КНИГА - ИҢ ЧАХСЫ СЫЙЫХ
03.11.2016
Хабарлар
Ирткен неделяда Асхыс аймааның М.Е. Кильчичаковтың адынаң ӧӧн библиотеказында «Книга сыйлаҷаң кӱн» мероприятие иртірілген. Ол тиксі Хакасияда иртірілчеткен «Олғаннарға книга сыйла!» чӧрімге чарыдылған.
Таныхтирға кирек, Асхыстағы ӧӧн библиотека мындағ чӧрімні чылда ікі хатап, часхызын паза кӱскӱзін, иртірче. Полған на чыл анда Асхыс аймааның халых пірігістері, организациялары, саблығ кізілері, идінҷектері паза олаңай чуртағҷылары ӧткін араласчалар.
Пӱӱл дее олғаннарға книга сыйлирға килгеннернің саны асхынах полбаан. Кӧзідімге, организацияларның саны хырыхха чағын пол парча. Іди библиотеканы тоғызы ӱчӱн алғыстирға паза сыйыхтар читірерге Асхыс аймааның культура, ГАИ, чонға полызығ пирӌең, аал хонии устаныстарының, аймахтың, аал чӧбінің устағ-пастааның тоғынӌылары килгеннер.
«Сыйлалған книгаларның кӧбізі Асхыстағы олған библиотеказына пирілер. Ол пӱӱл пайрамнығ 60 чылын таныхтапча. Ідӧк пайрамнарын таныхтапчалар Ӱгечі станциядағы, Оот пилтіріндегі библиотекалар. Оларға ідӧк книгалар пирілер. Кічіг ааллардағы библиотекаларзар наа книгалар ызылар. Кізілер пу чӧрімде ӧткін араласчалар, сыйыхтарны прай чӱреенең читірчелер, библиотекаа полызарға харасчалар. «Книга сыйлаҷаң кӱнні» ӧнетін пу чӧрімге хайығ айландырар паза аның араласчыларына алғызыбыс читірер пӧгіннең иртірчебіс. Че книгаларны библиотекаа чӧрім тузында ла нимес, чыл тооза ағыларға чарир», - чоохтаан М.Е. Кильчичаковтың адынаң ӧӧн библиотеканың директоры Зинаида Токоякова.
Сыйыхха олған энциклопедиялары, нымахтар чыындылары читірілген, ідӧк библиотекаа аймах газета-журналларға пазын пиртірлер. Прайзынаң сыйыхтарында алғыстас сӧстерін пас саларға сурынғаннар. Соонаң оларны, сомға суурып, алынҷа кӧрілген стендте хыс саларлар.
Автор :
Татьяна КЫРЖИНАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде