ТӦРЕЕН ЧИРІМНІҢ КӦГЛЕРІ
23.11.2016
Хабарлар
Ирткен неделяда В.Г.Чаптыковтың адынаң республика филармониязында «Тӧреен чирімнің кӧглері» хайхастығ концерт полған.
Постарының чайаачыларынаң кӧрігҷілерні Хакасияның чон артисттері Нина Идимешева паза Людмила Арыштаева, Россияның паза Хакасияның саблығ артизі Евгений Улугбашев, Хакасияның саблығ артизі Мария Янгулова ӧріндіргеннер. Саблығ ырҷыларның репертуарына кӧп аймах сарын кірче, концертке, тізең, олар кӧрігӌілернің иң хынчатхан хакас кӧглерін таллап алғаннар. Концерт ікі чардыхтаң пӱткен, пастағы пӧлиинде кӧрігҷілер чон сарыннарын искеннер.
Пастап сценаа Нина Серафимовна Идимешева сыххан, Ол «Саралӱӱс», «Сын киртініс», «Хызамастың ыры», «Кӱскӱдегі чирім» сарыннарны толдыр пирген. Кізілер хызылларның, Евдокия Тыгдымаеваның, Георгий Челбораковтың кӧглерін хынып искеннер. Че уламох кізілернің кӧңнін «Аалыӌаам» сарын кӧдірген. Аны истіп, полған на кӧрігҷі постарының тӧреен аалын сағысха кирген, неке. Нина Серафимовна Харағай паарынаң полчатханын хаҷан даа - ундубинча. Пу сарынға сӧстер ол позы пасхан, музыканы, тізең, композитор Юрий Киштеев чайаан.
Анаң сіліг хайынаң кізілернің чӱректерін Россияның паза Хакасияның саблығ артизі Евгений Улугбашев тибіреткен. Чайаачы устың прай сарыннары тӧреен Хакасияа чарыдылған. Евгений Александровичтiң «Тӧреен чирім», «Чуртас чолы», «Чирімзер айланчам» ырларын истіп, кӧрігҷілер матап айа сапханнар. Минің хайиимны «Чуртас чолы» сарын тартхан, ол ырның авторы Евгений Улугбашев полча.
Чуртас чолы узах ползын,
Хазииңар чахсы ползын...
Пу сӧстер кемнің дее кӧңніне кірер. Санапчам, аны хайдағ даа той-пайрамда толдырарға чарир.
Хакасияның саблығ артизі Мария Янгулова концерттің пастағы пӧлиинде тахпахтар сарнаан. «Ой, атасы, ой, аладыр» тахпахты Анна Курбижекованаң Алексей Янгулов чайаптырлар. Пӱӱнгі кӱнде, хомзынысха, хызылларның тілін сценада удаа истерге киліспинче, аннаңар чапсых полған Мария Васильевнаның толдырғаны. Ідӧк сцена узы эстрада ырларын тимнептір. Оларны кӧрігӌілер «Тӧреен чирімнің кӧглері» концерттің ікінҷі чардығында истіп алғаннар. «Олаңай сағыстар» паза «Чахсы позымны сағынзам» кӧглер прайзын аптааннар.
Хакасияның чон артизі Людмила Арыштаева аймах сарыннар толдырча, че концертке ол эстрада ырларын таллап алтыр. Людмила Александровна ӧтіг ӱнінең «Хыныстың ыры», «Тина», «Хайхастығ иир» паза «Хайӌыдаңар ыр» кӧглерні сарнап пирген. Аның лирика ырлары улуғларның даа, чииттернің дее кӧңнілеріне тың кірген.
Алынҷа номерлер тимнеп, сценаа музыкант паза ырҷы Аржан Туденев сыххан. Пастап ол хобырахнаң «Хыныстың ханаттары» композицияны толдырған, анаң «Туғаннар» ырны сарнаан.
Таныхтирға кирек, прай фольклор кӧглерін Евгений Улугбашевнең музыканттар Татьяна Майнагашева, Ирина Боргоякова паза Аржан Туденев чалтырама толдырғаннар.
Саблығ артисттернің номерлерін «Улгер» ансамбльның теелбек ӧмезі чазаан.
Хакасияның саблығ ырҷылары уғаа чахсы концерт тимнееннер. Ағбандағылар, оларның устарына морсынып, «Браво!» хысхырғаннар паза матап айа сапханнар. Тӱрчедең пу концертті хакас чайаачылары аалларда кӧзідерлер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде