БЮДЖЕТЧЕ ТОҒЫС ПАСТАЛЫБЫСХАН
03.11.2016
Хабарлар
Хакасияның парламент кнезі Владимир Штыгашев 2 ноябрьда Ӧӧркі Чӧп президиумының чыылиин иртірген. Чыылығның ӧӧн сурии республиканың 2017 чылға паза пландағы 2018, 2019 чылларға бюджедінеңер закон проекті полған.
Килер чылға республика бюджедінең Хакасияның финанстар министрінің пастағы орынӌызы Ирина Войнова таныстырған. Хайди ол искірген, республиканың 2017 чылға бюджедінің кӧзідіглері мындағ:
парыстар - 19 миллиард 76 миллион 244 муң салковай;
хорадығлар - 24 миллиард 58 миллион 629 муң салковай;
дефицит - 4 миллиард 982 миллион 385 муң салковай.
Олох туста федеральнай бюджеттең нинӌе ахча кірері ам даа пілдістіг нимес. Аннаңар бюджет парыстарында ол ахчаның синін 2016 чылдағызындағы чіли артыс салтырлар - 2 миллиардча салковай. Ирина Войнова федеральнай бюджеттең кірчеткен кӧстегліг ахча нинӌе полары республика бюджедінің ікінӌі хығыриина ла пілдістіг полар тіп таныхтаан. Андағ оңдайнаң, республика бюджедінзер алызығлар ікінӌі хығырығда хайди даа кирілер. Парыстарны хызырарға алай хозарға? Анзы Москва нинӌе ахча пирерінең палғалыстығ полар.
Войнованың искіриинең, республика бюджеді, алнындағыох чіли, социальнай кӧстегліг полып халча. Хорадығларның 67 проценті социальнай сфераа килісче. Чоохтирға кирек, бюджеттегі ахчаның 40 проценті (9,5 миллиард салковай) чал ахчазын тӧлиріне парыбызар.
Хакасияның финанстар министрінің орынҷызы ідӧк алынӌа объекттерге нинӌе ахча позыдыларынаң таныстырған. Кӧзідімге, республиканың наа музей-культура кініне 2017 чылда 105 миллион салковай пирері кӧрілче. Ол ахчаның 40 миллионы арачыланыс системазына хорадылар, 65 миллионы - залларны иптиріне. Тӧӧ пазындағы спорт тимненізі кініне 50 миллион салковай позыдылары кӧрілче, Орджоникидзе аймаандағы Ӱӱс аалда наа школа пӱдіреріне - 207 миллион салковай. Хайди таныхтаан Войнова, Ӱӱстегі школаның пӱдірии софинансирование оңдайынаң апарылар. Аннаңар хорадылған ахчаның 70 проценті федеральнай бюджеттең айландырылар. Айланған ахчаны школа столовайларына паза автобустарына позыдарға пӧгінчелер.
Ӧӧркі Чӧп президиумы республиканың 2017 чылға бюджедінең танызып алған соонаң 18 ноябрьда бюджетче азых ӱзӱріглер иртірерге чаратхан. Ӧӧркі Чӧп кнезі Владимир Штыгашев, республика бюджедінзер алызығлар ам даа кирілерін таныхтап, аны 30 ноябрьдағы сессияда пастағы хығырығда кӧрібізерге киректелчеткенін таныхтаан.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде