ӀЗЕНӀС ДУЭТТӀҢ ПӦЗӀК ЧИДИИ
09.11.2016
Хабарлар
(Александр САЛДЫГАШЕВ ӱгретчізі Любовь ГУБОРЧУКНАҢ)
Кинек палаларға кӧріл парған «Теремок» интернаттың ӱгренҷізі Александр Салдыгашев хореограф-ӱгретчізі Любовь Губорчукнаң хада «Inclusive dance» чоннар аразындағы теелбек фестивальында ӱзінҷі орын алып алғаннар.
Пу фестивальда теелбекчілер кинек нанҷыларынаң хада сценаа сыхчалар. Александр Салдыгашев кинектер колясказы полызиинаң чӧрче, 15 частығ хакас оолах теелбектернең хынып айғасча. Фестиваль Москвада ирткен, анда 500 теелбекчі араласхан. Чайаачы ӧмелер прай 12 хазнадаң килгеннер, ол санда Италиядаң, Австралиядаң, Украинадаң, иң кӧп араласчы Россия регионнарынаң полған.
Пастап прай теелбекчілер Христос Арачылағҷының Храмында ирткен гала-концертте араласханнар. Мында «Ізеніс» дуэт заочно ирткен марығ салтарлары хоостыра II степеньніг лауреат атха турысхан. Анаң ікі кӱн чоннар аразындағы марығ парған. Фестиваль тузында хакас чайаачы ӧмее, позының узын кӧзідіп, Европадаң килген саблығ хореографтардаң теелбектерҷе уроктар алар оңдай полған.
Любовь Губорчук «Теремокта» хореограф полып істенче. Ол чоохтапча: «Мастер-класстарда піске кӧп тузалығ чӧптер пиргеннер. Кӧзідімге, Голландиядағы хореограф Сашаа хип-хоп паза этническай кӧстегліг теелбектерге хайығ айландырарға кирек теен. Оолағасха мындағ кӧстегліг теелбектер сынап таа чағыннар, оларның полызиинаң Сашаның узы мыннаң мындар ӧзер тіп ізенчем».
Фестиваль концертнең тоозылған, хайзында «Ізеніс» чайаачы ӧмее «Чылның дебюды» номинацияда «Россияда инклюзив теелбегінің тилізіне улуғ хозым итчеткен ӱчӱн» сыйых читірілген.
Специалисттер таниинаң, «Inclusive dance» осхас фестивальлар паза проекттер кинек олғаннарға постарын таап аларға, чуртасха ӧрінерге полысчалар.
Автор :
Кристина КУЧМЕНКО
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде