ТЕЕЛБЕКТЕЗІП МАРЫҒЛАСТЫЛАР
22.11.2016
Хабарлар
Асхыстағы культура туразында уғаа хынығ марығ ирткен. Аймахтың культура тоғынҷылары теелбекче марығласханнар.
Аймахтың чуртазында ӧткін араласчатхан аал чӧптеріндегі культура тоғынӌылары килтірлер. Теелбек марығлары ікі номинацияҷа ирткен: чоннар теелбектері паза амғы тустағы наа теелбектер.
«Чон теелбектері» номинацияда Асхыстағы олған искусство школазының ӱгретчілері цыганнар теелбегін толдырғаннар. Маңат тимнентірлер, — киптері дее килістіре. Хыстар чайылӌах кӧгенектер идектерін пулғап сыхханнарында, залдағы чон айа сабызынаң удурлаан. Прай теелбек пір-ікі ле ирт парғанға тӧӧй полған.
«Хуртуйах тас» музей тоғынҷылары «Дюймовочка» теелбек тимнептірлер. Хандыра теелбек. Дюймовочка - ол кічиӌек хызыҷах нооза. Пістің хыстарға ол уғаа килістіре. Хайди иптіг теелбек салчалар, музей чазызында кӱннең кӱнге іди иптіг пазыттығ хайынчатханнарға тӧӧй.
Асхыстағы культура туразының тоғынҷылары Индия чонының теелбегін тимнептірлер. Уғаа кӱлкістіг: раджа полчатхан оол - уғаа ніске табан, оларның раджалары, тізең, килкім не ооллар поладыр. Аның хыринда хойралысчатхан ікі хыс уламох килкім. Чон кӧбізін ағаа ээрескен полар.
«Амғы тустағы теелбектер» номинациязы пасталыбысханда, сценаа писхамҷыдағылар сыхханнар. Олар «Буратино» нымахтаң «Поле чудес» кизегін толдырғаннар. Тӱлгӱ полчатхан хыс уғаа килістіре теелбектенген, полчатхан оңдайы даа, пазыды чи - кӧйтік тӱлгӱ сах пу кӧрінче.
Калининдегі культура туразының тоғынӌылары «Кип-азах чуупчатханнар» кӱлкістіг теелбекті турғысханнар. Кирек оңдайында Италияда полчатханға тӧӧй, кӧӧ прай оларни. Ипчілер аразында кип-азах чуғӌаң пір ирен пол партыр. Олох иренге ипчілернің істіне кисчең чоон ыстан орта пол партыр.
Іди ирен ол чоон ыстанны хада тоғынчатхан ипчілерге синеп тут чӧрче, андох ӧл сӱбӱрекнең сохтырып алча.
Орыннарны піди ӱлескеннер: «Амғы тустағы теелбектер» номинацияда III орынны «Хуртуйах тас» музей тоғынӌыларына пиргеннер, II орынны - писхамҷыдағыларға, I орынны - Калининдегі культура туразының тоғынҷыларына. «Чоннар теелбектері» номинацияда III орынға Кызластағы культура туразының тоғынҷылары турысханнар, II орынға - Асхыстағы культура туразының тоғынӌылары, I орынға - ус олған искусство школазы.
Пасха араласчыларға, марығда араласхан ӱчӱн, пічіктер читірілген.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде