ӰГРЕДІГДЕ - АРТЫХТАР, МАРЫҒДА - УСТАР
16.11.2016
Хабарлар
АҒБАНДАҒЫ Н.Ф.КАТАНОВТЫҢ АДЫНАҢ НАЦИОНАЛЬНАЙ ГИМНАЗИЯ-ИНТЕРНАТТА ЧУРТАС ХАЙНАПЧА ТІЗЕ, ПІР ДЕЕ АЛӋААС ПОЛБАС ТІП САҒЫНЧАМ. АНЫҢ ӰГРЕНӋІЛЕРІ РЕСПУБЛИКА ДАА, ТИКСІ РОССИЯ СИНІНДЕ ДЕЕ ИРТЧЕТКЕН МАРЫҒЛАРДА УДАА АРАЛАСЧАЛАР. ГИМНАЗИЯЗАР КІРЗЕҢ, ӰГРЕНӋІЛЕР УРОКТАР СООНАҢ АЙМАХ ФАКУЛЬТАТИВ, КРУЖОК-СЕКЦИЯЛАРҒА МАҢЗЫРАПЧАТХАННАРЫН УДАА КӦРЕРГЕ КИЛІСЧЕ. ІДИ АЙМАХ КРУЖОКТАРҒА ЧӦРІП, ОЛҒАННАР АНАҢ ІДӦК УЛУҒ ЧИДІГЛЕРГЕ ЧИТЧЕЛЕР. АНЫ НАЦИОНАЛЬНАЙ ГИМНАЗИЯНЫҢ ТЕЕСТЕГІ ЧИДИИ КИРЕЧІЛЕПЧЕ.
Ӱр ниместе пістің редакциязар гимназияның воспитательлері сығдыратханнар. Ӱгредіг организациязының ӧмезі, Владимир городсар фестивальға чӧріп, аннаң сыйыхтығ орыннығ айлантырлар. Ӧріністіг, поғдархастығ оларның ӱчӱн! Піс чиңіс тутхан ӱгренӌілернең паза оларның воспитательлерінең тоғазып алғабыс.
Тиксі Россиядағы «Ынархас-2016» национальнай культураларның олған фестивальы 1 - 5 ноябрьда Владимир городта ирткен. Аның тӧстегҷілері «Дом мира» чииттернің регионнар аразындағы халых пірігізі - Россия чоннары ассамблеязының Владимирдегі региональнай пӧлии, «ВОРТЭКС» МЦСТ-дағы (Москва г.) Чоннар аразындағы орыс теелбек кіні паза Владимир облазы администрациязының чииттер политиказынҷа комитеді полча. Анда 40-ха чағын регионның ӱгренҷілері постарының культуразын сарын, теелбек пастыра кӧзіткеннер.
Оларның аразында Хакасияның ӧмезі 2-ӌі орынға турысхан! Ол чиңісті тутханнар национальнай гимназияның 9 «Б» класстың ӱгренӌілері паза пip олған Ағбандағы 24 № школадаң. Марыға олғаннарны, тимнеп, апарғаннар гимназияның 9-ӌы класстың воспитательлері Римма Сергеевна Боргоякова паза Карина Валерьевна Угдыжекова.
Марығ соонаң Римма Боргоякова сағызынаң ӱлесче:
- Владимир городта национальнай культураларҷа фестиваль иртердеңер гимназиязар искіріг килгенде, олғаннар сах андох марығда аралазарға сағыстарын искіргеннер. Анда хазнаның прай даа регионнары аралазарын азынада пілгеннер. Тимненіс сентябрь-октябрьда хатығ парған. Ӱгренҷілер матап чӱрексееннер. Анзы тиктең нимес. Пістің ӧме гимназия істінде ле сценаа сыххан нооза, нинҷе-де ле хати республика марығларында араласхан. Піс, пастағызын на мындағ улуғ марығда аралазып, 2-ҷі орын алғаны ол улуғ чидіг тіп санапчам. Жюридегілернің аразында хайдағ ӧмее сыйыхтығ орын пирердеңер кӧп талазығлар полған.
Піс жюрині, кӧрігҷілерні, марығ араласчыларын позыбыстың сіліг ыр-кӧглерібіснең, теелбектерібіснең паза пай кип-азаабыснаң аптап алғабыс тіп сағынчам. Піске теелбек турғызарға чахсы хабас пирген Аима Амзаракова, сарын тимнирге Ольга Карачакова полысхан. Оларға улуғ алғызыбыс читірчебіс.
Гимназияның ікі воспитательi Римма Боргоякованаң Карина Угдыжекова ӱгренҷiлерін 5-ӌі класстаң ала ӧскірчелер. Хайди чоохтапчалар воспитательлер, оларның клазына хакас тілінең чахсы чоохтасчатхан олғаннар алылғаннар. Аннаңар воспитательлер класста ӧме тӧстеп аларға сағыныбысханнар. Пу сағыснаң ӱгренӌілер дее, оларның іӌе-пабалары даа чарасханнар. Іди класста «Айтыс» ансамбль тӧстелген. Гимназияда ол чалғыс класс, хайзында олғаннар ансамбльы тӧстелген. Мин Римма Сергеевнадаң хайди пір классха чайаачы ӱгренҷілерні чыып алғазар тіп сурғанымда, ол піди нандырған:
- Сынында прай ниме ӱгренҷінің кӱстенізінең палғалыстығ полча. Сизінгенде, аймах кружок-секцияларға чӧрчеткен олғаннарох чахсы ӱгренчелер, олимпиадаларда пӧзік пілістер кӧзітчелер. Пір дее нименең айғаспинчатхан олған ідӧк уйан пілістіг полча. Пістің ӱгренҷілер ибдегі тоғыс идібіскен, факультативке пар килген соонаң кӱрес секциязына алай ба репетицияларға маңзырапчалар. Минің кӧрізімнең, полған на олғанның чайаачы оңдайы пар. Аны палаа тилідерге полыс пирерге кирек. Пістің «Айтыс» ансамбльға Харағай, Чыланнығ, Маткичіг, Чоғархы Киндірліг, Ӱс чул паза даа пасха ааллардаң килген олғаннар кірчелер. Олар прайзы даа чайаачы оңдайлығ. Кем-де сарында, кем-де теелбекте ус полча, хайзы, тізең, чахсы хоостапча.
Мындағ марығда араласхан соонаң 9 «Б» класстың ӱгренӌілері Максим Мамышевнең Ангелина Токоякова сағыстарынаң ӱлесчелер.
- Марығда араласхан ӱчӱн піс матап ӧрінчебіс. Піске анда пасха ӧмелерні кӧріп аларға паза позыбыстың узыбысты кӧзідерге оңдай полған. Анда кӧп кізілернең танызып алғабыс. Пістің комнатабыс калмыктарнинаң хости полған, аннаңар піс оларнаң чағын танызып алғабыс, фестивальда хада-пірге тудынғабыс, - тіпче Максим.
- Улуғ фестивальда, пастағызын на аралазып, 2-ҷі орынға турысханыбыс уғаа поғдархастығ паза ӧріністіг. Владимир уғаа улуғ паза арығ город полтыр. Пісті аймах музейлерҷе, тигіриблерҷе ал чӧргеннер, - чоохтапча Ангелина.
«Ынархас-2016» фестиваль пӱӱл алтынӌы хати иртті. Олғаннарның устарын Москвадаң килген улуғ аалӌылар паалааннар. Іди 1-ғы орынны Армения алып алған, 2-ҷі орынға Хакасияның ӱгренҷілері турысханнар, 3-ҷі орын, тізең, Иванов облазына пирілген. Гран-прині Калмыкия алып алған.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде