ТАНДАҒЫЗЫНА АМОХ ТИМНЕНІП...
11.11.2016
Хабарлар
АСХЫС АЙМААНДАҒЫ ЧОҒАРХЫ АСХЫС ААЛНЫҢ 11-ӌі КЛАССТЫҢ ӰГРЕНӋІЛЕРІ АЛЕКСАНДР ТОЛМАШОВ, МОНИКА ЧАНКОВА ПАЗА НАДЕЖДА ПАКАЧАКОВА 9 НОЯБРЬДА АҒБАНДАҒЫ Н.Ф.КАТАНОВТЫҢ АДЫНАҢ ХАКАС ХАЗНА УНИВЕРСИТЕДІНЗЕР КИЛГЕННЕР.
ХГУ-да 9-11 НОЯБРЬДА «УНИВЕРСИТЕТТІҢ ТОҒАЗЫҒЛАРЫ» АЗЫХ ІЗІКТЕР КӰННЕРІ ИРТКЕННЕР. ЧОҒАРХЫ АСХЫС ААЛНЫҢ ӰГРЕНӋІЛЕРІНЕҢ ПАСХА, УНИВЕРСИТЕТСЕР ІДӦК ХАКАСИЯНЫҢ ГОРОД-АЙМАХТАРЫНАҢ ПАЗА ХОНӋЫХ РЕГИОННАРДАҢ 9-11 КЛАССТАҒЫ ӰГРЕНӋІЛЕР ПАЗА КОЛЛЕДЖТЕРНІ ТООСЧАТХАН ЧИИТТЕР ЧЫЫЛЫСХАННАР.
ӰС КӰН АРАЗЫНА ООЛ-ХЫСТАРҒА РЕСПУБЛИКАНЫҢ ӦӦН ПӦЗІК ӰГРЕДІГ ЗАВЕДЕНИЕЗІНЕҢ ТАНЫЗАРҒА, ЛЕКЦИЯЛАРДА ПАЗА ОЛИМПИАДАЛАРДА АРАЛАЗАРҒА ОҢДАЙ ПОЛҒАН.
Хакас хазна университедінде Азых ізіктер кӱні пӱӱл ікінҷі хати иртті. Пастағызы февральда полған. Хайди чоохтапча ХГУ-ның тӧреміл ӱгредігӌе проректор Наталья Пропой, «Университеттің тоғазығлары» ӱгренӌілерге таңдағы профессияларын таллап аларға полысча. 2017 чылда школаны тоозар оол-хыстар аннаң андар хайда ӱгренерлерін пӱӱнӧк таллап аларға киректер. Олар ХГУ-да постарына кирек специальностьтаңар тирең піліп алчалар паза преподавательлернең чоох алысчалар. Ідӧк, ӱгредіг заведениезінзер кіріп алар ӱчӱн, ноо предметтерҷе экзамен тударға, тиксі нинӌе балл алып аларға кирек поларын піліп алчалар.
Университеттің фойезінде институттарның, факультеттернің, колледжтернің презентациялары ирткеннер, ідӧк «Хада ӱгренелер» кӧзідіг тимнелген, аймах мастер-класстар иртірілгеннер. Олох туста ХГУ-ның аудиторияларында ӧнетін тимнелген лекциялар хығырылғаннар. Анда ӧӧнінде 9-ҷы класстың ӱгренӌілері араласханнар. Университеттің ӧӧн корпузының 307 аудиториязында «Н.Ф.Катанов - ученый-востоковед, тюрколог, просветитель» лекция ирткен. Аны педагогика наукаларының кандидады Клавдия Султанбаева хығырған. Клавдия Ивановна ХГУ-ның тӧреміл педагогика ӱгредиинің институды (ИНПО) школа алнындағы паза ӧнетін ӱгредіг кафедразының доценті полча. Лекцияа НФ. Катановтың адынаң национальнай гимназия-интернаттың ӱгренӌілері хығыртылғаннар.
- Піс лекцияа ученай Николай Фёдорович Катановтың адын ал чӧрчеткен национальнай гимназияның ӱгренҷілерін тиктең хығырбаабыс. Олғаннар ученайның тӧреен чирін, чуртас паза істеніс чолын чахсы пілерге киректер, - чоохтапча Клавдия Султанбаева,
Таныхтирға кирек, ИНПО Хакасия ның олған садтарына хакас тілі ӱгретчілерін, логопедтерні тимнепче. Хайди чарытхан Клавдия Ивановна, уйан чоохтанчатхан палаларның саны хозылчатханда, амғы туста логопедтер улам кирексіністе.
«Университеттің тоғазығлары» ӱгренҷілерге ідӧк баллар тоғынып аларға оңдай пирче. Азых ізіктер кӱннеріне килген 10-11 класстағы ӱгренҷілерге хынған предметче олимпиадада аралазарға чарир полған. Нимее ол кирек? Аннаңар чарыт пирген ХГУ-ның приемнай комиссиязының нандырығлығ хачызы Елена Майнагашева.
- Пӱӱл олимпиадада 400 азыра ӱгренҷі аралазарға кӧңнін искірген. Олғаннар анда аралазарға сағынчатханнары пілдістіг. Олимпиада абитуриенттерге ХГУ-зар кіріп аларға чахсы оңдай пирче. Анда сыйыхтығ орыннарға турысхан абитуриенттер хоза баллар алып алчалар нооза. Кӧзідімге алза, пастағы ӱс орын ӱчӱн пис балл пирілче, марығның араласчыларына, тізең, ікі балл. Чииттер, олимпиадада аралазып, «тоғынып» алған баллар ЕГЭ-ның балларына хозылчалар. Таныхтирға кирек, пір ӱгренҷі нинҷе-нинҷе предметче сыныхтағны иртер праволығ, - чоохтапча Елена Николаевна.
Чоғархы Асхыс аалдаң килген ӱгренҷілер, Хакасияның ӧӧн пӧзік ӱгредіг заведениезінең танызып, ідӧк лекцияларда паза олимпиадаларда араласханнар. Хайди чоохтапча Александр Толмашов, ол чуртазын физиканаң палғалыстырарға пӧгін тутча. Ол аның хынған предмеді полча. Аның сағынған сағызы толар ӱчӱн, чиит оолға пастап хазна сыныхтағларын чахсы иртіп аларға кирек. Аның ӱчӱн Александр амды ЕГЭ-ға кӱстеніп тимненче.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде