ХАЗНА СЫЙЫХТАРЫ НАА ОҢДАЙЛАРҶА
25.11.2016
Хабарлар
Хакасияның Ӧӧркі Чӧбінің президиумы парламент кнезі Владимир Штыгашевтің устаанынаң теестегі чыылығда сигіс сурығ ӱзӱрібіскен, ол санда пис республика закон проектін.
Хакасия Правительствозы республиканың хазна сыйыхтарын читірер оңдайларны алыстырар закон проектінең сыхча.
Закон проекті хоостыра «За заслуги перед Хакасией» медаль паза «Хакасияның аарластығ чуртағӌызы» аарластығ ат ӱреен дее чуртағаа пирілері кӧрілче. Ідӧк кізі аарластығ сыйыхха турыстыра чидіге читкен полза, аны хазна ӱс чыл ирткенҷе дее сыйыхтирынаңар алызығ пар. Аннаң пасха, чуртағҷыны хазна сыйиинаң алғыстирына сығарҷаң право пирілер ӱлгӱ органнарына, халых пірігістеріне паза организацияларға, ідӧк республика пазына. Че Оӧркі Чӧптің кнес орынӌызы Светлана Могилинаның таниинаң, закон проектінде андағ право республика парламентіне пирілбинче. Пасха даа танығлар пардаңар, закон проектінең сыхчатханнарға аны 7 декабрьға теере читіре тимнебізерге чӧп пирілген. Хакасияның парламенті 14 декабрьда сессия иртірерге пӧгінче.
Хакасияның транспорт паза чол хонии министрі Александр Егоров «Хакасияның чол фондынаңар» республика законына алызығлар кирерінеңер закон проектінең таныстырған. Алызығлар федеральнай законға килістіре тимнелгеннер. Министерство закон сығарҷаң ӱлгӱнең хада-пірге тоғынча, аннаңар закон проекті дее чахсы тимнелген. Александр Егоровтың таниинаң, чӧптіг тоғыс сылтаанда кічіг аалларда пӱӱл ле 29 километр чол нааӌылалған. Закон проекті хоостыра федеральнай бюджеттең субъекттерге ассигнованиелер акциз тӧлеглері кірген хоостыра пирілер. Толдыразынаң чыылза, ахча ідӧк чахсы пирілер, читіре чыылбаза - асхынах.
Закон проекттерінең танысхан соонаң президиум кізілері хай пірее федеральнай законнарнаң чарасханнар. Ол санда приватизациядағы чурттың тиксі тыхтағ тоғыстарын алында ээ полған органнарны тӧлеттірердеңер. Чарадығ Россия Правительствозынаң сыхча, аның кнезі Дмитрий Медведев закон проектінде позы хол салтыр. Хакасияның парламент кнезі Владимир Штыгашев наа алызығлар кирілеріне чӧпсінче, аның кӧрізінең, кізее тура тыхтағ чох пирілген полза, аны алындағы ээзі тыхтирға кирек. Пілдістіг, ӧӧнінде ол олох ӱлгӱ органнары. Че андағ оңдайнаң хазна чуртағҷыларның алнында обязательстволарын толдырча.
Ідӧк чыылығда Хазна Думазы депутаттарының закон проектіне чахсы ӱндезіг пирілген. Кӧрілген закон проекті «Аал хонии тилізінеңер» паза «Кресен-фермер хониинаңар» федеральнай законнарға алызығлар кирерін кӧрче. Олар аал хонии туризмін тилідеріне теелчелер. Хакасияда даа аал хонии туризмі тузаланылча. Алызығлар, тізең, фермерлерге хоза парыстанҷаң оңдай пирер.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде