СООХТА - ЧЫЛЫҒ ЧИРЗЕР
02.11.2016
Хабарлар
РЕСПУБЛИКАНЫҢ АҒБАНДАҒЫ АЭРОПОРТТЫ ТИЛІДЕР ПРОГРАММАЗЫ ЧУРТАСХА КИРІЛЧЕТКЕНІ ІЛЕ КӦРІНЧЕ. АЭРОПОРТ ТУРАЗЫНЫҢ ІСТІ ПАЗА ТАСТЫ ПРАЙ ДАА НААӋЫЛАЛ ПАРДЫ, АМДЫ АНЫҢ ХЫРИНДАҒЫ ЧИР ИПТЕЛЧЕ, АВТОМОБИЛЬЛЕР ТУРҒЫСЧАҢ ОРЫННАРДА ТЫХТАҒ ТОҒЫСТАРЫ AM ДАА ПАРЧА. ПАССАЖИРЛЕРГЕ ДЕЕ, ОЛАРНЫ ӰДЕСЧЕТКЕННЕРГЕ АЛАЙ УДУРЛАПЧАТХАННАРҒА ДАА ИСТІГ ОҢДАЙЛАР ПИРЕРГЕ ПРАЙ НИМЕ ИДІЛЧЕ.
МЫНДА ЧООХТИРҒА КИРЕК, АҒБАННАҢ ПАСХА РЕГИОННАРЗАР, АҒАА ХОЗА, ПАСХА ХАЗНАЛАРЗАР УЧУҒАРҒА НАА РЕЙСТЕР АЗЫЛЧАТХАНДА, ПІСТІҢ ГОРОДТАҢ ПАРАРҒА ХОНӋЫХ РЕГИОННАРДАҢ КӦП КІЗІ КИЛЧЕ. ӦӦНІНДЕ ТУВАДАҢ ПАЗА ХЫЗЫЛЧАР КРАЙЫНЫҢ ӰСТӰНЗАРХЫ ЧАРДЫҒЫНАҢ КИЛЧЕЛЕР. ХАКАСИЯНЫҢ УСТАА АЭРОПОРТТЫ ТИЛІДЕРІНЕ УЛУҒ ХАЙЫҒСАЛЧА.
КӦЗІДІМГЕ, МЫНЫҢ АПНЫНДА МОСКВАЗАР КӦНІ РЕЙС АЙДА НИНӋЕ-ДЕ ЛЕ ХАТИ ТОЛДЫРЫЛӋАҢ ПОЛЗА, АМДЫ КӰНДЕ ІКІЛЕР САМОЛЁТ УЧУХЧА. ОЛАРҒА ДАА ПАССАЖИРЛЕР ТОЛДЫРА ПОЛЧАЛАР. АҒБАНДАҒЫ ЧОННАР АРАЗЫНДАҒЫ АЭРОПОРТ ПОЗЫНЫҢ АДЫНА КИЛІСЧЕТКЕНІ ПАСХА ХАЗНАЛАРНАҢ АВИАЦИЯ ПАСТЫРА ПАЛҒАЛЫС ТУДЫЛЧАТХАНЫНАҢ ЧАХСЫ КИРЕЧІЛЕЛЧЕ. ПАСХА ХАЗНАЛАРЗАР ТОЛДЫРЫЛЧАТХАН РЕЙСТЕР САНЫ ХОЗЫЛЫП ЛА ОДЫРЧА.
Іди 30 октябрьда Ағбандағы аэропорттаң толдырылчатхан рейстер санына Вьетнамзар Ағбан -Камрань маршрута учухчаң рейс хозылған. Аны ROYAL FLIGHT авиакомпания толдырча. Пу компанияның Боинг-752 лайнеріне пір саңай 230 пассажир одырча. Че ноға-да ол орай хараада 03.30 часта учухча, билеттернің регистрациязы 01.00 частаң пасталча. Анзы авиапассажирлерге тың на истіг полбас, неке. Пу пастағы рейс тее полза, самолетта пос орын чох полған.
Вьетнамдағы Камрань город Ӱстӱнзархы Хыдат талай хазында орныхча, Совет Союзы тузында анда СССР-ның чаа-талай базазы полҷаң. Амды Вьетнамның устаа аны чонға тузалығ орын ит саларға пӧгінче. Анда улуғ самолёттар одырӌаң аэропорт пар. Вьетнамның улуғ чааны ирткен чоны ам позының чирінде пір дее хазнаның чаа базазын орныхтырарға хынминча.
Камраньзар учухчатхан пассажирлернең чоохтасханда, туристтерге тынанӌаң орын пу городтаң 40 километр оортахта орныхча. Путёвкаларны олар турфирмаларда алғаннар. Россияда амды соохтар пасталыбысханда, отпускка парчатхан кізілерге ізіг чирлерзер парып аларға пу уғаа килістіре рейс пол партыр.
Орай хараа даа полза, аэропортта чон толдыра. Пасха хазназар учухчатхан пассажирлер, билеттерінең регистрация иртіп, анаң таможня, пограничнай сыныхтаан иртчелер. Андағ сыныхтағларны хырығ озаринзар парчатханнарға хайди даа иртерге киректелче. Пірее сӧбірелер кічіг палалығ даа парчалар. Самолёт Ағбаннаң Вьетнамзар читі час учухча.
Хайди чоохтаан «Ағбан» аэропорттың ӧӧн директоры Александр Попов, Вьетнамзар азылчатхан наа рейс республиканың аэропортты тилідер программазы хоостыра толдырылча. Аны азар алнында кӧп тоғыс, чоохтазығлар апарылған, алынӌа авиакомпанияларнаң чӧптезіглер иділген, че соонаң рейсті толдырарын ROYAL FLIGHT авиакомпания позына алып алған. Пу маршрутча рейстер хысхы тооза, ікі неделяда пір хати толдырылар. Туристтерге хысхыда, соохтаң чылығ чирзер парып, тынанып алар чахсы оңдай пирілче. Аэропорт авиапассажирлерге истіг оңдайлар пирерге позының саринаң прай ниме идерге кӱстенче. Ам даа наа рейстер азыларын сағирға чарир.
Сыннаң даа, пістің аэропорт ибіркі регионнар аразында учуғарға чахсы, истіг орынға айлан парир. Аның прай техниказы, оборудованиезі нааӌылалча, кӧрімі дее чахсы саринзар саңай алыс парир. Совет Союзы тузында Хызылчарзар ла полған на чарым час пазынаң самолёттар учухчаң. Ам даа Ағбандағы аэропорттаң кӧп авиарейстер толдырыл турарына ізенербіс.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде