КӦРІГҶІЛЕРНІ ОЙЫННАРЫНАҢ ПАЗА УСТАРЫНАҢ ХАЙХАТЧАЛАР
11.11.2016
Хабарлар
Пӱӱл A.M. Топановтың адынаң Хакас национальнай драма театрының пайрамнығ 85 чылы таныхталча. Театрның пӱӱнгі чуртазынаңар паза чидіглерінеңер литература пӧлиинің устағӌызы Светлана Селигеева чоохтап пирген.
Хакас драма театрының тархыны пай, аны пір-ікі сӧснең чоохтап полбассың, аннаңар «Хабар» газетада пу сурыға чарыдылған алынӌа статьялар ам даа сығар.
Амғы туста А.М. Топановтың адынаң Хакас национальнай драма театрында ынағ ӧме істенче, аннаң директор Владимир Чустеев устапча. Ӧӧн режиссер Калмыкия искусствозының саблығ деятельі Баатр Колаев полча.
Полған на театр сыбыра тілегде. Ол кӧрігӌілерін наа ойыннарнаң хайхадарға кӱстенче. Андағ пӧгіннең пӱӱл театрзар «Алтын маска» национальнай сыйыхтың лауреады, режиссер Сергей Потаповты хығырғаннар.
Саблығ режиссер Ирландиядағы драматург Мартин Мак Донахтың пьесазынӌа «Инишмаан олтырыхтаң кинек» спектакльны турғысхан. Аның премьеразы февральда ирткен.
Пір ай пазынаң хакас артисттері кӧрігҷілерні хатап наа ойыннаң ӧріндіргеннер. Мартта театр искусствозына хынчатхан улус «Харах оды чохтар хазназы» спектакльнаң танысхан. Наа спектакльның режиссеры - Марас Чебодаев. «Харах оды чохтар хазназы» ойын аның диплом тоғызы полча, чиит режиссер пӱӱл Россияның сцена искусстволарының хазна институдын маңнаныстығ тоозыбысхан. Таныхтирға кирек, пастағы ойынны кізілер аймахти паалаан ползалар, Марас Степановичтің тоғызы прайзының кӧңніне кірген. Спектакль тузында кӧрігӌілер матап айа сапханнар. Тиктең нимес «Харах оды чохтар хазназы» ойынны театрның ӧмезі сентябрьда Пӱрӱт чирінде ирткен «Алтан Сэргэ» чоннар аразындағы фестивальда кӧзіткен. Жюринің кізілері, сыйыхтығ орын пирбеен дее ползалар, театрның наа спектакльын таныхтааннар.
Хакас драма театрының артисттері ідӧк республиканың чуртазында ӧткін араласчалар. Олар чох улуғ пайрамнар даа, танығлығ мероприятиелер дее иртпинчелер. Пӱӱл 3 мартта театрның ӧмезі Хакасияда пайрамни Кино чылын асхан. Аны Хакасияның чон артизі, режиссер Светлана Чаптыкова тимнеен. Танығлығ иир тузында кізілер Россияның кинематографиязына улуғ хозым иткен Хакас чирінің саблығ оол-хыстарын сағысха киргеннер паза хакас артисттер суурынған фильмнернің ӱзіктерін кӧріп алғаннар.
14 апрельде Ағбанда хакас чонның XIII съезді ирткен. Аны тимнирге режиссер Саяна Ултургашева полысхан, ол съездтің культура программазының ӱчӱн нандырған. Делегаттар Саяна Сапиновнаның тоғызын пӧзік паалааннар.
Чиңіс кӱнінде А.М.Топановтың адынаң Хакас драма театрының артисттері «Алӌастан, нымырт» ойынны кӧзіткеннер, аны режиссер Светлана Чаптыкова турғысхан. Хакас чонның ырларынаң, тахпахтарынаң паза теелбектерінең пӱткен ойын кізілернің кӧңніне кірген. Тасхар соох таа полған полза, олар аны хынып кӧріп алғаннар.
Анаң олғаннарны арачылаӌаң чоннар аразындағы кӱнде театрның ӧмезі «Мир добра» фонднаң хада пӱӱл республиканың кічіг чуртағӌыларына ундудылбас ӱлӱкӱн сыйлап пиргеннер. Оолағастар паза хызыҷағастар режиссер Саяна Ултургашева турғысхан «Анзы ӧӧні нимес» наа ойынны кӧріп алғаннар, олар ідӧк артисттер тимнеен аймах марығларда араласханнар, театр экспозицияларынаң танысханнар.
«Сибер Ил» чоннар аразындағы культура-турист форумда А.М. Топановтың адынаң Хакас драма театры тӧреміл араласча. Пӱӱл сценаның устары «От паза тимір» улуғ нимес ойын кӧзіткеннер. Аны театрның ӧӧн режиссеры Баатр Колаев турғысхан. Тун пайрамға килген чонны Хакасияның чон артизі Светлана Чаптыкова тимнеен «Айраннаңар кип-чоох» театрализованней программазы аптаан.
Хакас драма театры ӧсчеткен тӧлге улуғ хайығ салча, Режиссерлар кічіг кӧрігҷілерні чыл сай наа ойыннарнаң ӧріндірчелер. Олғаннарны театрға кӧніктірерге пӧгініп, тоғынҷылар 11 ӱгредіг программа тимнеп салғаннар. Пу программалар хоостыра чиит улусха театрӌа экскурсиялар иртірілчелер, оларға саблығ артисттернең тоғазып аларға оңдай пар.
Олғаннарның кӧңніне «Музыкалығ хакас ибі» программазы тың кірче. Композитор паза «Хазыр суғ» ансамбльның устағҷызы Тамара Давлетова оларны хакас чонның кӧг тиріглерінең таныстырча, тахпахтар паза сарыннар толдырча. Ӱгретчілер, тізең, «Алыптығ нымах» проектті пӧзік паалапчалар. Андар хакас чонның кип-чоохтары паза алыптығ нымахтар пастыра турғызылған ойыннар кірчелер. «Албынӌы» алыптығ нымахты сценада кӧріп алған соонда, ӱгренҷілер пу произведениені чахсы оңар сыхчалар.
Пайрамнығ чылда Хакас драма театры Россияның театр деятельлерінің пірігізі чарлаан гранттар мариинда араласхан. Чайаачы ӧме тимнеен проект ол марығда чиңісчі полыбысхан. Амды пирілген ахчаа театрда «Маугли» этно-мюзикл турғызарлар.
Пӱӱл Россияның театр деятельлерінің пірігізі ідӧк таланттығ артист Сергей Чебодаевті таныхтаан. Чиит кізі «Чылтыстар чох тигір» пьеса пас салған. Аның ӱчӱн хакас оолға хазна стипендиязы читірілген.
2016 чылда А.М. Топановтың адынаң Хакас национальнай драма театрында тоғынчатхан кӧп чайаачы артисттер пайрамнығ тӧреен кӱннерін таныхтааннар. Прайзына кӧзідім полча Хакасияның чон артизі Нина Дмитриевна Баинова-Саражакова. Хакас драма театрынаң хада пір чылда тӧреен чалахай кӧңніліг ипчі артист ле поларға чайалған, неке. Сентябрьда Нина Дмитриевна позының пайрамнығ чазына паза 60 чыл театрда істен салғанына чарыдылған концерт программазын кӧзіткен.
70 чазын Хакасияның саблығ артизі Юрий Иванович Котюшев таныхтады. 40 артиинаң чыл аразына ол сценада 200 аймах ома чайап салған. Хакасияның чон артизі, режиссер Юрий Матвеевич Майнагашевке 65 час толған. Пайрамнығ иирде Хакас драма театрында сценаның узы турғысхан «Пыром таста, чирім» ойынны кӧзіткеннер. Пӱӱл 65 чазын ідӧк алғым таныхтааннар Россияның саблығ артизі Гульфия Гумеровна Кокова паза Хакасияның чон артизі Виктор Сергеевич Коков.
Чайғызын пайрамнығ чазынаң театрның ӧмезі Хакасияның саблығ артизі Инна Ананьевна Майнагашеваны алғыстаан. Кӧп чыллар ол Абахай Пахтаның рольын чалтырама толдырған. Хакас драма театрында Инна Ананьевна 25 чыл тоғын салды. Олох син чыл артист полып істенче Сергей Николаевич Доможаков. Кӧрігҷілер ол чайаан омаларны пӧзік паалапчалар. 1996 чылда Хакас драма театрынзар тоғынарға килген чиит артист Саяна Сапиновна Ултургашева. 20 чыл аразына чайаачы ипчі кӧп чидіглерге читкен. 2015 чылда ол турғысхан «Ахол» ойын Москвада «Алтын маска» сыйыхтың «Маска Плюс» программазына кирілген.
Пӱӱн 11 ноябрьда А.М.Топановтың адынаң Хакас национальнай драма театры пайрамнығ сезонын асча. Кӧрігҷілерге артисттер «Алаахтыртхан Хорхло» саблығ ойынны кӧзідерлер. Кӧрігӌілерні ідӧк декорациялар паза кип-азах кӧзідии сахтапча. Килген кізілерні театр тоғынӌылары татхыннығ ирбен чейінең паза талғаннаң сыйлирлар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде