ИБДЕГІ ОСХАС ТАТХЫННЫҒ ПЕЛЬМЕННЕР
09.11.2016
Хабарлар
Аалдағы чонның тоғыс пар полғаны уғаа чахсы. Улуғ нимес предприятиелер азып, идінҷектер кізілерге тоғынар оңдай пирчелер.
Чорых хоостыра Асхыс поселокча чӧріп, чапсых орында пол парғам. Тасхар соох чил полчатхан. Чолда тоғасхан кізілердең мында ізіг чей ізіп алар пірее кафе пар ба тіп сурастырғлаам. «Рынокта пар», - нандыр турғаннар.
Асхыс станцияда тимір чол хоостыра орныхчатхан орамаӌа инчетсең, сала оортах аал рыногы полтыр. Итсе-де, анда улуғ нимес ларектар паза садығ туралары ла турғлапчатхан, кӧбізі чабых полған. Мындағ чирде кафе пар ни тіп, сағысха тӱзібіскем.
Кӧрзем, улуғ арах тас тураның ізии азыхха тӧӧй. Сӱӱмекте час пельменнер тудына, аннаң ирен сых килген. Тура істінде чылығ паза чарых, нинӌе-де стол турча, пулуңда телевизор. Пластик стене кистінде ипчілер чоохтасчатханы истілген. Ол туста аннаң чонны азырапчатхан ипчі сых киліп, ниме чахирзар тіп, минзер айланған.
- Мӱнніг пельменнер паза чей, - чоохтапчам мин.
Ол ипчі чӧрібісті. Мин, тізең, холларым чууп, ипти одыр салып, сағыпчам. Минің соомҷа ікі ирен кір килген. Пір ирен стол кистінзер ирткен полза, пірсі, пір килограмм пельмен алып, чӧрібіскен.
Улуғ частығ аға, кір киліп, суулап тур: «Хыстар, мағаа ікі килограмм пельмен пиріңердек!» Ипчілер маң чохтанчатханда, аға минзер айланған:
- Татхыннығ пельменнер, я!
- Анзынаң чарасчам, мында ибдегі осхас пельменнер тимнепчеттірлер, - чоохтанғам мин.
Полуфабрикаттар тимнепчеткен паза ізіг пельменнернең чонны азырапчатхан кафенің чалахай ээзі Оксана Фроленко полтыр. Аалда кафе алай пельменнай тоғынчатханы мағаа чапсых пілдірген. Итсе-де, ит, ун полза, хоза пызығ холларың, пос киреенең айғазар оңдай табарға чарирох. Асхыс поселокта, тізең, пис муңа чағын кізі чуртапча.
Пельменнайның ээзі Оксана Владимировна хада хонғанынаң тоғысха Ағбаннаң чӧрчеттірлер. Сӧбіре пазы тимір тиснең айғасча осхас. Ӱс пала ӧскірчеттірлер.
- Мының алнында полуфабрикаттарны садыға ла тимнеӌеңміс, - чоохтаан Оксана. - Соонаң кізілер пельменнай азарға сурынғаннар. Столлар турғысхабыс, кірген кізі азыранып алча, ибзер пельменнер алып алча. Пельменнердең пасха, яблахтығ варениктер, котлеттер
итчебіс. Прай ниме холнаң иділче.
Ибдегі осхас татхыннығ пельменнерні сосха паза мал идін поралаан фарштаң тимнепчелер. Муксун, перецтең пасха паза пip дее ниме хоспинчаттырлар.
Пельменнайда тоғынчатхан ипчілернің полғаны ла кӱнде 15-че килограмм пельмен ит салча. Ағаа хоза, котлеттер, варениктер тимнирге кирек. Оксана Владимировна оларға полған на килограмм ӱчӱн ахча тӧлепче.
Пеер аал чуртағӌылары, чолда парчатханнар удаа кірчелер. Городта кафе-пельменнайлар парына піс кӧнік парғабыс, че татхыннығ, ибдегі осхас пельменнерні амзирға удаа киліспинче.
Автор :
Елена САГАТАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде