Тигір хуры» паза «Артыс» фольклор ӧмелері ӧріндіргеннер.
Алынӌа номерлерні пайрамнығ иирге ӱгретчілер тимнееннер. Руслана Назырова домранаң композитор Александр Цыганков чайаан «Мардяндя» кӧгні толдыр пирген. Ӱгретчілернің ӧмезі, хакас кӧг тиріглерінең ойнап, «Ах тасхыллар» хакас чонның ырын сарнаан.
Пайрамнарда кибір хоостыра сыйыхтар сыйлапчалар. Школаның ӧмезін паза ӱгренҷілерін пу ӱлӱкӱннең Хакасияның культура министерствозының амғы искусство пӧлиинің устағчызы Валентина Лебедева алғыстаан. Ол искусство школазына мыннаң мындар тӱзімніг тоғынарға, пӧзік чидіглерге чидерге алғаан. Алғыстас сӧстері соонаң В.И.Лебедева школаның тоғынҷыларына Аарластығ паза алғыстас пічіктерін читірген. 30 чыл аразына республиканың олған искусство школазы кӧп оол-хысха чол асхан. Искусство школазын тоосханнарның адынаң ӱгретчілерге улуғ алғызын Людмила Кирбижекова читірген. Тӧреен школаны пайрамынаң ідӧк ырчылар Анна Бурнакованаң Валерия Кыржинакова алғыстааннар, олар чайаачы сыйыхтар сыйлааннар. Концерт пӧзік синде ирткен, кӧрігӌілер чалахай кӧңніліг ибзер нанғаннар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде