НИМЕ ПОЛҶАҢ ОЛ ЧАСКА
02.11.2016
Хабарлар
Ағбан городтың «Чылығ город - чылығ тура» проектінҷе чуртасха кирілчеткен мероприятиелер санында Психология-педагогика, имнег паза социальнай полызығ кінінде «Сӧбіре ырызының пирамидазы» пайрам иртірілген.
Пу проект сидік оңдайларда чуртапчатхан олғаннарға полысчатхан Россия чыындызының грант ахчазын алған. Пу мероприятиеде паба-іҷелер паза олғаннар нимедір ырыс паза ол сӧбіреде хайдағ орында полчатханын ӱзӱргеннер.
Полған на паланың паза улуғ кізінің ырысха алай ба часкаа позының кӧрізі пар. Че сӧбіреде ол ырыс тӧӧй арах полча. Полғаны ла часкалығ сӧбіреде чуртирға сағынча нооза.
Нимее тӧріпче пу чир ӱстӱне полған на кізі? Ол позының ӱлӱзінің чолын апарарға паза часкалығ чуртас кӧрерге сағынча. Олғаннарның часкалығ чуртазы - ағаа хынчатхан паба-іҷезі, хада ойнапчатхан харындас-туңмалары паза чуртасха ӱгретчеткен аға-ууӌалары. Ідӧк, толдыразынаң часкалығ чуртир ӱчӱн, постарының улуғ туразы ползын!
«Минің турам - минің сівеем» тіпчелер. Іди полғаны ла позының чуртында, позының сӧбірезінде чуртапча, хайда ағаа истіг паза хорғыс чох полча, хайда ағаа паарсапчалар паза ибзер килерін хадарчалар.
Полған на сӧбіре позының андағ пик туразын тӧстирге сағынча. Анда ӱлӱкӱннерде аға-ууҷалар, харындас-туңмалар паза туған-чағыннар, чыылызып, улуғ стол кистінде одырып, чоохтасчалар паза ойнапчалар. Паба-іче ынағ полза, палалар ідӧк часкалығ ӧсчелер.
Мында олғаннар, хоостап, кӧзіткеннер - ниме полҷаң ол часка. Кӧбізі кӧк тигірні, чалахай кӱнні паза ибіре сіліг чахайахтар ӧсчеткен тураны хоостаан. Ідӧк олар часкалығ чуртастаңар нымахтар чоохтааннар паза кибелістер хығырғаннар.
Автор :
Кристина КЫШТЫМОВА, педагог-психолог
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде