АЛЫМНАР ПАЗА УЛУҒ ПӰДІРІГЛЕР
02.11.2016
Хабарлар
Киҷее Хакасияның пазы Виктор Зиминнің устаанынаң республика правительствозының чыылии ирткен. Теестегі чыылығда регион устағҷызы Тӧӧ пазындағы чурт-коммунальнай тӧлеглер ӱчӱн алымнарға, республикадағы перинатальнай кіннің пӱдіриине паза наа хирургия корпузы хайди тузаланысха кирілчеткеніне теелген.
Виктор Зимин чыылығны Москвада ЕВРАЗ компанияның устағ-пастаанаң ирткен чӧптезіглернің салтарларынаң таныстырып пастаан. Чӧптезіглер рудниксер инвестиция кирер сурығӌа парған. Хайди таныхтаан Хакасияның пазы, чоох парча 625 миллион салковайдаңар. Ол ахча рудникке 200 метр тиреңде руда анир орынны читіре пӱдірібізеріне киректелче. Наа тиреңдегі орын предприятиее онарлап чыл тӱзімніг тоғынарға оңдай пирер тіп кӧрілче.
Регион устағӌызы Виктор Зимин чӧптезіглер тӱзімніг ирткен тіп паалаан. ЕВРАЗ компанияның устағ-пастаа удур парча осхас. Че алнында ам даа кӧп тоғыс, пазағы тоғазығларда специалисттер инвестиция займын алар оңдайларны ӱзӱрерлер.
Пазағы сурығ ағырсымнығ Тӧӧ пазынаң палғалыстығ полған. Республика правительствозының ирткен чыылиинда Тӧӧ пазы чуртағӌыларының кӧбізі коммунальнай полызығлар ӱчӱн тӧлебинчеткені ілезіне сығысхан. Андағы чурт-коммунальнай хоных тоғынҷылары, айларнаң чал ахчазын албин, ӧзӧгіс тее пастирға тимде полғаннар. Виктор Зимин андада ЖКХ полызығлары ӱчӱн тӧлебинчеткеннернең тоғыс апарарға паза алымнарны хызырарға пӧгін турғысхан.
Пӱӱнгі кӱнде Тӧӧ пазында киректер хайди парчатханынаңар Хакасия пазының орынӌызы Валерий Марков искіріг иткен. Андағы сидіксіністі пӧкчеткен тоғысчы ӧменең ол устапча. Хайди ол таныхтаан, алымнар синін хызырарынӌа тоғыс апарылча, чыылығлар паза чуртағӌыларнаң тоғазығлар ирткен. Тӧӧ пазынзар спортсменнер кил сыхса (андағылар, чурттарын арендаа пиріп, ахча тоғынчаттырлар - Авт.), алымнар ӧткін арах хызырыл сығар тіп искірген Марков.
Че Хакасияның пазын ол искіріг чӧпсіндірбеен. Пӱӱнгі кӱнге тӧӧ пазындағыларның ЖКХ ӱчӱн алымнары 3 миллион салковай артиинаң полғанын ис салып, Виктор Зимин улам хатығланған:
- Алымнарны чох идерінӌе тоғынарға кирек, спортсменнерге ле ізенмеске.
Хакасияның спорт министрі Валерий Денщиков Тӧӧ пазындағы Спорт тимненізі кінінде спортсменнерні санға аларынҷа тоғыс апарылчатханынаңар искірген. Амғы тусха 14 регионнаң 128 спортсмен килтір. Таныхтирға кирек, Тӧӧ пазында тӱрчедең саналығ чылҷаңнарның Іскеркі Европа кубогының пастағы чардығы полчатхан марығлар - Хакасия кубогы - пасталар. Денщиков ол тусха 700-ке чағын спортсмен килерін сағыпча.
- Спортсменнернең хада полысчылары килерлер, тиксі 1300-1400 кізіҷе Тӧӧ пазынзар килер тіп сағынчам, - таныхтаан министр.
Ідӧк 2-4 декабрьда Тӧӧ пазындох хазна кубогының пастағы чардығы иртер осхас. Андар ідӧк кӧп спортсмен килері сахталча. Пу искіріг Хакасияның пазын кӧмес амырат салған.
Виктор Зимин пу чыылығда алынӌа хайығ істеністегі хайызығларны орталадар сурыға салған. Чоох парча чонны істеніс чӧптезии ле пастыра тоғынарына кӧніктірердеңер. Андағ чӧптезіг итпин тоғынчатханнар соонаң социальнай гарантиялар чох халчалар. Пенсиялары даа оларның иң тӧбін пол парча.
Чонға тоғыс тапчаң хазна комитедінің кнезі Ирина Ахметованың искіриинең, чонны пічік пастыра тоғысха тартар кӧстегнең прай муниципальнай пӱдістернең чӧптезіглер иділген. Амғы тусха 10 муң артиинаң кізіні, істеніс чӧптезиин идіп, тоғынарға кӧӧктіріп алтырлар. Анзы планның 66 проценті полча. Планӌа чылда 15 муңнаң ас нимес кізіні тоғысха тартып алары кӧрілчеттір.
Перинатальнай кіннің пӱдірии хайди парчатханынаңар республиканың пӱдіріг паза ЖКХ министрі Сергей Можаров искірген. Хысхаӌахти чоохтаза, наа пӱдіріг тимге сых парир, андар чылығ пирілген, кирек оборудование турғызылча.
Виктор Зимин, объект тузына пӱдірілчеткенін махтап, аны кӧместең имҷілернің холына пиріп турарға чахаан. Хомзынысха, аны тузаланысха кирері кӧмес сӧӧ тартыл парар. Тоғынҷаң лицензия аларына ӱс айҷа парыбызар осхас.
Хакасия пазының орынӌызы Ирина Смолина республиканың наа хирургия корпузы хаҷан тузаланысха кирілердеңер искіріг иткен. Сигіс хадыллығ наа корпуста имнег оборудованиезін турғызар тоғыс хыызында парча. Ирина Геннадиевнаның чооғынаң, наа хирургия корпузынзар прай пӧліктер (урология, ЛОР, нейрохирургия, травматология) 28 декабрьға теере кӧзібізерлер. Пастағы туста хирургия корпузындағы 10 операционнайдаң 7-зі тоғынар.
Халғанӌызын Виктор Зимин 4 ноябрьда Чон пірікчеткен кӱн хайди иртеріне хайығ айландырған. Хакасия пазының орынӌызы Владимир Крафт пӱӱл ӱлӱкӱн республиканың ипподромында алғым таныхталарынаңар искірген. Пайрамда прай аймахтардаң паза городтардаң кізілер килерлер, улуғ паза чапсых концерт полар. Ол санда Хакасиядағы национальнай диаспоралар ойын турғызарлар тіп кӧрілче. Ідӧк анда аал хонии ярмарказы иртер.
Хакасияның пазы Виктор Зимин хазнаның ӧӧн ӱлӱкӱннерінің пірсін чахсы иртірібізерге, тынағ кӱннерін хорғыс чох иртіреріне хайығ саларға чахығ пирген. Анаң, прайзын чағдапчатхан ӱлӱкӱннең алғыстап, чыылығның тоғызын тоос салған.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде