КӰС АЛЫНЧАТХАН «ЧЫЛТЫЗАХТАР»
Статья
Мин олғаннарның аймах марығларда, концерттерде сарнапчатханнарын алай теелбек салчатханнарын кӧрерге уғаа хынчам. Ачых-чарых сырайларын, чалахай кӧңнілерін, чӱрексіпчеткеннерін кӧріп, оларға ачынчам. Чайаачы олғаннарның устары тиліпчеткені кӧрігҷілернің харахтары алнында иртче тиирге чарир. Хай піреезі чағын кізі осхас пол парча, аның ӱчӱн марығларда сағыссырапчазың.
Мин чайаачы чолларында пастағы хаалағлар итчеткен Елизавета паза Сергей Сартыковтардаңар чоохтап пирерге сағынчам.
Пастағызын оларны Аршаннар аалында ирткен Чыл Пазы ӱлӱкӱнде кӧргем. Андада пиӌе-туңма, «Ӱлӱкӱн» сарынны толдырып, чидінізіп алып, іӌелеріне ӱлӱкӱнге сыйых тимнепчеткеннерінеңер ырлааннар. Уламох Серёжаның сценада тудынчатханы сағызымда халған. Ол, пір дее туртухпин, кӧрігӌілер алнында позын пос тудынчатхан.
Лиза паза Серёжа Алтай аймааның Хубачар аалынаңнар. Ӏҷелері - Валентина Павловна Сартыкова. Ол олған садында воспитатель полып тоғынча. Пабалары - Пётр Петрович Сартыков, таарлағ машина водительі полча.
Ам 11 частығ Лиза Хубачардағы ортымах школаның 5 «а» клазында саңай тӧрт-писке ле ӱгренче. Ідӧк ол орындағы музыка школазынзар чӧрче, домранаң ойнирға ӱгренче. Аның сӧстерінең, музыканаң айғазары кӧңніне кірче, ӧс парза, ол имӌі поларға, чуртазын имнег киреенең палғалыстырарға сағынча.
Серёжа 3 «б» класста ӱгренче. Ағаа 9 час. Ӱгренізі ідӧк чахсы парча. Сарынҷылар кружогынаң пасха, ол волейболға паза «Кічіг журналист» кружокка чӧрче. Ӧс парза, Серёжа пабазыох чіли тоғынарға сағынча.
Лизанаң Серёжаны сарнирға ӱгретче Хакасия культуразының саблығ тоғынҷызы Мария Аткнина. Устағӌылары оларның кӱстенӌік хылиин, хакас тілін ӱгренерге сіренчеткеннерін таныхтапча. Ікізінең дее пос тілін пілерге кирек, соонаң ол пілістер чуртаста туза полар тіп санапча. Пӱӱнгі кӱнде олар хакас таа, орыс таа тілінең сарыннар ӱгренчелер. Че пос чонының сарыннары, кӧглері кӧңнілеріне тың кірчелер. Лизаның чооғынаң, ол ууҷазының пала абытчаң сарыннарны ырлапчатханын истерге уғаа хынча.
Олғаннар сағам улуғ марығларда араласхалахтар. Че анзы оларның чайаачы чолы наа ла пасталчатханынаң палғалыстығ. Ізенчем, мыннаң мындар Лизанаң Серёжа, чахсы ӱгреніп, пӧзік чидіглерге чидерлер.
Татьяна КЫШТЫМОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы