ЭЭЗІ ЧОХ АДАЙЛАРНЫ КЕМ ТУДАРҒА КИРЕК?
11.11.2016
Хабарлар
Хакасияның Ӧӧркі Чӧп президиумы 9 ноябрьда теестегі чыылиин иртірген. Ӱзӱрілген сурығларның аразында, ээзі чох халып, пойли чӧрчеткен ибдегі аң-хустарны тутчаң полномочиелерні орындағы пос устаныс органнарына пирердеңер сурығиң таластығ полған.
«Хакас Республиканың муниципальной пӱдістерінің орындағы пос устаныс органнарына, ээзі чох халып, пойли чӧрчеткен ибдегі аң-хустарны тутчаң мероприятиелер иртірер полномочиелерні пирердеңер» республиканың закон проектінең Хакасияның хазна ветеринар инспекциязының устағҷызы Гульнара Керимова таныстырған. Аның чооғынаң, федеральнай законзар кирілген тӱзедіглерҷе орындағы пос устаныс органнарына, ээзі чох халып, пойли чӧрчеткен аң-хустарны (чоох ӧӧнінде ээзі чох адайлардаңар парча. - Авт.) тутчаң мероприятиелер иртірерге право пирілче. Ол тоғыс аалларның паза городтарның орындағы сурығлары санына кирш партыр. 2017 чылның республика бюджедінде ол тоғысты толдырарына 3 миллион 800 муң салковай салыл партыр.
Муниципальнай пӱдістерге наа полномочиелер артар сурығ депутаттар аразында таластар сығарған. Анзы пілдістіг - муниципалитеттер оларның иңніне иртіре кӧп полномочиелер салылча тіп хаӌанох хоптанчалар. Мында, тізең, ээзі чох адайларны тутчаң тоғысты оларғаох пир саларға итчелер. Ӧӧркі чӧптегілер муниципалитеттер хайди ол тоғысты толдырарлар, хайдаң техниканы паза тоғынӌыларны аларлар тіп сурығ пиргеннер. Хайди чарытхан Керимова, сынында ол тоғысты толдырҷаң идінҷектер Хакасияда даа, хонҷых Хызылчар крайында даа пар. Оларның пос техниказы, тоғынӌылары пар осхас. Муниципальнай пӱдістер ол идінҷектернең, чӧптезіглер идіп, тоғынарлар тіп корілче.
Че депутаттарны пу даа нандырығ чӧпсіндірбеен. Орындағы пос устанысча, халых пірігістерінӌе паза нациялар аразындағы хайызығларҷа комитеттің кнезі Михаил Саражаков тоғырланған. «Муниципальнай пӱдістер анзынаң чаразарына ікінҷілепчем. Сірер пос тоғызыңарны оларға артыбызарға итчезер», - таныхтаан ол.
Гульнара Керимова «муниципалитеттер ол тоғысты ідӧк тее толдырчалар, че пос ахчазына» тіп чарытхан. Кӧзідімге ол Ағбан город администрациязы ээзі чох адайларны тутчаң тоғысты ӧткін апарчатханын ағылған. Закон алыл парза, ол тоғысха ахча республика бюджедінең позыдылар тіп таныхтаан хазна ветеринар инспекциязының устағҷызы.
Таластарны Ӧӧркі Чӧп кнезі Владимир Штыгашев тохтат салған. «Закон проекті Ӧӧркі Чӧпсер кирілген тіп санирға. Че законны алар алнында піске аны муниципальнай пӱдістер пастарынаң хада чахсаан ӱзӱрібізерге кирек», - салтар иткен парламент устағҷызы.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде