РЕСПУБЛИКАА ИНЖЕНЕР КАДРЛАРЫН ТИМНИРЛЕР
15.11.2016
Хабарлар
Хакасияның пазы Виктор Зимин Сибирьдегі федеральнай университеттің ректоры Евгений Вагановнаң тоғыс хоостыра тоғасхан. Анда ідӧк республиканың ӱгредіг паза наука министрі Галина Салата, СФУ филиалы полчатхан Хакас техническай институттың директоры Елена Бабушкина араласханнар.
- Мағаа хаӌан даа ӱгредігнең, науканаң айғасчатхан кізілернең тоғазарға чапсых. Сірернің тоғызыңар уғаа кирек, ол чох пол полбассың. Ол палаларны, таңдағы специалисттерні ӧскірері. Анзы экономика ӧзізіне, Чир-суубысты арачылирына чахсы хабасча, - теен Виктор Зимин.
Регион устағҷызы республика амғы туста промышленность кӱзін тилідердеңер улуғ презентация иртіреріне тимненчеткенін таныхтаан. Промышленностьтың полған на отрасльына инженер ӱгредігліг пӧзік квалификациялығ специалисттер киректелер. Промышленность тилізінең хада Хакасиязар ідӧк наа технологиялар килер, иң пурун экологияны арачылирына кӧстегліг. Промышленность инфраструктуразы, логистика, аймах отрасльлар сферазы тилир.
Евгений Ваганов Хакас техническай институт инженер кадрларын тимнеӌең ӧӧн ӱгредіг учреждениезі полар тіп кӧрілчеткенін таныхтаан.
- Пістің ӱс филиал халған, олар піске ӧӧннер полчалар. Университеттің пӧгіннері улуғ, піс Россия паза чоннар аразындағы синде филиаллар чахсы кӧзідімніг ползыннар тіп сағынчабыс, - теен Ваганов.
Хайди ол таныхтаан, Хакасия улуғ проектін чуртасха кирері хоостыра университетке иң киректелчеткен специалисттерні тимнирінӌе алғым пӧгін турғыс салза, орта полар. СФУ ректоры республиканың прай пӧзік ӱгредіг учреждениелері, ідӧк ортын специальность ӱгредіг учреждениелері кадрларны тимнирінӌе тоғысты удур-тӧдір палғалызып апарарларына ізенізін читірген.
Тоғазығның салтарларынӌа Виктор Зимин Хакасияның ӱгредіг паза наука министріне инженер кадрларын кӧстегліг тимнир сурығларҷа тоғыныбызарға чахығ пирген.
Автор :
"Хабар"
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде