ЧАЙААЧЫ УСТАРНЫҢ ТОҒЫСТАРЫ
11.11.2016
Хабарлар
Пу неделяда С.П.Кадышевтің адынаң культура кінінде ікі чапсых кӧзідіг азылған. Пастағызы «Ӱгретчі паза ӱгренҷілер» адалча, аны Хакас хазна университедінің декоративно-прикладной искусство кафедразы тимнеен. Ӏкінӌі кӧзідии, «Соох апсахтың узанӌаң туразы», Наа чылға чарыдылған.
ПАЙРАМНЫҒ КӦЗІДІГ
Декоративно-прикладной искусство кафедразының пӱӱл танығлығ чыл. 1 декабрьда ол 15 чылын таныхтапча. Пайрамға удур ӱгретчілер кӧрігҷілерні студенттернің диплом тоғыстарынаң таныстырарға чаратханнар. Кафедраның устағҷызы, культурологияның кандидады Оксана Киштеева чоохтаан: «Пістің студенттерібіс аймах тоғыстар чайапчалар, че кӧзідіге піс панноларны, хоостарны паза гобеленнерні таллап алғабыс. Ідӧк мында ӱгренҷілерібіс иткен кӧклӧлерні паза нымзах ойнаӌахтарны кӧріп аларға чарир. Полған на диплом тоғызы ӱгретчінің устаанынаң тимнелче, аннаңар піс кӧзідігні «Ӱгретчі паза ӱгренҷілер» адап салғабыс».
Устарның 45 тоғызы аразында кӧрігҷілернің хайиин «Алтын Арығның тӧреені» гобелен тартхан. Аны Оксана Поддубная чайаан, наука устағӌызы Жанна Ошкай полча. Хоосчының кӧрізінең, Алтын Арығ сарығ састығ абахай хыс полтыр, че олох туста ол чааҷы. Аның пазында чаа пӧрігі, кӧксінде - пик хуйах. О.Поддубная Алтын Арығның тирең сағысха тӱзібіскенін кӧзітче. Аны кӧріп, минің мындағ сағыс тӧреен: наа ла тӧреен хыс позының ӱлӱзінеңер піліп алған полар.
Таныхтирға кирек, кафедраның тоғынҷылары кӧзідіге аймах оңдайнаң толдырылған тоғыстарны сығарғаннар. Кӧзідімге, Людмила Тиспирекова ӱгретчізі Елена Гузеватованың устаанынаң «Чылның тустары» панно, чібекнең хоостап, чайаан. Пастап корзек, паннода ӧңніг чіптернең хати-хати пір орнамент хоостал партыр. Анаң на оңарып алчазың, чайаачы ус іди айларны таныхтап салған.
Сизінгенде, студенттернің диплом тоғыстары ӧӧнінде Хакасияның культуразына паза тархынына чарыдылған, че пасха темаларға даа хайығ айландырылтыр. Ольга Володинаа театр чуртазы чағын полтыр, аннаңар ол наука устағҷызы Наталья Хлебникованың полызиинаң «Шекспир тузындағы театр» хоосты чайаан.
Кӧзідігде кізілерге ідӧк студенттер иткен кӧклӧҷектерні паза ойнаҷахтарны кӧріп аларға чарир. Мында Лалита Ивяшкявичутенің абаҷахтарын таныхтирҷыхпын. Чиит хыс Тедди абаҷахтарға чарыдылған диплом тоғызын тимнептір. Наталья Фитина устаанынаң ол уғаа ачыныстығ ойнаӌахтар ит салған.
СООХ АПСАХТЫҢ СЫЙЫХТАРЫ
Студенттернің диплом тоғыстарынаң танысхан соонда, килген чон «Соох апсахтың узанҷаң туразы» кӧзідіг-марығны кӧрерге парған. Наа чылға чарыдылған кӧзідігні иртірері кибірге кір парған, пӱӱл ол тӧртінҷі хати иртче. Аның тоғызында Хакасияның прай чайаачы устары хынып араласчалар.
Кӧзідіге олар аймах оңдайнаң иділген Соох апсахтарны, Хар хызыҷахтарны, сыбыӌахтарны, наа чыл ойнаҷахтарын тимнеп салтырлар. Че иң кӧп петугастар полғаннар. Анзы тиктең нимес, чағдапчатхан 2017 чылның ээзі петук полар.
Ус холлығ кізі хайдағ даа нимедең аймах ниме-ноолар чайап полча. «Соох апсахтың узанӌаң туразы» кӧзідіге пастағызын на килген кӧрігчілерні кофе ӱреннерінең иділген сыбыӌах чапсытхан. Ағаа хоза, Копьев аалдағылар иткен ойнаӌахтаң уғаа тадылығ чыс сабылған. Пыдырахтағы «Кӱніңек» олған садының воспитательі Наталья Торокова аарлығ кофе орнына вата дисктерін алып алтыр. Аның «Тоннығ сыбыҷах» тоғызына кӧрігҷілер ӧкерсінчеткеннер.
Петуктарзар айланза, оларны чайаачы устар фанерадаң, нинӌідең, чаҷыннаң паза пасха даа нимелердең иткеннер. Полған на ойнаҷах пос оңдайнаң чайалған.
Кӧзідімге, нымырхадаң наа ла чарылған пипеӌектер уғаа ачыныстығ кӧрінгеннер. Елена Комелягина иткен петук, сынап таа, чағдапчатхан 2017 чылның ээзі чіли одыр салтыр. Че прайзын хоосчы Зульфия Тодыкова чайаан петуктар аптаан. Пірсі чоон, кеен, хакас нымахтарынаң сыххан осхас. Аны Зульфия Владимировна фетрдең паза киистең иткен, анаң сіліг мархаларнаң паза нинӌінең чазаан. Ікінӌі петугы улуғ нимес, че чайаачы ус аны алтын ӧңніг нинӌінең сіліглеп салған, аннаңар ол ырахтынох пызыңнапча.
Ідӧк «Соох апсахтың узанӌаң туразы» кӧзідігде хоостарны, панноларны, открыткаларны, подушкаларны, магниттерні кӧріп аларға чарир. Прай тоғыстар садылчалар. Декабрь айының пастағы чардығында С.П.Кадышевтің адынаң культура кінінде мастер-класстар иртірілер. Мастер-класстарға азынада пазын саларға кирек, аралазарға сағынчатсаңар, ДПИ паза ИЗО пӧлиинзер 24-05-66 телефонӌа сығдырадыңар.
Кӧзідіглер 23 декабрьға теере тоғынарлар. Оларны кӧріп аларға маңзыраңар!
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде