ПОЛҒАН НА АҒЫРСЫМНЫҒ СУРЫҒ СӦБІРЕЕ ТЕЕЛЧЕ
25.11.2016
Хабарлар
Россияның Хазна Думазының депутады, «Единая Россия» фракцияның кізізі Надежда Максимова Хакасияҷа тоғыс чорығы тузында чоннаң тоғасхан. Хайди пілчебіс, пӱӱл сентябрьда ирткен табығларда республика чуртағҷыларының кӧбізі Надежда Сергеевна Максимованың ӱчӱн ӱнін пирген. Амды ол Россияның Хазна Думазында Хакасия адынаң республиканың кирексіністері ӱчӱн турысча. Ідӧк Надежда Максимова Хазна Думазының бюджетче паза налогтарҷа комитет кнезінің орынӌызы полча.
Надежда Максимова, депутат тоғызын толдырып, республика чуртағӌыларынаң сыбыра тоғазадыр. Андар ӧӧнінде пӧгілбинчеткен ағырсымнығ сурығларнаң айланчалар. 23 ноябрьда Ағбанда депутатнаң, тоғазып, чоохтазып алар оңдай полды. Тоғазыға телефон пастыра азынада пазын саларға кирек полған.
Амғы тоғазыға ӧӧнінде улуғ частығлар килгеннер. Айланыстар аймах-пасха киректер хоостыра полған. Чурт-коммунальнай тӧлеглердең пасти пенсия сурығларына теере теелгеннер. Ағбан чуртағҷызы Ольга Дмитриевна Смирнованың хызына апсаа ӱреен соонаң страховой пенсия тӧлелген. Ӱгренчеткен студентке 23 часха теере пенсия тӧлелерге кирек.
Бакалаврға тӧрт чыл ӱгреніп, чиит хыс Хыдатта магистратурада ӱгренізін узаратхан, ағаа 22 час полған. Хырығ озаринда ӱгренчеткен хысха пенсия тӧлелбинібіскен.
Страховой пенсия тӧлеглерінӌе закон хоостыра 10-ҷы статьяның 2 пунктында, хырығ озаринда ӱгренчеткен студенттерге, Россия университеттерінең чӧптезіг иділген полза ла, страховой пенсия тӧлелче тіп чоохталча. Ольга Дмитриевнаның хызы чӧптезіг чох, пос ахчазына ӱгренерге парған. Чарғыласхан соонаң пенсия тӧлел сыххан.
Ольга Дмитриевна депутат Надежда Максимовадаң, пасха студенттер мындағ кирекке кірбес ӱчӱн, Хазна Думазында пу законзар тӱзедіглер кирердеңер сурынған. Ольга Смирноваа пастап Хакасияның социальнай политика паза хазых хайраллаӌаң комитеттің кнезі Владимир Костюшсар айланарға кирек. Н.С.Максимова, теестегі тоғыс чорығы тузында чоннаң тоғазығ иртірзе, пу сурыға хатап айланар тіп ізендірген.
Ууҷа Людмила Тонких кӧп квартиралығ тура кнезі полча. Аға-ууҷаларның квартираларында чурттығ чииттер коммунальнай тӧлеглерні тӧлебинчелер, - хоптанған ол. - Коммунальнай тӧлеглер ӱчӱн 81 муң салковай алым пістің тураның. Квартира ээлері тураларында чуртабинчалар, палалары, тізең, анда пічікке кирілгеннер. Чииттер тӧлирге хынминчалар. Устапчатхан компания тура ээлерінең чарғыласча. Чарғы ай сай 300 салковай тӧлирге чарадығ алча. Пір саңай улуғ алымны ууча тӧлеп полбинча. Алымнығ кізілернің ӱчӱн пасха чурт ээлері тӧлирге кирек пе?
Мында чурт ээзі паза аның сӧбірезі ахча тӧлир сурығны постары пӧгерге киректер тіп чӧп пирілген. Квартира ээзі паза квадрат метрлерге ӱлӱстіглер анда пічікке киріл парғаннар нооза.
Ағбандағы Вокзальнай орамадағы 12 № тура изелчеткенге саналча. Анда ікі хадыллығ ағас туралар орныхча. Пу орынны город кӧп хадыллығ тура пӱдіриине пирібістір. Амды ікі ағас тура иңзерілчеткенге саналча, оларны сайирға кирек. Пӱдіріг ээзі чуртағҷыларнаң пір чӧпке кил полбинча, ол квартираларны ниик паалапча. Пастап пу туралар иңзерілчеткеніне саналбааннар. Соонаң чарғы пастыра іди санап сыхханнар. Аны хоостыра андағы чонға Ағбан город бюджеді ахчазына чурт пирілерге кирек. Полған на квартира паазы пасхалалча нооза.
Вокзальнай орамадағы тураларның пірсінде ууӌа Людмила Постернак чуртапча. Ол чуртағҷылар адынаң Надежда Максимовазар айланған. Людмила Ананьевна квартиразын садарға сағынча. Че пӱӱнгі кӱнде ағаа 1млн.770 муң салковай пирерге тимделер. Пу син ахча асхынах тіп санапча ууҷа.
Чурт ээлері мыннаң мындар тоғырланзалар, оларны чарғы пастыра турадаң кӧзірерлер, ахчаны банк пастыра тӧлеп пирерлер. Пос кирексіністері ӱчӱн чарғы пастыра ла турызарға килізер тіп чоохтааннар. Пу путхалыстығ киректе кӧп сурығ сығыс килче. Иңзерілчеткен турадағы квартиралар ідӧк ниикке паалалчалар нооза. Людмила Ананьевна, тізең, андар чарадығнаң чараспинча: «Тура тыттаң пӱдірілген, сыхтығ нимес, хуруғ чирде турча, суғ паза септик - городти...» «Тураны хайдағ эксперт сыныхтаан, кем наа пӱдіріг пастирға чарадығ алған?» - паза даа пасха сурығлар сығыс килче.
Пу сурығларны хайығда тударбын тіп ізендірген Надежда Сергеевна Максимова. Депутат паза аның полысчылары, полған на ағырсымнығ сурығны ипти ӱзӱріп, республиканың министерство-ведомстволары пастыра федеральнай синде пӧгер оңдайлар тапханнар.
Автор :
Елена САГАТАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде