НААҶЬІЛАЛҒАН ШКОЛА-САДТА ӰГРЕНЕРГЕ ДЕЕ ЧАХСЫ
18.11.2016
Хабарлар
Россия тимір чолларының Хызылчар магистральының Асхыс посёлокта «РЖД» ОАО-ның 68 № «Пасталығ школа-олған сады» ӱгредіг учреждениезінде пӱӱл тиксі тыхтағ тоғыстары иртірілген. Аның устағҷызы Алёна Александровна Терёхина полча, ол учреждениеде иртірілген тоғыстардаңар, ӱгредіг киреенеңер чоохтап пирген.
Пу школа-олған сады тимірчолӌыларның палаларына 1994 чылда азылған. Аннаң пеер 22 чыл ирт парды. Пу тусха пастағызын на мындағ улуғ тыхтағ тоғыстары иртірілтір: школа-садтың тасты-істін иптееннер, хыр алыстырылған, чылығ пирҷең система кирілген, чарытхы нааӌылалған. Пӱӱнгі кӱнге килістіре наа тиріглер турғызылған. Олғаннарға истіг ӱгренер прай оңдайлар пар, іӌе-пабалар паза ӱгретчілерге дее ӧріністіг.
- Пістің школа-садсар ӧӧнінде тимірчолҷыларның палалары чӧрчелер. Пілдістіг, станциялығ аалдағы чонның кӧбізі тимір чолда істенче, - чоохтаан А.А.Терёхина. - Олған садынзар 124 пала чӧрче, олар 1,5-7 частығлар. Пасталығ школада 75 олған ӱгренче. Олған сады соонаң палалар парталар кистіне одырчалар.
Школа-олған садының тӧстегңізі «РЖД» ОАО полча. Оларға Москвадаң полызығ пирілчеттір. Россияда мындағ 275 тиксі ӱгредіг учреждениезі тоғынча, анда 42 муң олған ӱгренче. Олардаң - 226 олған сады, 19 - тиксі ӱгредігліг школа, 30 - школа-интернат.
Октябрь пасталғаннаң школаа чылығ пиріл сыхханда, олғанахтарға бассейнзер чӧрерге чарир. Бассейнде дее наа тиріглер турғызылған нооза. Суғны арығлапчатхан хлорканаң амды тузаланминчалар. Анда суғ автоматика полызиинаң чылыдылча, арығлалча.
Пір тиң температура поларға кирек. Суғ соопчатса, чылытчаң тиріг позы тоғынып пастапча. Бассейнде олғаннарны суғда чӱс чӧрӌең аймах ойнаӌахтар сағыпча. Олған садының палаларына частары хоостыра 20 минутаӌа суға сомарға чарадылчатса, пасталығ класстарда ӱгренчеткеннерге - 45 минута. Полған на класс паза группа неделяда nip хати бассейнзер сомарға чӧрче.
Школа-садтың пастағы хадылында библиотека, столовай орныхча. Олған садының палаларын группаларында азырапчалар, ӱгренҷілер, тізең, столовайзар чӧрчелер. Сад 7.00 час иртеннең 19.00 часха теере тоғынча, анда олғаннарны кӱнде пис хати азырапчалар. Школа-садта ӱгретчілер, воспитательлер паза техническай тоғынӌылар істенчелер, тиксі - 71 кізі. - iкінӌі класстаң хакас тіліне ӱгретчелер, - чоохтаан Алёна Александровна. - Хакас тілі уроктарын Надежда Никитична Кыржинакова апарча. Пістің мында кічіг музей-ибіҷек турғызылған. Аны хоостыра олғаннар хакас кибірлерінең, тархыннаң танызып ӱгренчелер.
Мында олғаннарға ӱгренер, ойнир, чахсы азыранар прай оңдайлар пар тиирге кирек. Городтарда даа мындағ олған садтары чоғыл. ІІІкола-садтың ӱгренҷілері аймах, республика паза Россия синінде иртірілчеткен марығларда араласчалар. Пӱӱнгі кӱнде «Орыс абаҷах» ӱгренӌілер мариина тимненіс парча.
Кӱнӧрткі азырал соонаң ӱгренӌілер ибдегі тоғысты толдырчалар. Пасталығ школа 15.00 часха теере тоғынчаттыр. Алёна Александровнанаң 2-ҷі классар кіргебіс. Палалар ӱгретчіні ибір салтырлар. Ӱгретчі, тізең, алҷаастарын тӱзедіп, чӧптер пирчеткен.
Таныхтирға кирек, пу школа-садтың кӧстегліг ӱгредии - тимір-чолӌыларның тоғызы. Аннаңар коридордағы стендтер чоохтапча. «Піс хан тигірзер учуғарға сағынминчабыс, піс тимірчолӌылар поларға сағынчабыс!» хыйғы хайығ тартча.
Школа-садтың стенезін чахсы ӱгренген, кічіглеріне кӧзідім полчатхан олғаннарның сомнары чазапча. «Кічіг тимірчолӌы» стенд Россия паза Хызылчар тимір чолларының тоғызынаң таныстырча. Хызылчар тимір чолларының пастыгы В.Г.Рейнгардттың сомы анда парох.
Олған тузы хаҷан даа часкалығ ползын тіпчелер. 68 № пасталығ школа-олған садының ӱгренӌілері чахсы пілістер алчалар тиирге кирек. Оларны пілістіг ӱгретчілер паза воспитательлер ӱгретчелер нооза. Нымахтағы осхас чазағлығ ікі хадыл школа-садсар палалар хынып чӧрчелер.
Автор :
Елена САГАТАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде