ЧУРТАСТА ПОЗЫНЫҢ ОРНЫН ТААП АЛҒАН
15.11.2016
Хабарлар
Аал хониинда тоғынарға оой нимес. Улам малнаң айғасчатханнарға. Хайдағ даа хыйға техника сағынып алзалар, малның алығын алып аларға кізі чох киліспинче.
Кізінің чылығ, нымзах холы чох малнаң чахсы нандырығ сағып полбассың. Итке ӧскірчеткеннерні сала пос арах тутчатса, сӱт пирчеткен інектернең кӧп тоғынарға килісче. Пастап оларны ӱгредіп аларға кирек. Анаң пір туста саап турарға. Тилем кізі, інек сағҷаң полып, ӱр сыдаспинча.
Таштып аймаандағы Индіркі Ибігде чуртапчатхан Валентина Валерьевна Миягашева позының чуртас киреен інек сағҷаң поларында тапхан тізе, саба полбас, неке. Ол тоғыста кӱлӱк ипчі 12 чыл істен парир. Халғанчы пис чыл «Нива» ООО-да тоғын парча. Аның холында 100 пас інек. Полғанының на позының хылии, оңдайы.
- Інек кізі осхас нооза, позынзар чахсы хайыға хынча: піреезін чазыхтырарға кирек, піреезіне, тізең, хатығ чоохтанарға, - тіпче Валентина Миягашева.
Валентина Валерьевнаның тоғызы 6.00 час иртен пасталча. Ол тусха Таштыпсар чидіп алар ӱчӱн, ағаа 04.00 частох турарға килісче. Чуртапчатхан аалы тоғыс орнынаң сигісче километр оортах. Машиналығ даа тарт чӧрчетселер, чолға тус илееде парыбысча.
Тоғыстың иирдегі чардығы 18.00 часта пасталча.
Інектерні саап алған соонда, ідіс-хамысты чууп салғанӌа, малларға чиис сал пиргенҷе, 22.00 часха чит парыбысча. Ибде итчең нимелер парох нооза.
Хайди прай ниме идерге маңнанчазар тіп сурғанымда, Валентина Валерьевна піди нандырған: «Кӱнӧрте, інек саар тус аразында, ибде хайынарға маңнанчам. Хызыҷаам чахсы полысча».
Мындағ ниик нимес, че чонға уғаа кирек тоғысты толдырчатхан кізілер улуғ аарласта поларға кирек. Оларның сылтаанда городтағы, улуғ ааллардағы чонның столында сӱт тамаа сыбыра пар.
Пӱӱл хакас чонның улуғ пайрамында - Ӱртӱн тойында - Валентина Валерьевна пӧзік атха турысхан. Улуғлар чӧбінің адынаң ағаа «Чыл кізізі» аарластығ ат пирілген. Минің сағызымнаң, ол андағ паалаға турыстығ.
Автор :
Георгий КУНУЧАКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы