ХАКАСИЯНЫҢ ӦӦРКІ ЧӦБІНДЕ - ХЫЗЫЛЧАР ТИМІР ЧОЛЫНЫҢ КӰНІ
29.11.2016
Хабарлар
РЕСПУБЛИКАНЫҢ ПАРЛАМЕНТІНДЕ ХЫЗЫЛЧАР ТИМІР ЧОЛЫНЫҢ КӰНІ ИРТКЕН. ХАКАСИЯНЫҢ ӦӦРКІ ЧӦБІ КОМИТЕТ-КОМИССИЯЛАРЫНЫҢ УСТАҒӋЫЛАРЫ ЧОРЫХ ЧЫЫЛИИН АСХЫС СТАНЦИЯЗЫНДА ИРТІРГЕННЕР. АНЫҢ ТОҒЫЗЫНДА ХЫЗЫЛЧАР ТИМІР ЧОЛЫНЫҢ ПАСТЫҒЫ ВЛАДИМИР РЕЙНГАРДТ, ХАКАСИЯНЫҢ ӦӦРКІ ЧӦП ПРЕЗИДИУМЫНЫҢ КІЗІЛЕРІ ПАЗА АСХЫС АЙМААНЫҢ УСТАҒ-ПАСТАА АРАЛАСХАННАР.
Хызылчар тимір чолының кӱні Хакасияның Ӧӧркі Чӧбінде ікінӌізін иртірілді. Пу оңдай тимірчолӌыларның паза закон сығарӌаң ӱлгӱ органнары аразындағы хайызығларны наа паза тӱзімніг синге сығарча.
Мероприятие хоостыра Асхыс станциязынзар чорых тимнелген. Анда депутаттарны Хызылчар тимір чолының производстволығ паза социальнай объекттерінең таныстырар пӧгіннең экскурсия иртірілген. Анаң «тегілек стол» оңдайынаң тимір чолны тилідер, «РЖД» ОАО-ның региондағы социальнай политика проекттерін чуртасха кирер сурығлар ӱзӱрілген.
- Хакасия станцияларынаң таарлағлар тартары чылдаң ӧзіп одырча. 2016 чылда даа, хаҷан хазнаның пірее регионнарында таарлағлар тартарының сині тӱсчеткені таныхталча, Хакасияның предприятиелері хара тасты, ӧңніг руданы паза ӧңніг металларны тимір чолӌа ызарын ӧскірібіскеннер. Кӧзідімге, Харатас шахтазы станциязында ла піс кӱннің сай 500 вагонға теере таарлапчабыс, - таныхтаан Хызылчар тимір чолының пастығы Рейнгардт. - Хакасия піске - уғаа кирек регион, ол тимір чолдағы прай таарлағларның 25 %-ін пирче.
Чыылығда алынҷа хайығ тимір чолның социальнай проекттеріне салылған. Депутаттар Асхыс станциязындағы олған садында пол килгеннер. Тимір чол, тыхтаға ахча позыдып, олған садын нааҷылабысхан.
- Аймахтағы аалларның 12-зі Хызылчар тимір чолының станциязы полча, - теен Асхыс аймааның пазы Абрек Челтыгмашев. - Ол аалларда чуртас сидіксіністері чоғыл. Тимір чол аал чуртағӌыларына тоғыс орнын пирче, чал ахчазын паза налогтар тӧлепче.
Хызылчардағы магистраль - республикадағы иң улуғ предприятиелернің пірсі. Хакасияда тимір чол пӧліктерінде 6 муңа чағын кізі істенче. Ортымах чал ахчазы синінҷе тимірчолӌылар Хакасияда 1-ғы орында турчалар.
- Хызылчар тимір чолынаң пістің чахсы хайызығлар тӧстел парған. Мындағ тоғазығлар оларны тыытча, - чыылығ салтарларын иткен Ӧӧркі Чӧп кнезінің пастағы орынӌызы Юрий Шпигальских. - Ол - кӧп нимес предприятиелернің пірсі, хайзы республиканың экономиказына пілдірте хозым на нимес, ідӧк позының социальнай обязательстволарын толдыразынаң толдырча.
Автор :
Хакасияның Ӧӧркі Чӧбінің хабарлар пӧлии
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде