ПЕРИНАТАЛЬНАЙ КІНЗЕР ИМНЕГ ОБОРУД0ВАНИЕЗӀ КИРІЛЧЕ
25.11.2016
Хабарлар
Ағбанда пӱдірілчеткен перинатальнай кінні Хакасияның иң улуғ объектіне санирға чарир. 2016 чыл тоозылғанҷа ол тимде поларға кирек, пір ай артиинаң халды. Хакасияның пазы Виктор Зимин перинатальнай кін пӱдіріл сыхханнаң ала амға теере аны тӧреміп позының хайиинда тутча. Кінде ӧӧн пӱдіріг тоғыстары тоозылғаннар, амды аның істінде тоғыс хайнапча. Пу неделяда Хакасияның пазы Виктор Зимин, позының орынҷыларын, хазых хайраллаӌаң, финанстар, пӱдіріг министерстволарның паза подряд организацияларның устағҷыларын чыып, штаб чыылиин иртірген.
Чыылығ иртірер алнында Виктор Зимин перинатальнай кіннің 3-ӌі хадылында полған. Анда хазии уйан тӧреен палаларға операция ит турарлар, пуох хадылда клиника-диагностика лабораториязы полар. Ӱр ниместе андар ӧкпее искусственней вентиляция итчең 14 аппарат ағылғаннар. Хайди чоохтапча "СДС" компанияның кізізі Пётр Козарь, имнег оборудованиезі Швейцарияда сығарылған. Полғаны ла 1 миллион салковайға чағын турча. Пу кӱннерде олар перинатальнай кінде турғызыларлар, анаң Москвадаң ӧнетін специалисттер килерлер, хайзылары Хакасияның имҷілерін, специалисттерін аппаратнаң орта тузаланарға ӱгредерлер.
Ідӧк ӱр ниместе перинатальнай кінзер ыңааҷахтарға паза оларның іӌелеріне амғы тусха килістіре орғаннар кирілгеннер. Таныхтирға кирек, перинатальнай кінзер 4710 имнег оборудованиезін аларына 1 млрд. артиинаң салковай хорадылар.
Чыылығда Виктор Зимин сурығ турғысхан: перинатальнай кін чыл тоозылғанӌа тимде полар ӱчӱн, хоза хайдағ тоғыстар идерге кирек? Пӱӱнгі кӱнде перинатальнай кіннің істінде стенелерні чағып иптепчелер, поллар линолеумнаң паза кафельнең чазылча, ізіктер турғызылча паза даа пасха тоғыстар иділче. Хайди чоохтапча "Монолитстрой" ООО-ның кізізі Эльчин Азизов, 2-ӌі паза 3-ҷі блоктарда тоғыс кӧп халбаан, ӧӧн тоғыстар 4-ӌі блокта парча. Ӱр ниместе перинатальнай кінде чылығ пирілген, ізіг паза соох суғ тартылған. Хозблокта, ас-тамах хайраллаҷаң, машиналар турғысчаң чылығ орыннарда тоғыстар 99 процентке толдырылған.
Виктор Зимин тимде блоктарзар имнег оборудованиезін киріп пастирға чарадығ алған. Че пу тоғысты пастир алнында коридорлардағы тоғыстарны табырах тоозыбызарға кирек.
Олар имнег оборудованиезін кирерге харығ полчалар.
Имнег оборудованиезі киріл парза, хайди даа хадағҷылар турғыс саларға кирек полар, - хатығ чоохтанған Хакасия пазы. - Пір ле оборудование миллион салковайға турча. Аны хайди даа хадарарға кирек.
Перинатальнай кінде істіндегі тоғыстар халғаннаңар, пӱӱнгі кӱнде анда істіндегі тоғыстарны итчең кізілер чидіспинче. Хакасияның пазы Виктор Зимин орынҷылары Олег Намға паза Ирина Смолинаа андағ тоғынӌыларны паза даа пасха пӧзік квалификациялығ специалисттерні таап саларға чахығ пирген.
- Тоғыс тузында тоозылар ӱчӱн, тоғынҷылар тӧрт сменанаң тоғынарға киректер. Іди полза, піс перинатальнай кінні тузында тузаланысха кирербіс, - таныхтаан ол.
Виктор Зимин тоғыс хайди парчатханын мыннаң мындар тӧреміл хайығда тударынаңар паза килчеткен неделяда хатап штаб иртірерінеңер искірген. Ідӧк хосхан:
- Піс федеральнай синде паза Хакасияның чуртағҷыларына перинатальнай кін 2016 чыл тоозылғанҷа тимде полар тіп сӧс пиргебіс. Ол сӧске піс хайди даа турызарға кирекпіс. Іди полбаза, федеральнай кін піске ахчанаң паза хабаспас. Піске, тізең, хабазығ хайди даа кирек полар. Пістің пӧгін пар - Хакасияда республиканың олған имнег туразын пӱдірері. Мындағ имнег тура республикаа, ӧӧнінде кічіг паза ыраххы аалларда чуртапчатхан палаларға кирек, - чооғын тоосхан Виктор Зимин.
Таныхтирға кирек, перинатальнай кіннің пӱдіриине 3 млрд. артиинаң салковай кӧріл парған. Пӱӱнгі тусха 2 млрд. артиинаң хорадылған.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде