АЭРОПОРТТЫ ТИЛІДЕРІНДЕ ХАДА-ПІРГЕ ТОҒЫНАРҒА
03.11.2016
Хабарлар
Киҷее Хакасияның пазы Виктор Зимин «Ағбан» аэропортта чыылығ иртірген. Чыылығда араласханнар Хакасия пазының орынӌызы Валерий Марков, финанстар министрі Семён Аёшин, экономика министрі Татьяна Пауль, транспорт паза чол хонии, ідӧк ис-пай паза чир хайызығлары министерстволар кізілері, Н.Ф.Катановтың адынаң Хакас хазна университедінің ректоры Татьяна Краснова, "Ағбан аэропорт" ОАО-ның ӧӧн директоры Александр Попов, "Сибир авиакомпания "ПАО-ның Ағбандағы пӧлік директоры Юрий Шестаков паза даа пасхазы.
Пастап Хакасияның пазы Виктор Зимин чыылығ араласчыларынаң хада аэровокзал алнын иптирінӌе толдырылған тоғыстарнаң танысхан паза аэропорттың кирексіністеріне алылған техниканы кӧрген. Чоохтирға кирек, аэропорт істі-тастын иптирінҷе улуғ тоғыс апарча.
Халғанӌы ӱс чыл аразына республика ӱлгӱлерінің полызиинаң Хакасияның "кии хаалхалары" кӧрімін дее чахсыландырыбысхан, полызығларын даа алғыдыбысхан. Анзын Виктор Зимин, чыылығны пастапчатханда, позының чооғында таныхтаан:
- Аэропорттың тоғызын чахсыландырчатхан, аны нааӌылапчатхан ӱчӱн алғызым читірчем аның тоғынҷыларына паза устағӌызына. Олар республика аалӌыларын удурлапчалар, Хакасиядаңар, «Ағбан» аэропорттаңар аалӌыларның хайдағ сағыс тӧстелері оларның тоғызынаң палғалыстығ. Аннаңар піске аэропортты пассажирлерге истіг идерге ам даа улуғ тоғыс толдырарға киректелче.
Чыылығда пу чағында кӧрілчеткен тоғыстар паза наа сығысчатхан сидік сурығлар ӱзӱрілгеннер. Аэровокзалның ибіркі чирін иптир тоғыстар часхызын тоозыларлар. Республика пазы проектті чуртасха кирчеткеннердең аэропорт алнын, чуртағӌыларның хайиин тартар ӱчӱн, сіліг идерге сурынған. Олох туста пӱӱнгі кӱнде аэровокзалның пасха пӱдіріглерінің тастындағы кӧрімі иптелбеен.
Виктор Зимин пӱдіріглернің тастын аэровокзалның кӧрімінең тиңнирге чахаан. Аның таниинаң, пӱдіріглер тӧӧй кӧрімніг полза, чахсы полар.
«Ағбан» аэропорттың ӧӧн директоры Александр Поповтың 2016 чылның тоғыс айының тоғыс салтар-ларынаңар искіриинең, тоғыс ирткен чылдағызынаң уйан парча, че, андағ даа полза, аэропорттың парызы хорадығларны асча. Оӧн хорадығлар тоғынҷыларға чал ахчазын тӧлирінең палғалыстығ. Пӱӱл хорадығлар МРОТ ӧс парғаннаңар хозыл парған, ағаа хоза, устағ-пастағ производство тоғынӌыларына чал ахчазын 5%-ке кӧдірібіскен. Лизинг хорадығлары ідӧк хозыл парғаннар. Аэропорт хар арығлаӌаң наа машина, ӧрт ӱзірҷең аэродром машиназын паза УАЗ алып алған.
Ідӧк пастыхтар пасха хан чирлерінзер рейстерні тоғындырӌаң оңдайларны чахсыландырарын ӱзӱргеннер. Пассажирлер рейсті сахтаӌаң орынға сыыспинчаттырлар, аннаңар орынны алғыдардаңар сурығ турча. Аннаң пасха, кирексініс пар - пасха хан чирлерінзер кӱнде пір ле рейс поларға кирек. Сурығларны пӧкчең оңдайларны табарынаң республика ӱлгӱлері, аэропорт устағ-пастаа паза хырығлар хадағҷылары айғазарлар.
2017 чылда "Сибирьі" авиакомпания Ағбан - Новосибирск - Ағбан рейсті неделяда тӧрт хати тоғындырарға пӧгінче, ағаа хоза, рейстер наа, табырах самолётнаң толдырыларлар. Кізее Ағбаннаң Новосибирсксер пір часха чидіп аларға чарир. Анда, тізең, чоллар 60 орынзар азылча, ол санда 15 пасха хан чирлерінзер. Че, рейс ӱрегліг тоғынмас ӱчӱн, ағаа федеральнай кіннең паза регионнардаң субсидия киректелче. Республика пазы пу сурығӌа аннаң андар чӧптезіглерні апарарға чахаан.
"Ағбан» аэропорт - ол республика чуртағӌыларының на нимес, ідӧк Хызылчар крайының ӱстӱнзархы аймахтарының паза Тува чуртағӌыларының хонӌых регионнарзар, Москвазар паза хай пірее пасха хан чирлерінзер табырах чидіп алҷаң оңдайы. Аны чуртағӌыларға хайраллап халар ӱчӱн, тоғызын тилідерінӌе, чахсыландырарынҷа ам даа улуғ тоғыс апарарға кирек. Республика ӱлгӱлері аэропорттың устағ-пастаанаң, партнерларнаң хада-пірге тоғынарға, сурығларны пӧгерге тимде.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде